Eribisurirwa 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebĩbohĩ

¹ Neryo monalangira Ekyana kyʼEmbũlĩ kĩkatwũa ekiguma kyʼoko bĩbohĩ birinda, kandi monowa ekiguma kyʼebĩhangĩkĩre bini kĩkabũga omo mulenge wʼomũlũmo, kiti, Wase!

² Kandi monalangira, neryo lebaya, mohabya esabayĩrĩ nyeru-nyeru. Nʼoyo wĩkere kuyo iniawite oko buta, kandi mwahabwa embĩta. Nĩkwa mwahuluka ĩnĩakakĩnda, nʼerisingula,

³ Neryo Ekyana kyʼEmbũlĩ mokyatũa ekĩbohĩ kyʼakabiri, neryo monowa ekĩhangĩkĩre ekiriho kyʼakabiri kĩkabũga kiti, Wase!

⁴ Neryo eyindi sabayĩrĩ yʼolukulakula moyahuluka. Nĩkwa oyo wĩkere kuyo, mwahabwa amaka wʼerĩlũsya Obuholo oko kihugo, abandu bĩtane, kandi mwahabwa omũyalĩ munene.

⁵ Neryo Ekyana kyʼEmbũlĩ mokyatũa ekĩbohĩ kyʼakasatu, neryo monowa ekĩhangĩkĩre kyʼakasatu kĩkabũga kiti, Wase! Kandi monalangira, neryo lebaya, mohabya esabayĩrĩ eyĩkĩnĩre. Nʼoyo wĩkere kuyo iniawite olulengero omo byala biwe.

⁶ Kandi monowa owali nga mulenge omo katĩkatĩ kʼebĩhangĩkĩre ebiriho bini, ati, Akalengĩ kaguma kʼengano busana nʼesyofranka ĩkũmĩ, nʼotũlengĩ tusatu twʼekisusu busana nʼesyofranka ĩkũmĩ. Nĩkwa sĩmũtsandaye amagũta nʼebĩnyũ!

⁷ Neryo Ekyana kyʼEmbũlĩ mokyatũa ekĩbohĩ kyʼakani, neryo monowa omulenge wʼekĩhangĩkĩrwe ekiriho kyʼebini kiti, Wase!

⁸ Neryo monalangira, nĩkwa talebaya, habya esabayĩrĩ yʼekigondo. Nʼoyo wĩkere kuyo erĩna liwe iyo Luholo, nʼEkũlĩmũ moyakwamalo hakũhĩ. Nabo mobahabwa ehamũlĩ oko kiguma kyʼebini byʼekihugo, erĩĩta omo mũyalĩ, nʼomo nzala, nʼomo syondwala, nʼomo syonyama sĩkalĩre syʼekihugo.

⁹ Neryo Ekyana kyʼEmbũlĩ mokyatũa ekĩbohĩ kyʼakatanu. Neryo monalangira eyĩkwa oko kiherero ebĩrĩmũ byʼabandu abĩtawa busana nʼekĩnywa kya Nyamuhanga, kandi kusangwa batũla omwatsi wa Nyamuhanga.

¹⁰ Neryo mobabirikira nʼomulenge munene bati, Uwe Mukama, oyũbũyĩrĩre nʼowʼekwenene! Wasyalinda emigulu yingahi okwʼitswera nʼerĩkĩsya omusasi wetu ukwʼabo bĩkere omo kihugo kwehĩ?

¹¹ Neryo obuli mundu wa kubo mwahabwa ekanzu nyeru-nyeru kandi mobabwirwa baluhuke akandi katambĩ, eriganza lyʼabagombe balĩkyabo, nʼabagala babo abakandĩsyĩtwa ngabo, lyasyabya lyahĩkana.

¹² Neryo monalangira Ekyana kyʼEmbũlĩ kĩkatũa ekĩbohĩ kyʼendatu. Mohabya omũsĩkĩ munene, nʼeryuba molyakĩna ngʼolukimba lʼobweya olũkĩnĩre, nʼomukera gosĩ mwahinduka erisosa ngʼomusasi.

¹³ Nʼesyongũnũnũ syʼekyanya mosyatogera oko kitaka, ngʼomuti wʼomũtĩnĩ kwʼakatogaya ebĩgũma byago omo lihunga lĩkalĩre.

¹⁴ Nʼekyanya mokyasatika nʼerĩlũaho ngʼakaratasi akakalĩbawa. Nʼobuli kitwa, nʼobuli kitsira mobyalũsĩbwa omo myanya yabyo.

¹⁵ Neryo abami bʼekihugo, nʼabandu bakulu, nʼabandu abakasondola abasĩrĩkanĩ, nʼabandu bʼebindu, nʼesyombangĩ, nʼobuli mukobe, nʼobuli mundu wʼobwĩranda, mobayĩbĩsa omo myangalũ nʼomo katĩkatĩ kʼamabwe wʼebitwa.

¹⁶ Kandi mobabirikira oko bitwa nʼamabwe bati, Mututogereko, mũtũbĩse oko meso agʼoyo wĩkere oko kĩtũmbĩ kyʼobwami, nʼokwʼihitana lyʼEkyana kyʼEmbũlĩ!

¹⁷ Kusangwa ekiro kinene kyʼerihitana lyabo kyabĩrĩhĩka, kandi nindi wangatoka erihanganaho kwehĩ?