Erĩlũayo 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Abaĩsraelĩ bakahĩka eSĩnaĩ

¹ Oko mukera wʼakasatu enyũma wʼerĩlũa omo kihugo kyʼeMĩsĩrĩ, oko kiro ekyo kisa-kisa abandu ba Ĩsraelĩ mobahĩka omo mbwarara yʼeSĩnaĩ.

² Babere babĩlũa eRefidĩmũ, ĩbamabĩhĩka omo mbwarara yʼeSĩnaĩ, mobalalirira omo mbwarara; neryo Abaĩsraelĩ mobalalirira embere wʼekitwa.

³ Neryo Musa mwahetukira eyiri Nyamuhanga, NʼOmwami Mukulu mwamubirikira omo kitwa ekyo ati, Wasyabũga utya oko kihanda kya Yakobo, wasyabwira abana ba Ĩsraelĩ uti,

⁴ Mwabirilangira ebyo nabirikolera Abanya Mĩsĩrĩ, ngoko nabaheka oko bĩpũpa byʼerĩsamba, nʼeribaleta ũkwʼĩngye.

⁵ Neryo lino mwamasyowa omulenge wage kũndũ, nʼeriteya endagane yage, mwasyabya bindu byage erĩlũa omo bihanda byosĩ; kusangwa ekihugo ni kyage;

⁶ nenyũ mwasyabya ũkwʼĩngye obwami bwʼabahererĩ, nʼekihanda kĩbũyĩrĩre. Ebĩ bye bĩnywa ebyo wasyabwira abana ba Ĩsraelĩ.

⁷ Neryo Musa mwayabirikira abakulu bʼabandu, mwakanĩryabo ebĩnywa ebyo Mwami Mukulu amuhana.

⁸ Nʼabandu bosĩ mobasũbĩrya haguma bati, Ebyosĩ ebyo Mwami Mukulu abĩrĩbũga tukandikolabyo. Na Musa mwatũlĩra Omwami Mukulu ebĩnywa ebyo bandu babũga.

⁹ NʼOmwami Mukulu mwabũga na Musa ati, Lebaya, Ngakũhĩkako omo kĩtũ kĩrĩtohĩre, abandu batoke erĩowa omugulu ngakanaya nawe, kandi batoke erĩkwĩkĩrĩrya ebiro byosĩ. Neryo Musa mwabwira Omwami Mukulu ebĩnywa ebyo bandu babũga.

Amahano busana nʼekitwa kyʼeSĩnaĩ

¹⁰ Neryo Omwami Mukulu mwabũga na Musa ati, Ugende eyiri abandu, uhigulebo mũnabwĩre nʼomo ngyakya, kandi beraye esyongimba syabo,

¹¹ abandu basĩke busana nʼekiro kyʼebisatu; kusangwa oko kiro kyʼebisatu Omwami Mukulu asyakĩmĩra omo meso wʼabandu bosĩ oko kitwa kyʼeSĩnaĩ.

¹² Nawe ũkandĩhĩra emitano busana nʼabandu oko mbande syosĩ, uti, Mũyĩtegaye, isimwahetukira oko kitwa kutse erĩtũla oko mitano yakyo; nʼoyũkatũla oko kitwa kwenene asyĩtwa.

¹³ Sihabye byala ebĩkamũtũlako, kwenene lye nʼerĩĩtwa omo mabwe, kutse erĩtsimitwa; yamabya enyama kutse mundu, siendisyabyaho; omugulu engubi ĩkabũga ndambĩ nyiri, basyahetukira oko kitwa.

¹⁴ Neryo Musa mwandagalira oko bandu erĩlũa oko kitwa, mwahigula abandu; nabo moberya esyongimba syabo.

¹⁵ Neryo Musa mwabwira abandu, ati, Mũyĩtegekanaye oko kiro kyʼebisatu; isimwasegera hakũhĩ nʼomũkalĩ.

¹⁶ Neryo oko kiro kyʼebisatu, omo ngyakya-ngyakya, mohabya emĩlũmo nʼerĩpalya, nʼekĩtũ kĩkĩnĩre oko kitwa, nʼomulenge munene wʼengubi. Nʼabandu bosĩ ababya omo kilaliriro mobatitimana.

¹⁷ Na Musa mwahũlũkya abandu erĩlũa omo kilaliriro erĩhĩndana na Nyamuhanga; mobahangana oko luhande lwʼeyĩkwa lwʼekitwa.

¹⁸ Nʼekitwa kyʼeSĩnaĩ, ekyosĩ, mokyatũmba, kusangwa Omwami Mukulu mwandagalira kukyo omo muliro; nʼomũkĩ wakyo mwahetuka ngʼomũkĩ wʼerĩsĩngo ĩnene, nʼekitwa kyosĩ mokyatitimana kutsibu.

¹⁹ Nʼomugulu omulenge wʼengubi alabĩrĩraya kutsibu, Musa mwabũga, na Nyamuhanga mwamũsũbĩrya omo mũlũmo.

²⁰ Neryo Omwami Mukulu mwandagalira oko kitwa kyʼeSĩnaĩ, oko singi yʼekitwa; nʼOmwami Mukulu mwabirikira Musa oko singi yʼekitwa; neryo Musa mwahetukirayo.

²¹ Neryo Omwami Mukulu mwabũga na Musa ati, Wandagale, uhane abandu, bakasyapumukira ahali Omwami Mukulu nʼerisamalira, nʼabangi ba kubo bakasyahola.

²² Nʼabahererĩ nibya, abakasegera hakũhĩ nʼOmwami Mukulu, bayihigule, Omwami Mukulu akasyapumukirabo.

²³ Na Musa mwabwira Omwami Mukulu ati, Abandu sibangatoka erihetukira oko kitwa kyʼeSĩnaĩ; kusangwa watuhana uti, Ũhĩre emitano erĩtĩmba oko kitwa, kandi uhigulekyo.

²⁴ Neryo Omwami Mukulu mwamũsũbĩrya ati, Genda ũkĩme; kandi wasyahetuka, uwe haguma na Harũnĩ; nĩkwa abahererĩ nʼabandu sibapumuke nʼerihetukira ahali Omwami Mukulu, akasyapumukira kubo.

²⁵ Neryo Musa mwandagalira oko bandu, mwabwirabo.