Eribisurirwa 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwatsi oko kanĩsa yʼeSardĩ

¹ Kandi Usake oko mũlaĩka wʼekanĩsa yʼeSardĩ uti: Oyuwite Emĩrĩmũ irinda ya Nyamuhanga nʼesyongũnũnũ sirinda, akabũga ebĩnywa ebĩ ati, Nyĩnasĩ emĩbĩrĩ yawe, kandi nyĩnasĩ ambu uneho, nĩkwa ĩgũholĩre!

² Ubuke, Ũsĩkaye emyatsi eyĩkĩsĩya, eyikasonda erihola. Kusangwa namabana emĩbĩrĩ yawe sĩrĩtahĩkana omo meso wa Nyamuhanga wage.

³ Neryo Wibuke ebyo wangirira, nʼebyo wowa, neryo ukwamebyo, ubindule omutima wawe uleke ebibi. Nĩkwa wamatindabuka, nasyakũhĩkako ngʼomũrahĩ, isiwendisyaminya endambĩ nasyakũhĩkako.

⁴ Nĩkwa munawite abandu bake eSardĩ, abatatsandĩrye esyongimba syabo. Aba basyalendera nage omo syongimba nyeru-nyeru, kusangwa batolere.

⁵ Oyũkakĩnda asyambalĩbwa esyongimba nyeru-nyeru, kandi sindiendisyasangula erĩna liwe omo kitabu kyʼengebe. Nasyakangya erĩna liwe embere sya Tata wage, nʼabamalaĩka buwe.

⁶ Oyuwite amatwĩ, owe ebyo Mũlĩmũ akabũga nʼesyokanĩsa.

Omwatsi oko kanĩsa yʼeFĩladelfĩa

⁷ Usake oko mũlaĩka wʼekanĩsa yʼeFĩladelfia, uti, Oyuli mũbũyĩrĩre, nʼoyuli kwenene, oyuwite ekifungulo kya Dawĩdĩ, nʼoyukakingula, isihali oyo wasyakingaho, nʼoyukakinga, isihali omundu oyukakingula, akabũga ebĩnywa ebĩ ati,

⁸ Nyĩnasĩ emĩbĩrĩ yawe. Lebaya, nabĩrĩhĩra embere syawe Olũyĩ lũkĩngwĩre, isihali mundu wangatoka erikingalo, kusangwa uwite amaka make, kandi wabĩrĩteya ekĩnywa kyage, isulitagana erĩna lyage.

⁹ Lebaya! Endeko eyo ye nyũmba yʼerĩhĩndanamo ya Satanĩ, ababehĩ abo, abakayahula mo Bayũda, nĩkwa isibo, lebaya, nasyaleka ibasa nʼerĩũnama nʼerĩramya embere syʼebisando byawe, baminye ko nyĩkwanzĩre.

¹⁰ Kusangwa wabĩrĩteya ekĩnywa kyʼeriyitsingirira lyage, nage nasyakũteya oko ndambĩ yʼerirengwako, kandi nasyakũteya nibya oko ndambĩ eyikandisyasa oko kihugo kyosĩ, erirenga bandu bosĩ abĩkere omo kihugo.

¹¹ Ngandiasa lũba! Muhambe ndeke ebyo muwiteko, Sihabye omundu oyukahũnga embĩta yawe.

¹² Oyukakinda, nasyamuyira mo ndũyĩ yʼomo Hekalũ ya Nyamuhanga wage, kandi isiendĩsyalũamo kera na kera. Kandi nasyamusaka kwʼerĩna lya Nyamuhanga wage, nʼerĩna lyʼomũyĩ wa Nyamuhanga wage, go mũyĩ wʼeYerũsalema muhya-muhya, owakandisyandagala akalũa elubula uku Nyamuhanga wage. Kandi nasyamusakako erĩna lyage lihya-lihya.

¹³ Oyuwite amatwĩ, owe ebyo Mũlĩmũ akabũga nʼesyokanĩsa!

Omwatsi oko kanĩsa yʼeLaodĩkĩa

¹⁴ Usake oko mũlaĩka wʼekanĩsa yʼeLaodĩkĩa, uti: Amina oyo, Omũlangĩrĩ oyuteregula nʼowʼekwenene, Enzũko yʼerihangika lya Nyamuhanga, akabũga ebĩnywa ebĩ ati,

¹⁵ Nyĩnasĩ emĩbĩrĩ yawe, nyĩnasĩ sĩgũhũhĩrĩre, kutse sĩgũhũhene. Kumbe gũhũhĩrĩre kutse kumbe gũhũhene!

¹⁶ Neryo kusangwa uli kange-kange, ĩsĩgũhũhene, kutse ĩsĩgũhũhĩrĩre, nasyakũgũmũla omo buno bwage!

¹⁷ Kusangwa ũkabũga uti, Nyiwite ebindu, nabiribya muteke, sihali ekyo ngabula. Sĩwasĩ kʼuli muhanya, nʼowʼobũlĩge, nʼomwera, nʼendĩma-tĩme nʼendũmbũ.

¹⁸ Neryo ngakuhana unguleko esyamagetsi, esyabĩrĩlabĩbwa omo muliro, iwatoka eribya muteke. Ugule nibya esyongimba nyeru-nyeru, iwatoka eriambalasyo, nʼesĩsonĩ syʼendũmbũ yawe isitaminyikala. Kandi Ugule amagũta wʼameso awʼerĩsĩgĩsa omo meso wawe, iwatoka erilangira.

¹⁹ Ngakunga nʼerisuyira abosĩ abo nyanzĩre. Neryo ubye nʼomũhwa, ubindule omutima wawe erireka ebibi.

²⁰ Lebaya! Nyinimene oko lũyĩ nʼerikongota; omundu amowa omulenge wage, akakingula Olũyĩ, nasyingira omo nyũmba yiwe, nasyalya haguma naye, naye asyalya haguma nage.

²¹ Oyũkakĩnda, nasyamuha ehamũlĩ erĩĩkala haguma nage oko kĩtũmbĩ kyage kyʼobwami, ngoko nĩkala haguma na Tata wage oko kĩtũmbĩ kiwe kyʼobwami.

²² Oyuwite amatwĩ wʼerĩowa, owe ebyo Mũlĩmũ akabũga nʼesyokanĩsa.