Eribisurirwa 18 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriwa lyʼeBabelĩ

¹ Enyũma wʼemyatsi eyĩ, monalangira ogundi mũlaĩka akandagala akalũa elubula. Abya awite ehamũlĩ nene, kandi obubuya buwe mobwakangabasanĩrya ekihugo kyosĩ.

² Neryo mwabirikira nʼomulenge munene ati, Babelĩ Mukulu abiritera! Amatera! Kandi abiribya obwĩkalo bwʼesyombĩnga, nʼahʼeritamba lyʼobuli kĩrĩmũ kĩtũnda-tũndĩre, nʼahʼerisiba lyʼobuli nyonyũ yĩtũnda-tũndĩre nʼeyikaponawa.

³ Kusangwa ebihanda byosĩ byabĩrĩpũlya ebĩnyũ byʼengumbu yʼerĩsĩngĩra lyago. Abami bʼekihugo babĩrĩsĩngĩrago, nʼabatũndĩ bʼekihugo babiribya bateke busana nʼesyongumbu syago.

⁴ Neryo monowa ogundi mulenge akalũa elubula ati, Abandu bage, mũlũe mugo! Simusangane omo bibi byago. Mukasyabana erisuyira lyago!

⁵ Kusangwa ebibi byago byabiritomengekana erĩhĩka elubula, Kandi Nyamuhanga abiryibuka amalolo wago.

⁶ Mulihego ngoko abiririha abandi, Kandi mulihego ngendo ĩbĩrĩ busana nʼemĩbĩrĩ yago. Mũsũlaye olũtehĩ lwago mwʼebyʼerĩpũlya ebĩkalĩre kabiri, Omo lũtehĩ olo abĩrĩtũlũnganĩa busana nenyũ.

⁷ Uhego eriagalwa, nʼeririra, Omo lulengo olo ayipipamo nʼeriyisanza. Kusangwa akabũga omo mutima wago, ati, Nyĩkere ngʼomugole wʼOmwami, Sindi mũkwakalĩ, Sindiendisyalira na kera!

⁸ Kikaleka amalĩge wago asyahĩka omo kiro kiguma: Akasũsũ, nʼobũlĩge, nʼenzala; Asyatogotĩbwa omo muliro. Kusangwa Omukama Nyamuhanga, oyukamutswera akalĩre.

⁹ Kandi abami bʼekihugo abasangĩre erĩsĩngĩra lyago nʼesyongumbu syago, basyalirirago, nʼerĩsũsũmanirago, omugulu bakalangira omũkĩ wʼerihya lyago.

¹⁰ Bakahangana hali, busana nʼeriubaha eriagalwa lyago, bati, Obũlĩge! obũlĩge! Babelĩ, omũyĩ mukulu, omũyĩ wʼamaka! Omo saa nguma eritswera lyawe lyamahĩka!

¹¹ Nʼabatũndĩ bʼekihugo bakalirirago nʼerĩsũsũmanirago, kusangwa sihali mundu oyukaswagula ebindu byabo.

¹² Sihali mundu oyukagula esyamagetsi syabo, nʼebĩtsĩpa byabo, nʼamabwe wʼobũgũlĩ bunene wabo, nʼesyolulu syabo, nʼekĩtanĩ ekĩbũyahĩre, nʼesyongimba syabo syʼomunyama, nʼesyongimba syʼeharĩrĩ, nʼesyongimba syʼolukula-kula; nʼemĩsĩndo yosĩ yʼemiti, ebikakumba ndeke, nʼemĩsĩndo yosĩ yʼebindu byʼameno wʼesyonzogũ, nʼebindu byosĩ byʼemiti yʼobũgũlĩ bunene, nʼebyʼomulinga, nʼebyʼebyuma, nʼebyʼamabwe ahenĩrye ndeke;

¹³ na dalasĩnĩ, na karafũ, nʼobukwa, nʼamanũkato, na ũbanĩ; nʼebĩnyũ, nʼamagũta wʼemĩzeĩtũnĩ, nʼeyĩsyano yʼenzelele, nʼengano nʼesyonde, nʼesyombũlĩ, nʼesyosabayĩrĩ, nʼesyogalĩ, nʼabakobe, nʼemitima yʼabandu.

¹⁴ Nʼebibuya ebyo wayĩtsũtsa byabĩrĩkũlũako, nʼobuteke bosĩ bwawe nʼebibuya byawe byabĩrĩkũlũako, nʼabandu sibendisyaswabanabyo kandi!

¹⁵ Nĩkwa abatũndĩ bʼebindu ebĩ, ababya bateke busana nago, basyahangana hali kusangwa bakubaha eriagalwa lyago. Basyalira nʼerĩsũsũmana,

¹⁶ bati, Obũlĩge, obũlĩge! Omũyĩ mukulu! Owabya akambala ekĩtanĩ kĩbũyĩrĩre, nʼolukimba lwʼomunyama, nʼolʼolukula-kula, nʼerĩyĩsũga omo syamagetsi, nʼamabwe wʼobũgũlĩ bunene, nʼesyolulu!

¹⁷ Kusangwa omo saa nguma abĩrĩtalya obuteke bosĩ obũ! Nʼobuli mukulu wʼobwato, nʼobuli mundu oyukalendera omo bwato, nʼoyukakola omũbĩrĩ omo bwato, nʼabosĩ abakatunda omo ngetsi, mobahangana ehali,

¹⁸ mobalaka omugulu balangira omũkĩ wʼerihya lyago bati, Omũyĩ wahi ali ngʼomũyĩ mukulu oyũ kwehĩ?

¹⁹ Neryo mobagusa olũtũtũ oko mitwe yabo, ibakalira, nʼerĩsũsũmana bati, Obũlĩge! obũlĩge! Omũyĩ mukulu! Oyũ nĩ mũyĩ aho abosĩ abawite amato omo ngetsi mobabya bateke busana nʼebindu byago! Nĩkwa omo saa nguma abĩrĩtalya ebyosĩ!

²⁰ Uwe lubula, utsemerego! Nʼinywe bandu ba Nyamuhanga, nʼabakwenda, nʼabamĩnyererĩ, mutsemerego! Kusangwa Nyamuhanga abiritswerago busana nenyũ.

²¹ Neryo omũlaĩka embangĩ mwatola erĩbwe ngʼoluso lunene mwagusalyo omo ngetsi ati, Litya omũyĩ munene go Babelĩ, asyaguswa ahisi omo mwaga, isiendisyaswabanika kandi.

²² Neryo omulenge wʼabawatĩ bʼesyonanga, nʼabĩmbĩ bʼesyonyimbo, nʼababũhĩ bʼamalenga, nʼababũhĩ bʼesyongubi, sĩbendĩsyaswogũbwa ewawe! Kandi sihali omunyima-nyima wʼomũbĩrĩ wʼamenge oyo wasyaswabanika ewawe kandi. Nʼomulenge wʼoluso sĩendĩsyaswogũbwa ewawe kandĩ!

²³ Kandi ekyakakala kyʼetala sikyendisyaswakolerya ewawe kandi; kandi omulenge wʼĩba wʼomũherũkĩ nʼomũherũkĩ sĩyendĩsyaswogũbwa kandi ewawe; kusangwa abatũndĩ bawe babya bandu bakulu bʼekihugo, kusangwa ebihanda byosĩ byatebĩbawa omo busaki buwe!

²⁴ Kusangwa omusasi wʼabamĩnyererĩ, nʼomusasi wʼabandu ba Nyamuhanga, nʼomusasi wʼabosĩ abĩtawa omo kihugo, mwabanika omo mũyĩ oyo.