Erĩlũayo 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekitiko-tiko kyʼomunani, Esyongĩke

¹ Neryo Omwami Mukulu mwabwira Musa ati, Ugende omwa Farao; kusangwa nabĩrĩkalya omutima wuwe, nʼomutima wʼabagombe buwe, inatoka erĩkangya ebiminyikalo byage omo katĩkatĩ kabo,

² nawe iwatoka erĩbũgĩra omo matwĩ wʼomugala wawe, nʼomwitsikulu wawe, emyatsi eyo nabirikola eMĩsĩrĩ, nʼebiminyikalo ebyo nabirikola omo katĩkatĩ kabo; imwatoka eriminya ngoko ĩngye indi Mwami Mukulu.

³ Neryo Musa na Harũnĩ mobingira ewa Farao, mobamubwira bati, Omwami Mukulu Nyamuhanga wʼAbaebrania akabũga, ati, Wasyakolyahi erigana erĩyĩkehya embere syage kwehĩ? Uleke abandu bagende banyikolere.

⁴ Bite bitya, wamaganira abandu bage erigenda, lebaya, omo ngyakya nasyaleta esyongĩke syʼoko mitano yawe;

⁵ nasyo syasyaswika obugali bwʼekihugo, isihali mundu wasyatoka erilangira ekitaka; nasyo syasyalya ebyalya ebyasĩgalira nʼebyabala ebyo mwasĩgala nabyo oko matwa, kandi syasyalya obuli muti owakalasa busana nenyũ omwʼirima.

⁶ Amanyũmba wawe nʼamanyũmba wʼabagombe bawe nʼamanyũmba wʼAbanya Mĩsĩrĩ bosĩ asyũsũlĩbwa; abotata wawe kutse aboso-kulu wawe ebyo bate batalolako, erĩtsũka ekiro babya omo kihugo nʼerĩhĩka mũnabwĩre. Neryo Musa mwabinduka, mwalũa embere sya Farao.

⁷ Nʼabagombe ba Farao mobamubwira bati, Omundu oyũ asyakolyahi eribya kitego ũkwʼĩtwe kwehĩ? Uleke abandu bagende, bakolere Omwami Mukulu Nyamuhanga wabo; suli wanaminya ngoko eMĩsĩrĩ yabĩrĩherĩbwa kwehĩ?

⁸ Neryo Musa na Harũnĩ mobaletwa uku Farao kandi; naye mwabwirabo ati, Mugende, mukolere Omwami Mukulu Nyamuhanga wenyũ; nĩkwa abakandisyagenda ni bahi kwehĩ

⁹ Neryo Musa mwabũga ati, Tukandigenda nʼabana betu nʼabasyakulu betu; nʼabagala betu, nʼabali betu, haguma nʼebĩhyo byetu, nʼebihangulo byetu; kusangwa litolere itwayirira Omwami Mukulu yʼekiro kikulu.

¹⁰ Naye mwabũga nabo ati, Ega Omwami Mukulu abye nenyũ, namabaleka mukagenda nʼabana benyũ; mũlebaye omwaga ali embere syenyũ.

¹¹ Lero iyihi, mugende lino Ĩnywe balume basa, mukolere Omwami Mukulu, kusangwa ko mukasonda mutya. Neryo mobahigwa embere sya Farao.

¹² Neryo Omwami Mukulu mwabũga na Musa ati, Sumbira ebyala byawe byʼendata oko kihugo kyʼeMĩsĩrĩ busana nʼesyongĩke, syase omo kihugo kyʼeMĩsĩrĩ, nʼerirya obuli mwaka omo kihugo owasĩgalira oko matwa.

¹³ Na Musa mwasumbira omũtso wuwe oko kihugo kyʼeMĩsĩrĩ, neryo Omwami Mukulu mwaleta erihunga oko kihugo omo musibo gosĩ oyo nʼomo kiro kyosĩ, neryo bwabere bwabikya, erihunga lyʼendata molyaleta esyongĩke.

¹⁴ Nʼesyongĩke mosyabya endata wʼekihugo kyʼeMĩsĩrĩ, mosyĩkala oko mitano yosĩ yʼeMĩsĩrĩ; syabya nyibi kutsibu; sihehatabya esyongĩke esiri ngʼesyo kutse enyũma sihendisyabya esiri ngasyo.

¹⁵ Kusangwa mosyaswika obugali bwʼekihugo kyosĩ, nʼekihugo mokyabya mʼomwĩrĩmya; kandi mosyalya emyaka yosĩ yʼekitaka, nʼebĩgũma byosĩ byʼemiti ebyo amatwa asĩga; mohatasĩgala ekiti nʼekiguma ekibisi, kutse omuti, kutse Omwaka omwʼirima, omo kihugo kyosĩ kyʼeMĩsĩrĩ.

¹⁶ Neryo Farao mwabirikira Musa na Harũnĩ bo lũba; mwabũga ati, Nabĩrĩhalya oko Mwami Mukulu, Nyamuhanga wenyũ, nʼũkwʼĩnywe.

¹⁷ Ngakũbũlaya lino, unyibuyire ekibi kyage engendo nguma eyĩ nyisa, nʼerisaba Omwami Mukulu Nyamuhanga wenyũ, ĩnĩandũsyako oluholo olũ lusa.

¹⁸ Neryo Musa mwalũa embere wa Farao, mwasaba Omwami Mukulu.

¹⁹ Neryo Omwami Mukulu mwabindula erihunga lyʼeyĩkwa erĩkalĩre kutsibu, molyatwala esyongĩke nʼerihiyirasyo omo Ngetsi yʼEngula; mohatasĩgalira engĩke nʼenguma omo mitano yosĩ yʼeMĩsĩrĩ.

²⁰ Nĩkwa Omwami Mukulu mwakalya omutima wa Farao, naye mwataleka abana ba Ĩsraelĩ erigenda.

Ekitiko-tiko kyʼomwenda, Omwĩrĩmya

²¹ Neryo Omwami Mukulu mwabwira Musa ati, Usumbe ebyala byawe erĩlolya byo elubula, omwĩrĩmya abye omo kihugo kyʼeMĩsĩrĩ, omwĩrĩmya owangatũlwako.

²² Na Musa mwasumba ebyala biwe erĩlolyabyo ebũtũkũ; neryo mohabya omwĩrĩmya wʼenyahĩnda oko biro bisatu omo kihugo kyosĩ kyʼeMĩsĩrĩ;

²³ mobatalangirana, kutse sihabya mundu oyo wahangana ahabya oko biro bisatu; nĩkwa Abaĩsraelĩ bosĩ ibane nʼekyakakala omo manyũmba wabo.

²⁴ Neryo Farao mwabirikira Musa ati, Mugende, mukolere Omwami Mukulu; nĩkwa esyombũlĩ syenyũ nʼesyonde sĩsĩgale; nʼabana benyũ bagende nenyũ.

²⁵ Neryo Musa mwabũga ati, Litolere iwatuha esyohongo nʼamahere awʼerĩokererya, itwatoka eriherera Omwami Mukulu, Nyamuhanga wetu.

²⁶ Tukandigenda nʼebihangulo byetu; sihendĩsyasĩgala ekigere nʼekiguma kusangwa litolere ĩtwĩmya ebyangakolwako busana nʼOmwami Mukulu Nyamuhanga wetu; Sĩtwasĩ ekitolere erikolera Omwami Mukulu mukyo erĩhĩka aho twasyahĩkĩrayo.

²⁷ Nĩkwa Omwami Mukulu mwakalya omutima wa Farao, mwatalekabo bakagenda.

²⁸ Neryo Farao mwabũga na Musa ati, Mũlũe eno, ehee! Susyeswalola oko bũsũ bwage; kusangwa ekiro ekyo wasyalola oko bũsũ bwage, wasyahola.

²⁹ Neryo Musa mwabũga ati, Wabĩrĩbũga ndeke, Sindiendisyaswalola oko bũsũ bwawe na kera.