Eribisurirwa 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekitabu nʼEkyana kyʼembũlĩ

¹ Kandi monalangira ekitabu omo byala byʼamali byʼoyo wĩkere oko kĩtũmbĩ kyʼobwami. Ekitabu ekĩ Ĩkĩsakĩre oko syombande ĩbĩrĩ, omwisi nʼenyũma, kandi ĩkĩmatĩre omo bĩbohĩ birinda.

² Neryo monalangira omũlaĩka wʼamaka oyũkatũlago nʼomulenge munene ati, Nindi oyutolere erisanzula ekitabu nʼerĩtwa ebĩbohĩ byakyo kwehĩ?

³ Nĩkwa mohatabanika omo lubula kutse omo kihugo, kutse eyĩkwa oko kihugo, oyo wangatoka erisanzula ekĩtabu kutse erisamalira omwisi wakyo.

⁴ Neryo monalira kutsibu kusangwa mohatabanika oyutolere erisanzula ekitabu kutse erisamalira omwisi wakyo.

⁵ Nĩkwa omuguma gʼoko bakulu mwabũga nage ati, Uleke eririra, lebaya! Endale yʼekihanda kya Yũda, Omwitsikulu wa Dawĩdĩ, abĩrĩkĩnda, atoke erisanzula ekitabu, nʼerĩtwa ebĩbohĩ birinda.

⁶ Neryo monalangira Ekyana kyʼEmbũlĩ ekimene omo katĩkatĩ kʼekĩtũmbĩ kyʼobwami nʼerĩtĩmbwako nʼebĩhangĩkĩre bini ebiriho nʼabakulu. Ekyana kyʼEmbũlĩ ekyo kyabya nga kyabĩrĩĩtwa. Kandi kyabya kiwite amahembe alinda nʼameso alinda, awali Mĩrĩmũ irinda ya Nyamuhanga, eyatumawa omo kihugo kyosĩ.

⁷ Neryo Ekyana kyʼEmbũlĩ ekyo mokyasa, mokyĩmya ekitabu omo byala byʼoyo wĩkere oko kĩtũmbĩ kyʼobwami.

⁸ Neryo abere abihamba ekitabu, ebĩhangĩkĩre bini nʼabakulu amakũmĩ abiri nʼabani mobawa ahisi embere syʼEkyana kyʼEmbũlĩ. Obuli mundu abya awite enanga haguma nʼebibindi byʼesyamagetsi ĩbyoswĩre mwʼobukwa, nʼobukwa obo ni ʼsaba lyʼabandu ba Nyamuhanga.

⁹ Nabo mobimba Olwimbo luhya-luhya bati, Uwe utolere erihamba ekitabu Nʼerĩtwa ebĩbohĩ byakyo. Kusangwa wakerawa, kandi omo musasi wawe Mowagula abandu busana na Nyamuhanga, Omo buli kihanda, nʼobuli mũbũge, nʼobuli bandu, nʼobuli kĩtũnga.

¹⁰ Wabiriyirabo eribya bwami, nʼabahererĩ, erikolera Nyamuhanga wetu. Kandi, basyatabala muna-kihugo.

¹¹ Neryo monalangira, kandi monowa omulenge wʼabamalaĩka bangi, nʼeriganza lyabo lyabya elfu ĩkũmĩ 10,000, ngendo elfu ĩkũmĩ, 10,000 nʼamaelfu ngendo maelfu! Abamalaĩka mobahangana ĩbatĩmbĩre oko kĩtũmbĩ kyʼobwami, nʼoko bĩhangĩkĩre ebiriho, nʼoko bakulu.

¹² Abamalaĩka aba mobabũga nʼomulenge munene bati, Ekyana kyʼEmbũlĩ ekyakerawa kitolere Eriangirira obũtokĩ, nʼobuteke, nʼamenge, nʼamaka, Nʼerĩsĩkĩbwa, nʼolukengerwa, nʼeripipwa!

¹³ Neryo monowa obuli kindu ekyahangikawa ekiri omo lubula, nʼomo kihugo, nʼekiri eyĩkwa oko kihugo, nʼekiri omo ngetsi, nʼebindu byosĩ ebiriyo, biti, Ukwʼoyo wĩkere oko kĩtũmbĩ kyʼobwami, Nʼoko Kyana kyʼEmbũlĩ, Habye eripipwa, nʼerĩsĩkĩbwa, nʼolukengerwa, nʼobũtokĩ, Kera na kera!

¹⁴ Nʼebĩhangĩkĩre bini ebiriho, mobyabya bĩkabũga biti, Amina! Neryo abakulu mobatũlama ahisi, mobaramya.