Erĩlũayo 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Farao akakwama Abaĩsraelĩ

¹ Omwami Mukulu mwabwira Musa, ati,

² Ubwire abana ba Ĩsraelĩ basubule balalirire embere wʼePĩhahĩrotĩ, omo katĩkatĩ kʼeMĩgĩdolĩ nʼengetsi, emuliro wʼeBalĩsefonĩ; mwasyalalirira aho hakũhĩ nʼengetsi.

³ Farao asyabũga busana nʼabana ba Ĩsraelĩ ati, Babĩrĩyĩgobanĩa omo kihugo, embwarara yabĩrĩkakĩryabo.

⁴ Nage nasyakalya omutima wa Farao, naye asyakwamirirabo, nage nasyabana erĩsĩkĩbwa busana na Farao na busana nʼomulondo wuwe gosĩ; nʼAbanya Mĩsĩrĩ basyaminya ko ndi Mwami Mukulu. Nabo mobakola batya.

⁵ Nʼomwami wʼeMĩsĩrĩ mwabwirwa ngoko bandu babiritibita; nʼomutima wa Farao nʼemitima yʼabagombe buwe moyabindulwa busana nʼabandu, mobabũga bati, Ekĩ nĩkĩ ekyo twabirikola, erireka Abaĩsraelĩ erigenda butsira eritukolera kwehĩ?

⁶ Neryo mwagosola egalĩ yiwe, mwĩmya abandu buwe,

⁷ mwĩmya esyogalĩ esisombwere amagana ndatu (600), nʼesyogalĩ syosĩ syʼeMĩsĩrĩ, haguma nʼabakulu ba kusyo bosĩ.

⁸ Neryo Omwami Mukulu mwakalya omutima wa Farao Omwami wʼeMĩsĩrĩ, naye mwakwamirira abana ba Ĩsraelĩ; kusangwa abana ba Ĩsraelĩ balũayo kinya-maka.

⁹ NʼAbanya Mĩsĩrĩ mobakwamirirabo, esyosabayĩrĩ syosĩ nʼesyogalĩ sya Farao, nʼabandu abali oko syosabayĩrĩ siwe, nʼemilondo yiwe, mobeya Abaĩsraelĩ ĩbanalalĩrĩre hakũhĩ nʼengetsi, oko mũsĩke wʼePĩhahĩrotĩ, emuliro wʼeBalĩsefonĩ.

¹⁰ Nʼomugulu Farao ahĩka hakũhĩ, abana ba Ĩsraelĩ mobasumba ameso wabo, neryo lebaya, Abanya Mĩsĩrĩ ibanemwasa enyũma syabo; neryo mobubaha kutsibu; nʼabana ba Ĩsraelĩ mobalakira Omwami Mukulu.

¹¹ Mobabwira Musa bati, Kusangwa sihabya masinda eMĩsĩrĩ kyaleka iwatuleta eriholera omo mbwarara kwehĩ? Busana nakĩ mowatukola utya, erĩtũlũsya eMĩsĩrĩ kwehĩ?

¹² Ekĩ si kye kĩnywa twakubwirira eMĩsĩrĩ tuti, Utuleke tukolere Abanya Mĩsĩrĩ kwehĩ? Kusangwa lĩlũe Ĩyowene erikolera Abanya Mĩsĩrĩ, kwilaba eriholera omo mbwarara.

¹³ Neryo Musa mwabũga nʼabandu ati, Simubahe, muhangane, mulangire erĩlamya lyʼOmwami Mukulu eryo akandibakolera mũnabwĩre; kusangwa Abanya Mĩsĩrĩ abo mukalangira mũnabwĩre, simwendisyaswalola kubo kandi erĩhĩka na kera.

¹⁴ Omwami Mukulu asyabalwira, nenyũ mwasyayibombeka bũkũtũ.

Abaĩsraelĩ bakasoka engetsi

¹⁵ Neryo Omwami Mukulu mwabwira Musa ati, Busana nakĩ ukanyilakira kwehĩ? Ubwire abana ba Ĩsraelĩ uti balolaye embere.

¹⁶ Nawe Usumbe omũtso wawe, usumbire ebyala byʼendata oko ngetsi, nʼerigabayo; nʼabana ba Ĩsraelĩ bakandigendera omo katĩkatĩ kʼengetsi oko kitaka kyũmĩre.

¹⁷ Nĩkwa ĩngye, ngandĩkalya emitima yʼAbanya Mĩsĩrĩ, nabo basyingira enyũma syabo; nage nasyabana erĩsĩkĩbwa busana na Farao, na busana nʼomulondo wuwe gosĩ, na busana nʼesyogalĩ siwe, na busana nʼabandu abali oko syosabayĩrĩ siwe.

¹⁸ Kandi Abanya Mĩsĩrĩ basyaminya ngoko indi Mwami Mukulu omugulu namabiyibanira erĩsĩkĩbwa busana na Farao, na busana nʼesyogalĩ siwe, na busana nʼabandu abali oko syosabayĩrĩ siwe.

¹⁹ Neryo omũlaĩka wa Nyamuhanga, oyo wabya akabya embere wʼekilaliriro kyʼAbaĩsraelĩ, mwahũma mwaya enyũma wabo; nʼendũyĩ yʼekĩtũ moyalũa embere syabo, moyahangana enyũma syabo;

²⁰ neryo moyasa omo katĩkatĩ kʼekilaliriro kyʼAbanya Mĩsĩrĩ nʼekilaliriro kyʼAbaĩsraelĩ; iyikaleta omwĩrĩmya oko Banya Mĩsĩrĩ, nʼekyakakala oko Baĩsraelĩ; mobatasegeranako omo kiro kyosĩ.

²¹ Na Musa mwasumbira ebyala biwe byʼendata oko ngetsi. Neryo Omwami Mukulu mwasũbya engetsi yʼenyũma omwʼihunga lĩkalĩre erĩkalũa endata omo kiro kyosĩ, kandi mwayira engetsi mo kitaka kyũmĩre, nʼamagetsi mwagabana.

²² Nʼabana ba Ĩsraelĩ mobalaba omo katĩkatĩ kʼengetsi oko kitaka kyũmĩre; nʼamagetsi mwabya lũhĩmbo kubo oko byala byʼamali, nʼebyʼamalembe.

²³ NʼAbanya Mĩsĩrĩ mobakwamirirabo, mobingira enyũma wabo omo katĩkatĩ kʼengetsi, esyosabayĩrĩ syosĩ sya Farao, nʼesyogalĩ siwe, nʼabali oko syosabayĩrĩ siwe.

²⁴ Neryo mokyabya omo kĩsĩsĩmũko kyʼomo ngyakya Omwami Mukulu mwasamalira omulondo wʼAbanya Mĩsĩrĩ omo katĩkatĩ kʼendũyĩ yʼomuliro nʼekĩtũ, neryo mwahahũkya omulondo wʼAbanya Mĩsĩrĩ.

²⁵ Kandi mwalũsya ebĩrĩngo byʼesyogalĩ syabo, mosyalĩtoha okwʼĩgendibwa; kyaleka Abanya Mĩsĩrĩ ĩbabũga bati, Tusage obũsũ bwʼAbaĩsraelĩ; kusangwa Omwami Mukulu akalwirabo erilwa nʼAbanya Mĩsĩrĩ.

Omwami Mukulu akasendaya Abanya Mĩsĩrĩ

²⁶ Neryo Omwami Mukulu mwabũga na Musa ati, Usumbire ebyala byawe byʼendata oko ngetsi, amagetsi asube oko Banya Mĩsĩrĩ, nʼoko syogalĩ syabo, nʼoko bandu abali oko syosabayĩrĩ.

²⁷ Na Musa mwasumbira ebyala biwe byʼendata oko ngetsi, nʼomugulu bwasesukala, engetsi moyasuba omo mwanya wayo; nʼAbanya Mĩsĩrĩ mobatibita embere kuyo; Omwami Mukulu mwatĩngĩtĩrya Abanya Mĩsĩrĩ bʼomo katĩkatĩ kʼengetsi.

²⁸ Nʼamagetsi mwasubula, mwakũkũngĩre esyogalĩ, nʼabali oko syosabayĩrĩ, nibya nʼomulondo gosĩ wa Farao mwingira enyũma wabo omo ngetsi; mohatasĩgala nʼomuguma wa kubo.

²⁹ Nĩkwa abana ba Ĩsraelĩ mobagendera oko kitaka kyũmĩre omo katĩkatĩ kʼengetsi; nʼamagetsi mwabya lũhĩmbo kubo, oko byala byʼamali nʼebyʼamalembe.

³⁰ Omwami Mukulu kwʼalamaya Abaĩsraelĩ bʼatya ekiro ekyo erĩlũa omo byala byʼAbanya Mĩsĩrĩ, nʼAbaĩsraelĩ mobalangira Abanya Mĩsĩrĩ ibanaholere oko mũsĩke wʼengetsi.

³¹ NʼAbaĩsraelĩ mobalangira omũbĩrĩ munene ogo Mwami Mukulu akola oko Banya Mĩsĩrĩ, nʼabandu mobubaha Omwami Mukulu; mobĩkĩrĩrya Omwami Mukulu nʼomugombe wuwe Musa.