Erĩlũayo 21 - AMASAKO ABOYTRTRE WA NYAMUHANGA AWAKAHULAWA MO BIBLIA

Emigambo yʼerigula abakobe

¹ Ebĩ bye bilayiro Wasyahĩra embere syabo.

² Wamagula omukobe Omuebrania, iniakola emyaka ndatu; nʼomwaka wʼakaiinda iniabya bwĩranda.

³ Amingira ĩyowene, asyahuluka ĩyowene; amabya ahĩkĩrye omũkalĩ wuwe, asyahuluka haguma naye.

⁴ Omukama wuwe amamũhĩkĩrya naye amamubutira bagala nʼabali; omũkalĩ nʼabana buwe basyabya bʼomukama naye, asyahuluka ĩyowene.

⁵ Nĩkwa omugombe amabũga nʼerĩmĩnyĩkalya ati, Nyanzĩre omukama wage, nʼomũkalĩ wage nʼabana bage; sĩnyanzĩre eribya bwĩranda,

⁶ neryo omukama wuwe iniamuleta uku Nyamuhanga, kandi iniamuleta oko lũyĩ, kutse oko nzeguliro syʼolũyĩ; nʼomukama wuwe asyatobola okũtũ kuwe omo mugera; naye asyamukolera emigulu yosĩ, na kera.

⁷ Omundu amagũlya mwali wuwe eribya mukobe wʼobũkalĩ, sĩendĩsyalũamo ngʼabakobe bʼobulume.

⁸ Amatindatsemesya omukama wuwe, oyo wamugula, iniamuleka erĩtongolĩbwa; siawite hamũlĩ erĩmũgũlya oko bandu abalũa ehandi, kusangwa abirimuteba.

⁹ Kandi amamũhĩkĩrya mugala wuwe, iniamuganzira oko bali.

¹⁰ Amahĩkya ogundi mũkalĩ; sĩendĩsyakehya akalyo kuwe, nʼesyongimba siwe, butsira erimusomba.

¹¹ Amatindamukolera emyatsi ĩsatũ eyĩ, asyalũamo eribya bwĩranda butsira eririha bindu.

Ebihano busana nʼabandu abakaswĩraya abandi

¹² Oyo wasyaswĩrya omundu akahola, kwenene asyĩtwa.

¹³ Omundu amabũlĩkĩra, nĩkwa Nyamuhanga akamũhĩra omo byala biwe; ngandiahula aho angatibita.

¹⁴ Kandi omundu amombombera mũlĩkyabo, nʼerĩmwĩta nʼepono; wasyamũlũsya oko kiherero kyage, ahole.

¹⁵ Nʼoyũkaswĩraya tata wuwe, kutse koyo wuwe, kwenene asyĩtwa.

¹⁶ Nʼoyũkĩba omundu akamũgũlya, kutse omundu oyo amabanika omo byala biwe, kwenene asyĩtwa.

¹⁷ Nʼoyukatsuma tata wuwe kutse koyo wuwe, kwenene asyĩtwa.

¹⁸ Nʼabandu bamalwa, nʼomuguma akaswĩrya ogundi yʼomwʼĩbwe, kutse omo ngũmbe, naye amatindahola, nĩkwa iniali omo ngyingo;

¹⁹ amahangana kandi; akayigendera oko mũtso wuwe, oyuliamũswĩraya inialekwa; nĩkwa inialiha busana nʼemigulu eyamutalako, kandi iniamulembera erĩhĩka okwʼilama ndeke liwe.

²⁰ Omundu amaswĩrya omukobe wuwe, kutse omukobe wuwe wʼobũkalĩ, omo mũtso, akaholera omo byala biwe; kwenene asyasuyirwa.

²¹ Nĩkwa amabyaho ekiro kiguma kutse bibiri, isiendisuyirwa, kusangwa ni bindu biwe.

²² Abandu bamalwa haguma, bakahũtalya omukule, obukule bũkamũlũako, nĩkwa sihali kindi kĩkamũhĩkako; kwenene asyaliha endĩhĩ ngoko ĩba wʼomũkalĩ asyamutswera, kandi asyaliha ngoko abatswerĩ basyabũga.

²³ Nĩkwa amaswahuluka kʼobubi, neryo engebe busana nʼengebe,

²⁴ erĩso busana nʼerĩso, erĩno busana nʼerĩno, ebyala busana nʼebyala, okugulu busana nʼokugulu,

²⁵ obuhye busana nʼobuhye, ekironda busana nʼekironda, erĩhũnza busana nʼerĩhũnza.

²⁶ Kandi omundu amaswĩrya oko lĩso lyʼomukobe wuwe, kutse erĩso lyʼomukobe wuwe wʼobũkalĩ, nʼerĩtsandyalyo; iniamuleka eribya bwĩranda busana nʼerĩso liwe.

²⁷ Kandi amaswĩrya oko lĩno lyʼomukobe wuwe likakulika kutse erĩno lyʼomukobe wuwe wʼobũkalĩ asyamuleka bwĩranda busana nʼerĩno liwe.

²⁸ Kandi ende yamatsimita omulume kutse omũkalĩ omwʼĩhembe ryayo akahola, ende ĩyakwa omo mabwe, nʼesĩswĩ syayo isisyalibawa; nĩkwa Omwenye ende iniabya bwĩranda.

²⁹ Nĩkwa ende yamabya itula ikatsimita omwʼĩhembe, na mwenyeyo iniabiribwirwa omwatsi wayo, isialitahangayo, nĩkwa ĩyabĩrĩta omulume kutse omũkalĩ; ende eyo yasyĩtwa omo mabwe, nʼomwenyeyo naye ĩnĩtwa.

³⁰ Amatswerwa erĩtongolĩbwa, asyabana endongolya busana nʼengebe yiwe, nʼebyo basyamutswera.

³¹ Yamatsimita omũlwana kutse omwana-muto, ibamutswera omusango ekihano ekĩ ko kiri.

³² Ende yamatsimita omukobe wʼobulume kutse wʼobũkali omwʼĩhembe, omukama wabo asyalihwa ebĩtsĩpa makũmĩ asatu, nʼende ĩyĩtwa omo mabwe.

Amahano busana nʼamahya

³³ Omundu amabambula obuhya, kutse omundu amatakula obuhya nʼeritindabambabo, nʼende kutse epunda yamatogera mubo;

³⁴ Omwenye obuhya asyaliha; asyaha esyofranka oko mwenyeyo, nʼenyama eyiryahola yasyabya yiwe.

³⁵ Ende yʼomundu yamahũtalya ende yʼogundi mundu, ikahola, ĩbagũlya ende eyiriho nʼerigabana obũgũlĩ bwayo; nʼeyĩholĩre basyagabayo.

³⁶ Kũtse kyamaminyikala kwʼende eyo itula ikatsimita erĩhĩka lino, nʼomwenyeyo isialihangayo; kwenene asyaliha ende erihingana nʼeyindi, nʼeyĩholĩre iyabya yiwe.