Eribisurirwa 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Emyaka elfu nguma

¹ Neryo monalangira omũlaĩka akandagala akalũa elubula, iniawite ekifungulo kyʼobuhya, nʼobuhulula bunene omo byala biwe.

² Neryo mwatsimba ekiyoka ekyo, enzoka eyo ya kera, oyuli Dĩabolo nʼeSatanĩ, neryo mwabohayo oko myaka elfu nguma (1,000).

³ Kandi mwagusayo omo buhya obutawite kabuno, neryo mwalĩba obuhya obo nʼerĩhĩra kubo kwʼomuwato, siyitebe ebihanda kandi erĩhĩka aho emyaka elfu nguma (1,000) ikahwera. Enyũma wʼemyatsi eyĩ yasyaboholwa katambĩ kake.

⁴ Neryo monalangira ebĩtũmbĩ byʼobwami, nʼababya bĩkere kubyo, kandi, mobahabwa ehamũlĩ yʼeritswera. Monalangira nibya ebĩrĩmũ byʼabandu abatwĩbawa kwʼemitwe busana nʼerĩtũla omwatsi wa Yesu, kandi busana nʼekĩnywa kya Nyamuhanga. Mobataramya enyama eyo kutse esanamu eyo, kandi mobatahĩrwa kwʼolusako lwʼenyama eyo oko mbũmo syabo kutse oko byala byabo. Mobasuba nʼeribyaho nʼeritabala haguma na Kristo emyaka elfu nguma (1,000).

⁵ Abandi baholĩ mobatasuba erĩhĩka aho emyaka elfu nguma (1,000) iteyahwa. Erĩ nĩ ʼlũbũka lyʼerĩmbere.

⁶ Omundu Oyukasangira omwʼĩlũbũka lyʼerĩmbere ni wʼobutseme kandi abiritsumulwa kutsibu. Oluholo lwʼakabiri silukiri nʼobũtokĩ kubo, nĩkwa basyabya bahererĩ ba Nyamuhanga na Kristo, kandi basyatabala haguma naye emyaka elfu nguma (1,000).

Erĩkĩndwa lya Satanĩ

⁷ Neryo emyaka elfu nguma yamabihwa, Satanĩ yasyaboholwa omo mũlĩkĩ wayo.

⁸ Neryo yasyahuluka eriteba ebihanda ebiri omo kihugo kyosĩ, byo Gogĩ na Magogĩ. Satanĩ yasyahĩndanĩabyo omo malwa; emiganzo yabo iri ngʼomusege wʼomo ngetsi.

⁹ Mobayisanza omo kihugo, nʼerĩtĩmba oko kilaliriro kyʼabandu ba Nyamuhanga, nʼomũyĩ owanzĩrwe. Nĩkwa omuliro mwandagala akalũa elubula nʼerĩtogotyabo.

¹⁰ Neryo Dĩabolo oyo watebabo mwaguswa omo ngetsi yʼomuliro nʼobũsĩngo, aho enyama eyo nʼomũmĩnyererĩ wʼamabehĩ bagusawa; basyagalwa omo musibo nʼomo kiro kera na kera.

Eritswera lyʼenyũma-nyũma

¹¹ Neryo monalangira ekĩtũmbĩ kyʼobwami kinene kyeru-kyeru, nʼoyo wĩkere kukyo. Neryo ekihugo nʼolubula mobyasaga obũsũ buwe, kandi omwanya mwataswabanika busana nabyo.

¹² Kandi monalangira abaholĩ, abakulu-bakulu nʼabake-bake, ibahangene embere wʼekĩtũmbĩ kyʼobwami; nʼebitabu mobyasanzulwa. Nʼekindi kitabu mokyasanzulwa, kye kitabu kyʼengebe. Neryo abaholĩ mobatswerwa omo myatsi eyĩsakĩre omo bitabu ngoko emĩbĩrĩ yabo yabya.

¹³ Neryo engetsi moyahũlũkya abaholĩ ababya muyo. Nʼoluholo nʼEkũlĩmũ mobyahũlũkya abaholĩ ababya mubyo. Kandi abosĩ mobatswerwa gʼemĩbĩrĩ yabo ko yabya.

¹⁴ Neryo oluholo nʼEkũlĩmũ mobyaguswa omo ngetsi yʼomuliro. Oluholo lwʼakabiri olũ, ye ngetsi yʼomuliro.

¹⁵ Kandi omundu oyutawite erĩna lĩsakĩre omo kitabu kyʼengebe, mwaguswa omo ngetsi yʼomuliro.