Eribisurirwa 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwatsi oko kanĩsa yʼeEfeso

¹ Usake oko mũlaĩka wʼekanĩsa yʼeEfeso uti: Oyũhambĩre esyongũnũnũ sirinda omo byala biwe byʼamali, nʼoyukalendera omo katĩkatĩ kʼemitagala irinda yʼesyamagetsi, akabũga ebĩnywa ebĩ ati,

² Nyĩnasĩ emĩbĩrĩ yawe, nʼerinuba lyawe, nʼeriyibombeka lyawe. Nyĩnasĩ ko gũterĩga abandu babi, kandi wabirirenga oko bandu abakayahula mo bakwenda, nĩkwa isi bakwenda, iwabiribanabo mo babehĩ.

³ Kandi ukayitsingirira ĩgũkayĩyĩnaya busana nʼerĩna lyage, isulitaluha.

⁴ Nĩkwa ngakukunga oko mwatsi muguma nyiti, Sũkĩnyanzĩre lino ngʼerĩmbere.

⁵ Wibuke aho watogera! Ubindule omutima, uleke ebibi byawe, Ukole ngoko wabya ukakola erĩmbere. Bite bitya, nasyakũhĩkako, ĩnalũsya omutagala wawe wʼaho wago, wamatindabindula omutima wawe nʼerireka ebibi byawe.

⁶ Nĩkwa ekiguma uli nakyo uti, ũkakwa obusu oko mĩbĩrĩ mibi yʼAbanĩkolayĩ, nage ngakwayo obusu nibya.

⁷ Oyuwite amatwĩ owe ebyo Mũlĩmũ akabwira esyokanĩsa! Oyũkakĩnda, nasyamuha ehamũlĩ yʼerirya oko bĩgũma byʼomuti wʼengebe, owakalasa omo Paradĩso, yʼeririma lya Nyamuhanga.

Omwatsi oko kanĩsa yʼeSmũrna

⁸ Kandi Usake oko mũlaĩka wʼekanĩsa yʼeSmũrna uti, Owʼerĩtsũka nʼowʼenyũma, oyo wahola, kandi abiriswabyaho, akabũga ebĩnywa ebĩ ati,

⁹ Nyĩnasĩ amalĩge wawe nʼobwera bwawe, nĩkwa uli wʼebindu. Nyĩnasĩ ebĩtsũmĩ byʼabakayahula mo Bayũda, nĩkwa isibo, nĩkwa ni bʼenyũmba yʼerĩhĩndana lyʼeSatanĩ.

¹⁰ Sigubahe ebĩkandĩsyakwagalya. Lebaya! Satanĩ ikasonda erigusa abandi bʼũkwʼĩnywe bʼomo mũlĩkĩ, mulengaweko, kandi mwasyagalwa ebiro ĩkũmĩ. Ubye nʼobutalegula erĩhĩka oko luholo, nage nasyakuha embĩta yʼengebe.

¹¹ Oyuwite amatwĩ owe ebyo Mũlĩmũ akabwira esyokanĩsa! Oyũkakĩnda siendĩsyahũtalĩbwa nʼoluholo lwʼakabiri.

Omwatsi oko kanĩsa yʼePergamo

¹² Kandi Usake oko mũlaĩka wʼekanĩsa yʼePergamo uti, Oyuwite omũyalĩ owatwĩre, owʼamoya abiri, akabũga ebĩnywa ebĩ ati,

¹³ Nyĩnasĩ aho wĩkere aho Satanĩ awite ekĩtũmbĩ kiwe kyʼobwami. Nyĩnasĩ ko gũkasĩma erĩna lyage, kandi sulitaleka erĩnyĩkĩrĩrya omo biro bya Antĩpa omũtũlĩ wʼomwatsi wage, omundu wage oyuteregula, oyo wĩtĩrawa omo katĩkatĩ kenyũ aho Satanĩ ĩkere.

¹⁴ Nĩkwa ngakukunga oko yindi myatsi mike, nyiti, uwite haguma nawe abakakwama erĩkangĩrĩrya lya Balama, oyo wakangĩrĩraya Balaka ngoko angaleka abandu ba Ĩsraelĩ erikola ebibi, balye akalyo akaherawa oko syosanamu, nʼerĩsĩngĩra.

¹⁵ Kandi, Unawite nʼabandi nibya abakakwama erĩkangĩrĩrya lyʼAbanĩkolayĩ.

¹⁶ Neryo ubindule omutima wawe uleke erikola ebibi! Bite bitya ngasyakũhĩkako lũba nʼerilwa nabo omo mũyalĩ wʼobuno bwage.

¹⁷ Oyuwite amatwĩ, owe ebyo Mũlĩmũ akabwira esyokanĩsa! Oyũkakĩnda, nasyamuha oko mana awabĩsĩre. Kandi nasyamuha erĩbwe lyeru-lyeru, erĩsakĩreko erĩna lihya-lihya, erĩtasĩbwe nʼomundu yo nʼoyukangiriralyo.

Omwatsi oko kanĩsa yʼeTũatera

¹⁸ Kandi Usake oko mũlaĩka wʼekanĩsa yʼeTũatera uti, Omugala wa Nyamuhanga, oyuwite ameso awasosĩre ebirimi byʼomuliro, nʼebisando biwe biringene nʼomulinga wʼenduku, akabũga ebĩnywa ebĩ ati,

¹⁹ Nyĩnasĩ emĩbĩrĩ yawe, nʼolwanzo lwawe, nʼerĩkĩrĩrya lyawe, nʼerikola lyawe, nʼeriyitsingirira lyawe. Kandi nyĩnasĩ ukakola lino kwilaba erĩmbere.

²⁰ Nĩkwa ngakukunga oko mwatsi oyũ nyiti, Ũkalĩga omũkalĩ oyo ye Yezebele oyukayahula mo mũmĩnyererĩ wʼobũkalĩ, kandi akakangĩrĩraya nʼerĩtalya abagombe bage erikola erĩsĩngĩra nʼerirya akalyo akakahererawa esyosanamu.

²¹ Nabirimuha omugulu wʼeribinduka nʼerireka ebibi biwe, nĩkwa sĩanzĩre eribinduka erireka erĩsĩngĩra liwe.

²² Lebaya! Nasyamugusa oko ngyingo aho, iye nʼabakasĩngĩra haguma naye basyagalwa omo malĩge manene, bamatindabinduka erireka ebibi bakola naye.

²³ Kandi nasyĩta abana buwe omo kasũsũ. Neryo esyokanĩsa syosĩ syasyaminya ko ndi oyukasonda-sonda amalengekanĩa nʼemitima. Nasyaha obuli mundu ũkwʼĩnywe ngʼemĩbĩrĩ yiwe ko yiri.

²⁴ Nĩkwa ngababwira, ĩnywe bandi, abali eTũatera, abatakwamĩrĩre erĩkangĩrĩrya erĩ, abatasĩ ebyo abandi bakahula erĩkũmbo lya Satanĩ erĩkalĩre, nyiti sindiendĩsyahĩra eyindi miheke ũkwʼĩnywe.

²⁵ Nĩkwa muhambe ndeke ebyo muwite erĩhĩka aho nasyasira.

²⁶ Nʼoyũkakĩnda nʼoyukakola emĩbĩrĩ yage erĩhĩka oko ndũlĩ, nasyamuha ehamũlĩ eritabala oko Bihanda.

²⁷ Kandi asyatabala kubo omo mũtso wʼekyuma, nʼeritulangabo mo bitswe-bitswe ngʼesyonyungu syʼomũbũmbĩ, ngoko nage nabirihamulwa na Tata wage.

²⁸ Kandi nasyamuha engũnũnũ yʼomo ngyakya-ngyakya.

²⁹ Oyuwite amatwĩ, owe ebyo Mũlĩmũ akabwira esyokanĩsa!