Erĩlũayo 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Amahano ĩkũmĩ

¹ Neryo Nyamuhanga mwabũga ebĩnywa byosĩ ebĩ ati,

² Ĩngye indi Mwami Mukulu Nyamuhanga wawe, oyo wakũlũsaya omo kihugo kyʼeMĩsĩrĩ, erĩlũa omo nyũmba yʼobukobe.

³ Susyebya nʼesindi nyamuhanga nĩna ngye.

⁴ Sũsyeyĩkokoteraya esanamu eyikahesawa, kutse ekĩsosekanĩo kyʼekindu nʼekiguma ekiri endata omo lubula, kutse ekiri eyĩkwa omo kihugo, kutse ebiri omo magetsi eyĩkwa oko kihugo.

⁵ Sũsyũnamirabyo kutse erikolerabyo; kusangwa ĩngye Mwami Mukulu Nyamuhanga wawe, indi Nyamuhanga wʼobũha, erĩtũhũlya ebibi byʼabotata oko bana nʼoko lulengo lwʼakasatu nʼolwʼakani oko bakanyĩkwa obusu,

⁶ nʼerĩkangya obubuya bʼolwanzo oko elfu nʼamaelfu wʼabandu abanyanzĩre nʼerĩteya ebihano byage.

⁷ Isiwahula erĩna lyʼOmwami Mukulu Nyamuhanga wawe lyo busa; kusangwa Omwami Mukulu siendisyamuganza eribya butsira musango oyukahula erĩna liwe lyo busa.

⁸ Wibuke ekiro kyʼeSabato, erihigulakyo mo kĩbũyĩrĩre.

⁹ Ebiro ndatu wasyakola emĩbĩrĩ yawe yosĩ;

¹⁰ nĩkwa ekiro kyʼebirinda ni Sabato busana nʼOmwami Mukulu Nyamuhanga wawe; isiwakola omũbĩrĩ nʼomuke mukyo, uwe, kutse mugala wawe, kutse mwali wawe, kutse omugombe wawe, kutse mugombe wawe wʼobũkalĩ, kutse esyonyama syawe syʼeka, kutse omũgendĩ oyuli omo kyaswa.

¹¹ Kusangwa omo biro ndatu Omwami Mukulu mwahangika olubula nʼekihugo, nʼengetsi, nʼebyosĩ ko birimo, neryo mwaluhuka ekiro kyʼebirinda; kyaleka Omwami Mukula iniatsumula ekiro kyʼeSabato, nʼeriyirakyo mo kĩbũyĩrĩre.

¹² Ukenge tata wawe na koyo wawe, ebiro byawe bitoke eribya bingi omo kihugo ekyo Mwami Mukulu Nyamuhanga wawe akakuha.

¹³ Ĩsĩwĩta.

¹⁴ Isiwasĩngĩra.

¹⁵ Ĩsĩwĩba.

¹⁶ Ĩsĩwabehekereraya mũlĩkyenyũ nʼamabehĩ.

¹⁷ Isiwarumawa oko nyũmba ya mũlĩkyenyũ, isiwarumawa oko mũkalĩ wa mũlĩkyenyũ, kutse oko mugombe wuwe, kutse oko mugombe wuwe wʼobũkalĩ, kutse oko nde yiwe, kutse oko punda yiwe, kutse kĩndũkĩ kya mũlĩkyenyũ.

¹⁸ Nʼabandu bosĩ mobowa emĩlũmo, nʼerĩpalya, nʼomulenge wʼengubi, nʼekitwa kĩkatũ mba; nʼomugulu abandu balangira ebyo mobatitimana, mobayisuna hali.

¹⁹ Mobabwira Musa bati, Uwe ũbũge netu, netu tũkandĩowa; nĩkwa Nyamuhanga sĩabũge netu, tukasyahola.

²⁰ Na Musa mwabwira abandu ati, Simubahe; kusangwa Nyamuhanga alyasa eribalenga, olubahwa luwe lutoke eribya embere syenyũ, ĩsĩmwahalaya.

²¹ Nʼabandu mobahangana hali, na Musa mwayĩtũnda hakũhĩ nʼomwĩrĩmya owalĩtohĩre aho Nyamuhanga abya.

²² NʼOmwami Mukulu mwabwira Musa ati, Ũkandĩbũga utya nʼabana ba Ĩsraelĩ, uti, Ĩnywebene-bene mwabirilangira ngoko nabĩrĩkanĩa nenyũ erĩlũa elubula.

²³ Simusyeyikolera esindi nyamuhanga erĩramyasyo haguma nage; esyonyamuhanga syʼekĩtsĩpa, kutse esyonyamuhanga syʼesyamagetsi, simuyikoleresyo.

Omwatsi wʼeriherera oko kiherero

²⁴ Wasyanyikwikira ekiherero kyʼekitaka kandi wasyaherera kukyo obuhere bwʼerĩokererya, nʼobuhere bwawe bʼobuholo, nʼesyombũlĩ syawe, nʼesyonde syawe kukyo; ehosĩ nasyĩbũkya erĩna lyage nasyakũhĩkako nʼerikutsumula.

²⁵ Neryo wamanyĩhĩmbĩra ekiherero kyʼamabwe, ĩsĩwahĩmbakyo omo mabwe awabatsĩre; kusangwa wamasumbira ekyuma kyawe kyo kukyo; ĩwamatsandyakyo.

²⁶ Kutse susyehetukira oko kiherero kyage oko bisambiro, ukasyakunamiraho.