Eribisurirwa 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Abandu 144,000 ba Ĩsraelĩ

¹ Enyũma wʼaho monalangira abamalaĩka bani ibanimene oko nũnga ĩnĩ syʼekihugo, ĩbakakakĩraya amahunga ani wʼekihugo, Sihabye erihunga erikabuhirira oko kihugo, kutse oko ngetsi, kutse oko miti yosĩ.

² Kandi monalangira ogundi mũlaĩka akalũa eyo eryuba likahuluka, iniawite ekĩbohĩ kya Nyamuhanga oyuliho. Neryo mwabirikira omo mulenge munene oko bamalaĩka bani ababirihamulwa na Nyamuhanga erĩagalya ekihugo nʼengetsi.

³ Omũlaĩka oyo mwabũga ati, Sĩmwagalaye ekihugo, kutse ngetsi, kutse miti, tute twahĩra ekiminyikalo oko mbũmo syʼabagombe ba Nyamuhanga wetu.

⁴ Kandi monowa emiganzo yʼabo abahĩrawa kwʼekiminyikalo, ni elfu ĩgana, nʼamakũmĩ ani nʼĩnĩ (144,000), bakalũa oko buli kihanda kyʼabana ba Ĩsraelĩ.

⁵ Oko kihanda kya Yũda habya elfu ĩkũmĩ nʼĩbĩrĩ (12,000) abasakawa kwʼekiminyikalo ekyo; nʼoko kihanda kya Rũbenĩ, elfu ĩkũmĩ nʼĩbĩrĩ (12,000), nʼoko kihanda kya Gadĩ, habya elfu ĩkũmĩ nʼĩbĩrĩ (12,000).

⁶ Nʼoko kihanda kya Aserĩ, elfu ĩkũmĩ nʼĩbĩrĩ (12,000), nʼoko kihanda kya Nafũtalĩ elfu ĩkũmĩ nʼĩbĩrĩ (12,000); nʼoko kihanda kya Manase, elfu ĩkũmĩ nʼĩbĩrĩ (12,000);

⁷ nʼoko kihanda kya Sĩmeonĩ, elfu ĩkũmĩ nʼĩbĩrĩ (12,000); nʼoko kihanda kya Lawĩ elfu ĩkũmĩ nʼĩbĩrĩ (12,000); nʼoko kihanda kya Ĩsakarĩ elfu ĩkũmĩ nʼĩbĩrĩ (12,000);

⁸ nʼoko kihanda kya Zebũlũnĩ, elfu ĩkũmĩ nʼĩbĩrĩ (12,000); nʼoko kihanda kya Yosefũ, elfu ĩkũmĩ nʼĩbĩrĩ (12,000); nʼoko kihanda kya Benyamĩna, elfu ĩkũmĩ nʼĩbĩrĩ (12,000).

Endeko nene

⁹ Enyũma wʼemyatsi eyĩ monalangira, neryo, lebaya, habya endeko nene, eyo mundu ate angatoka eriganza. Endeko eyĩ yalũa oko buli kĩtũnga, nʼebihanda byosĩ, nʼabandu bosĩ, nʼemĩbũge yosĩ. Babya bimene embere wʼekĩtũmbĩ kyʼobwami, nʼembere wʼEkyana kyʼEmbũlĩ, ibambite esyokanzu nyeru-nyeru, kandi ibawite oko mitahi yʼamabondo omo byala byabo.

¹⁰ Nabo mobabirikira omo mulenge munene bati, Erilama lyetu lĩkalũa uku Nyamuhanga wetu, oyo wĩkere oko kĩtũmbĩ kyʼobwami, kandi lĩkalũa oko Kyana kyʼEmbũlĩ!

¹¹ Nĩkwa abamalaĩka bosĩ babya bimene ĩbakatĩmba oko kĩtũmbĩ kyʼobwami, nʼoko bakulu, nʼoko bĩhangĩkĩrwe ebiriho bini. Neryo mobatũlama ahisi embere syʼekĩtũmbĩ kyʼobwami, mobaramya Nyamuhanga bati,

¹² Amina! omũyĩsa, nʼolukengerwa, nʼamenge, nʼewasĩngya, nʼerĩsĩkya, nʼobũtokĩ, nʼamaka, bibye uku Nyamuhanga wetu kera na kera! Amina!

¹³ Neryo omuguma gʼoko bakulu mwanyĩbũlya ati, Abambite esyongimba nyeru-nyeru aba, ni bahi, kandi bakalũa hayi kwehĩ?

¹⁴ Neryo monamubwira nyiti, Mukama wage, ũnasĩ. Neryo mwambwira ati, Aba ni bandu abakalũa omwʼendererya lĩnene, ĩbabĩrĩerya esyokanzu syabo nʼeriyirasyo mo nyeru-nyeru omo musasi wʼEkyana kyʼEmbũlĩ.

¹⁵ Busana nʼekyo bakahangana embere syʼekĩtũmbĩ kyʼobwami kya Nyamuhanga, kandi bakamukolera omo musibo nʼomo kiro omo Hekalũ yiwe. Nʼoyo wĩkere oko kĩtũmbĩ kyʼobwami asyĩkala omo katĩkatĩ kabo.

¹⁶ Kandi Sĩbendĩsyakwa enzala, kutse enyota, kutse eryuba, kutse erĩhũhana sibyendisyahĩsyabo.

¹⁷ Kusangwa, Ekyana kyʼEmbũlĩ oyuli omo katĩkatĩ kʼekĩtũmbĩ kyʼobwami, asyabya mũlĩsya wabo, kandi asyasondolabo oko syongũnũnũko syʼamagetsi wʼengebe; kandi Nyamuhanga asyasangula obuli mĩsonĩa oko meso wabo.