Eribisurirwa 22 - AMASAKO ABOYTRTRE WA NYAMUHANGA AWAKAHULAWA MO BIBLIA

Olũsĩ lwʼengebe nʼomuti wʼengebe

¹ Kandi omũlaĩka mwanyĩkangya olũsĩ lwʼamagetsi wʼengebe, olũkangabasenĩe ngʼekiyo, olukahuluka omo kĩtũmbĩ kyʼobwami kya Nyamuhanga, nʼekyʼEkyana kyʼEmbũlĩ,

² kandi olũsĩ lukasenda omo katĩkatĩ kʼenzira yʼomũyĩ. Nʼoko mĩsĩke ĩbĩrĩ yʼolũsĩ olo habya omuti wʼengebe, Owakahetaya ebĩgũma mĩsĩndo ĩkũmĩ nʼĩbĩrĩ. Omuti oyo akahetaya ebĩgũma byago obuli mukera, nʼebikoma byʼomuti oyo nĩ byʼerĩlamya ebihanda.

³ Kandi Sihendisyaswabya eritakira omo mũyĩ oyo. Ekĩtũmbĩ kyʼobwami kya Nyamuhanga nʼekyʼEkyana kyʼEmbũlĩ kyasyabya omo mũyĩ oyo, nʼabagombe buwe basyamũramya.

⁴ Basyalola oko bũsũ buwe, nʼerĩna liwe lyasyabya oko mbũmo syabo.

⁵ Neryo sĩbwendĩsyĩra kandi eyo, kandi sibendisyabya nʼobwaga bwʼekyakakala kyʼetala, kutse ekyakakala kyʼeryuba, kusangwa Omukama Nyamuhanga asyakoleryabo, basyatabala kera na kera.

Erĩhĩka lya Yesu

⁶ Neryo omũlaĩka mwambwira ati, Ebĩnywa ebĩ ni byʼeriyiketerwa, kandi ni byʼekwenene. Omukama Nyamuhanga, oyukaha Omũlĩmũ wuwe oko bamĩnyererĩ, mwatuma omũlaĩka wuwe erĩkangya abagombe buwe emyatsi eyĩkandĩsyahĩka lũba.

⁷ Neryo Yesu ati, Lebaya! Ngasa lũba! Obutseme buli oko bakategaya ebĩnywa byʼeriminyerera byʼekitabu ekĩ!

⁸ Neryo nĩ ngye Yoane, oyo wowa nʼerilangira emyatsi eyĩ. Kandi omugulu nowa nʼerilangira emyatsi eyĩ, monatũlama ahisi hakũhĩ nʼebisando byʼomũlaĩka oyo wanyĩkangaya emyatsi eyĩ, erĩmũramya.

⁹ Nĩkwa mwambwira ati, Sukole utya! Ĩngye indi mugombe mũlĩkyenyũ nʼoko bagala benyũ abamĩnyererĩ, nʼoko bosĩ abo bakakwama ebĩnywa byʼekitabu ekĩ. Ũramaye Nyamuhanga!

¹⁰ Neryo mwambwira ati, Subohe ebĩnywa byʼeriminyerera byʼekitabu ekĩ, kusangwa endambĩ iri hakũhĩ yʼeribererera lyʼemyatsi eyĩ.

¹¹ Oyukakola nabi, akole nabi; nʼoyũtĩsĩrĩre, ayĩtsandaye; nʼoyutunganene, akole ebitunganene, nʼoyuli mũbũyĩrĩre, ayĩtegaye abye mũbũyĩrĩre.

¹² Kandi Yesu ati, Lebaya! Ngasa lũba! Nasyaleta ebihembo byage haguma nage, eririha obuli mundu ngoko abirikola.

¹³ Ĩngye indi Alfa na Omega, owʼerĩmbere, nʼowʼenyũma, enzũko nʼendũlĩ.

¹⁴ Obutseme buli ukwʼabo abakeraya esyokanzu syabo ibatoka eribya nʼehamũlĩ oko muti wʼengebe, nʼehamũlĩ yʼerilaba omo syongyo syʼomũyĩ oyo.

¹⁵ Nĩkwa eyĩhya oko mũyĩ hali esyombwa, nʼabakũmũ, nʼabasĩngĩrĩ, nʼabĩtĩ, nʼabakasaba esyosanamu, nʼabosĩ abakabiha, nʼabakakola ebyʼamabehĩ.

¹⁶ Ĩngye Yesu nabirituma omũlaĩka wage nʼerĩbatũlĩra emyatsi eyĩ busana nʼesyokanĩsa. Ingye indi Mũlĩhĩ nʼomwana wʼekĩtũnga kya Dawĩdĩ. Ĩngye indi ngũnũnũ eyikaka omo ngyakya-ngyakya.

¹⁷ Omũlĩmũ, nʼomũherũkĩ, bakabũga bati, Mwase! Nʼoyũkowa akabũga ati, Mwase! Nʼoyũkwĩre enyota ase, nʼoyo wanzĩre, ĩmaye amagetsi wʼengebe butsira erigula.

Eribuga

¹⁸ Ĩngye Yoane, ngabwira abosĩ abakowa ebĩnywa byʼeriminyerera lyʼekitabu ekĩ nyiti, Omundu amatomeka kubyo kwʼebindi, Nyamuhanga asyamutomeka kwamalĩge awasakĩre omo kitabu ekĩ.

¹⁹ Kandi omundu amalũsya oko bĩnywa byʼekitabu kyʼeriminyerera erĩ, Nyamuhanga asyalũsya ekihande kiwe oko muti wʼengebe, nʼekihande kiwe oko mũyĩ abũyĩrĩre, ebĩsakĩre omo kitabu ekĩ.

²⁰ Oyũkatũla emyatsi eyĩ ati, Ega! Ngasa lũba! Amina! Omukama Yesu, wase!

²¹ Olukogo lwʼOmukama Yesu lubye nenyũ ĩnywe bosĩ. Amina.