Erĩlũayo 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Amalĩge wʼAbaĩsraelĩ eMĩsĩrĩ

¹ Aya wa mena wʼabagala ba Ĩsraelĩ, abahĩka eMĩsĩrĩ, obuli mundu nʼekĩtũnga kiwe abasa na Yakobo;

² Rũbenĩ, Sĩmeonĩ, Lawĩ, na Yũda,

³ Ĩsakarĩ, Zebũlũnĩ, na Benyamĩna,

⁴ Danĩ, na Nafũtalĩ, Gadĩ na Aserĩ.

⁵ Abandu bosĩ abalũa omo nda ya Yakobo babya bandu makũmĩ alinda; na Yosefũ iniabiritangirira eMĩsĩrĩ erĩmbere.

⁶ Neryo Yosefũ mwahola, nʼabagala babo bosĩ, nʼolulengo losĩ olo.

⁷ Nʼabana ba Ĩsraelĩ mobabuta-bũtanĩa, mobakanya kutsibu, nʼerikanyirira, mobabya nʼamaka kutsibu; kandi mobabuga-bugana omo kihugo ekyo.

⁸ Neryo eMĩsĩrĩ moyasinga Omwami muhya-muhya oyũtasĩ Yosefũ.

⁹ Naye mwabwira abandu buwe ati, Mũlebaye, abana ba Ĩsraelĩ bamabya bangi nʼabʼamaka kwilaba twe.

¹⁰ Mwase, tukolerebo menge, bakasyakanya, nʼenyũma wʼaho omugulu amalwa asyahuluka, ĩbayĩhĩra oko nzĩgũ syetu, ibalwa netu, neryo ĩbayĩlũsya omo kihugo ekĩ.

¹¹ Kyaleka ĩbahĩra abateya erĩagalyabo omo miheke yabo. Mobahĩmbĩra Farao emĩyĩ yʼebigona, ePĩtomo nʼeRamĩsesĩ.

¹² Nĩkwa ngʼolulengo bagalayabo ko banakanya batya nʼerikanyirira ehosĩ. Mobagalirwa busana nʼabandu ba Ĩsraelĩ.

¹³ Neryo Abanya Mĩsĩrĩ mobanũbya abana ba Ĩsraelĩ bo kutsibu;

¹⁴ mobayira engebe yabo ngʼendulu omo bukobe bũkalĩre, omo mĩbĩrĩ yʼembemba nʼamatafalĩ, nʼomo mĩsĩndo yosĩ yʼemĩbĩrĩ omo malima, nʼomo mĩbĩrĩ yosĩ, mobakolesyabo emĩbĩrĩ yĩkala-kalĩre.

Farao akasonda erĩĩta abana bʼobulume

¹⁵ Neryo Omwami wʼeMĩsĩrĩ mwabũga nʼabakayĩraya, bʼAbaebrania, erĩna lyʼomuguma lyabya Sĩfũra, nʼerĩna lyʼogundi iyo Pũa;

¹⁶ ati, Omugulu mukakola omũbĩrĩ wʼerĩyĩrya abakalĩ bʼAbaebrania mukalangirabo oko kĩtũmbĩ kyʼeributirako; omwana oyo amabya ali mwana wʼobulume ĩmwamwĩta; nĩkwa amabya ali wʼobũkalĩ, iniabyaho.

¹⁷ Nĩkwa abakayĩraya mobubaha Nyamuhanga, mobatakola ngoko mwami wʼeMĩsĩrĩ ahanabo, nĩkwa mobabalya abana bʼobulume.

¹⁸ Nʼomwami wʼeMĩsĩrĩ mwabirikira abakayĩraya, mwabwirabo ati, Busana nakĩ mwabirikola mutya, mwabĩrĩbalya abana bʼobulume?

¹⁹ Abakayĩraya mobabwira Farao bati, Kusangwa abakalĩ bʼAbaebrania sibali ngʼabakalĩ bʼAbanya Mĩsĩrĩ; kusangwa ni bʼakabebũlĩ, bakabuta oyũkayĩrayabo ĩsĩalĩahĩka kubo.

²⁰ Neryo Nyamuhanga mwakola abakayĩraya bo ndeke; nʼabandu mobakanya, mobabya nʼamaka.

²¹ Nʼenyũma wʼaho, kusangwa abakayĩraya ibakubaha Nyamuhanga, Nyamuhanga mwayirirabo ebĩtũnga.

²² Na Farao mwahana abandu buwe bosĩ ati, Obuli mwana wʼobulume oyukandisyabutwa, mwasyamugusa omo lũsĩ, nʼobuli mwana wʼobũkalĩ mwasya-mũbalya.