Eribisurirwa 9 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Neryo omũlaĩka wʼakatanu mwabuha engubi yiwe, neryo monalangira engũnũnũ eyalũa elubula nʼeritogera oko kihugo. Neryo engũnũnũ moyahabwa ekĩboholĩ kyʼobuhya obutawite kabuno.

² Nʼengũnũnũ moyalĩbũla obuhya obutawite kabuno, nʼomũkĩ mwalũamo, ngʼomũkĩ wʼerĩsĩngo lĩnene, nʼeryuba nʼekyanya mobyakĩna busana nʼomũkĩ owalũa omo buhya obo.

³ Neryo esyongĩke mosyalũa omo mũkĩ oyo, mosyahĩka omo kihugo. Nĩkwa esyongĩke mosyahabwa amaka ngʼesyonge syʼekihugo ko siwite amaka.

⁴ Nasyo mosyabwirwa sĩsĩtsandaye ebiti byʼekihugo, kutse ekindi kindu kibisi, kutse miti, nĩkwa sĩagalaye abandu abatawite ekiminyikalo kya Nyamuhanga oko mbũmo syabo.

⁵ Esyongĩke esĩ mositahabwa ehamũlĩ yʼerĩĩta abandu aba, nĩkwa erĩagalyabo emikera ĩtanu. Erigalwa lyabo lyabya ngʼerĩagalya lyʼenge omugulu ikaluma omundu.

⁶ Kandi oko biro ebyo, abandu basyasondya oluholo, nĩkwa sibendisyabanalo, kandi basyasonda-sonda erihola nĩkwa oluholo lwasyasagabo.

⁷ Esyongĩke esyo syabya sĩsosĩre esyosabayĩrĩ esĩyĩtegekenĩe oko malwa. Nʼoko mitwe yasyo habya ngʼesyombĩta syʼesyamagetsi, nʼobũsũ bwasyo bwabya ngʼobũsũ bwʼabandu.

⁸ Esyonzwiri syasyo syabya ngʼesyonzwiri syʼabakalĩ, nʼameno wasyo abya ngʼameno wʼesyondale.

⁹ Kandi syabya nʼamupa ngʼamupa wʼebyuma, nʼerihuha lyʼebĩpũpa byasyo lyabya ngʼemirenge yʼesyogalĩ syʼesyosabayĩrĩ esikatibita eyiri amalwa.

¹⁰ Kandi siwite emikira ngʼemikira yʼesyonge, nʼehisuti, kandi omo mikira yasyo siwite amaka wʼerĩagalya bandu oko mikera ĩtanu.

¹¹ Kandi siwite omwami Oyukatabala kusyo, yo mũlaĩka wʼobuhya. Erĩna liwe omo Kiebrania ni Abadonĩ, nʼomo Kĩgĩrĩkĩ ni Apolĩonĩ liti, Erihera.

¹² Obũlĩge bwʼerĩmbere bwabirilaba. Lebaya, enyũma wʼemyatsi eyĩ awandi malĩge abiri akahĩka.

¹³ Neryo omũlaĩka wʼendatu mwabuha engubi yiwe, neryo monowa omulenge akalũa oko mahembe ani wʼekiherero kyʼesyamagetsi ekiri embere sya Nyamuhanga.

¹⁴ Omulenge oyo mwabwira omũlaĩka owʼendatu, oyuwite engubi, ati, Ubohole abamalaĩka bani ababohere ahali olũsĩ lunene eFũratĩ.

¹⁵ Neryo abamalaĩka bani abo mobaboholwa. Babya ibabiritegekanĩbwa busana nʼendambĩ eno, yʼekiro kino, yʼomukera ono, nʼomwaka oyũ, busana nʼerĩĩta ekiguma kyʼomo bisatu kyʼabandu.

¹⁶ Kandi monowa emiganzo yʼemilondo yʼabandu abali oko syosabayĩrĩ babya emĩlĩonĩ magana abiri, (200,000,000).

¹⁷ Neryo omwʼilota monalangira esyosabayĩrĩ, nʼababya kusyo, ibambite amupa awasosĩre ngʼomuliro, ngʼamabwe wʼesamawĩ, kandi ngʼekirimi. Emitwe yʼesyosabayĩrĩ yabya ngʼemitwe yʼesyondale. Kandi omuliro, nʼomũkĩ, nʼekirimi mobyahuluka omo muno wasyo.

¹⁸ Neryo ekiguma kyʼomo bisatu kyʼabandu mobĩtwa omo malĩge asatu aya: omuliro, nʼomũkĩ, nʼobũsĩngo ebyahuluka omo muno wʼesyosabayĩrĩ.

¹⁹ Kusangwa amaka wʼesyosabayĩrĩ abya omo muno wasyo, nʼomo mikira yasyo. Kusangwa emikira yʼesyosabayĩrĩ iri ngʼesyonzoka, kandi iwite emitwe. Nĩkwa sĩkagalaya muyo mwʼabandu.

²⁰ Abandi bandu abasaka, abatĩtawa omo malĩge aya mobataleka ebindu ebyo bakokotaya. Kandi mobataleka erĩramya esyombĩnga, nʼesyosanamu syʼesyamagetsi, nʼesyosanamu syʼebĩtsĩpa, nʼesyʼomulinga, nʼesyʼamabwe, nʼesyʼemiti, esitetoka erilangira kutse erĩowa, kutse eribasula.

²¹ Kandi abandu abo mobatabindula emitima yabo bakaleka ebibi byabo byʼerĩĩta lyabo, kutse amalagu wabo, kutse erĩsĩngĩra lyabo, kutse obwĩbĩ bwabo.