Eribisurirwa 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩramya omo lubula

¹ Enyũma wʼemyatsi eyĩ, neryo lebaya, monalangira Olũyĩ lukingukere elubula. Nʼomulenge ogo nowa erĩmbere, owali ngʼomulenge wʼengubi akabũga nage, mwabũga ati, Wase endata eno, nage ngandĩkũkangya ebitolere ĩbyahĩka enyũma wʼemyatsi eyĩ.

² Neryo-neryo Omũlĩmũ mwambĩkako. Kandi lebaya, habya ekĩtũmbĩ kyʼobwami eyo elubula, kandi habya Oyo wĩkere oko kĩtũmbĩ kyʼobwami ekyo.

³ Nʼoyo wabya wĩkere kukyo abya akangabasenĩe ngʼerĩbwe lyʼeYaspĩ nʼerĩbwe lyʼeSardĩo. Kandi habya ekima ekĩsosĩre ngʼerĩbwe lyʼeZũmarĩdĩ ĩkĩtĩmbĩre oko kĩtũmbĩ ekyo kyʼobwami. Nʼerĩtĩmba oko kĩtũmbĩ kyʼobwami ekyo, habya ebindi bĩtũmbĩ byʼobwami amakũmĩ abiri nʼebini.

⁴ Nʼoko bĩtũmbĩ ebyo monalangira abakulu makũmĩ abiri nʼabani ĩbĩkereho, ibambite esyongimba nyeru-nyeru, nʼesyombĩta syʼesyamagetsi syabya oko mitwe yabo.

⁵ Neryo erĩpalya lyʼakarabyo, nʼemirenge, nʼemĩlũmo mobyalũa oko kĩtũmbĩ kyʼobwami ekyo. Kandi habya esyotala syʼomuliro esikaka embere syʼekĩtũmbĩ kyʼobwami. Esyotala esyo nĩ Mĩrĩmũ irinda ya Nyamuhanga.

⁶ Neryo embere wʼekĩtũmbĩ kyʼobwami habya ekĩsosĩre ngʼengetsi eyʼekiyo ngʼerĩbwe erilabangene mwʼameso. Kandi omo katĩkatĩ kʼekĩtũmbĩ kyʼobwami nʼerĩtĩmba kukyo habya ebĩhangĩkĩre bini ebyoswĩre nʼameso embere nʼenyũma.

⁷ Nʼekĩhangĩkĩre ekyʼerĩmbere kyabya kĩsosĩre endale, nʼekĩhangĩkĩre kyʼakabiri kyabya kĩsosĩre enyana, nʼekĩhangĩkĩre kyʼakasatu kyabya kiwite obũsũ ngʼobwʼomundu, nʼekĩhangĩkĩre kyʼakani kyabya kĩsosĩre erĩsamba erikaguluka.

⁸ Obuli ekĩhangĩkĩre oko bĩhangĩkĩre bini ebiriho ikiwite ebĩpũpa ndatu, nʼebĩhangĩkĩre ebĩ ĩbyoswĩre nʼameso ehosĩ nʼoko mbande syosĩ. Kandi omo musibo nʼomo kiro sĩbalĩũmbaya erĩbũga bati, Omukama Nyamuhanga, Omũtokĩ Wʼebyosĩ, Abũyĩrĩre, abũyĩrĩre, abũyĩrĩre, Oyutula, nʼoyuliho, nʼoyukandisyasa.

⁹ Nʼomugulu ebĩhangĩkĩre ebiriho bini bikaha olukengerwa, nʼerĩsĩkya, nʼewasĩngya oko yo wĩkere oko kĩtũmbĩ kyʼobwami, nʼoko yukakota kera na kera,

¹⁰ abakulu amakũmĩ abiri nʼabani bakatũlama embere syʼoyo wĩkere oko kĩtũmbĩ kyʼobwami, kandi bakaramaya oyukakota kera na kera. Kandi bakagusa esyombĩta syabo embere wʼekĩtũmbĩ kyʼobwami ekyo, bati,

¹¹ Omukama wetu na Nyamuhanga wetu! Uwe utolere eribana olukengerwa, nʼerĩsĩkya, nʼobũtokĩ, Kusangwa wahangika ebindu byosĩ, Kandi busana nʼerisonda lyawe mobyabyaho kandi mobyahangikwa.