Eribisurirwa 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũmalaya mukulu

¹ Nĩkwa omuguma wʼoko bamalaĩka balinda ababya nʼebibindi birinda mwambĩkako mwambwira ati, Wase hano, ngandĩkũkangya erisuyira lyʼomũmalaya mukulu gʼomũyĩ munene owahĩmbĩre hakũhĩ nʼesyonyũsĩ nyingi.

² Abami bʼekihugo mobasĩngĩra Omũmalaya mukulu oyo, nʼabandu abĩkere munakihugo mobakũnda omo bĩnyũ byʼerĩsĩngĩra liwe.

³ Neryo omũlaĩka mwanyitwala omo Mũlĩmũ omo mbwarara. Nʼeyo monalangira omũkalĩ ĩnĩanĩkere oko nyama nʼamena mangi wʼebĩtsũmĩ, kandi iyiwite emitwe irinda, nʼamahembe ĩkũmĩ.

⁴ Kandi omũkalĩ oyo abya ambite olukimba lʼomunyama nʼolukula-kula, inĩabĩrĩsũwa omo syamagetsi, nʼamabwe wʼobũgũlĩ bunene, nʼesyolulu. Nĩkwa abya awite omo byala biwe olũtehĩ lwʼesyamagetsi oloswĩre mwʼesyonye syʼemyatsi ĩtĩsĩrĩre yʼobũsĩngĩrĩ buwe.

⁵ Neryo oko mbũmo yiwe habya erĩna erĩsakĩre lyʼerĩkũmbo liti, Babelĩ Mukulu, nyĩnya wʼabamalaya, nʼowʼesyonye syʼekihugo.

⁶ Kandi monalangira omũkalĩ oyo, ĩnĩakũndĩre omo musasi wʼabandu ba Nyamuhanga, nʼomo musasi wʼabandu batũla omwatsi wa Yesu. Neryo omugulu namulangira monasweka kutsibu.

⁷ Neryo omũlaĩka mwanyĩbũlya ati, Ukasweka busana nakĩ kwehĩ? Ĩngye ngandikubwira erĩkũmbo lyʼomũkalĩ oyũ nʼeryʼenyama eyikamuheka, eyiwite emitwe irinda nʼamahembe ĩkũmĩ.

⁸ Enyama eyo walangira yabyaho, nĩkwa siriho lino, nĩkwa lino ikasonda erihetuka erĩlũa omo buhya, kandi ĩkayaherĩbawa. Abandu abĩkere oko kihugo amena wabo atasakĩre omo kitabu kyʼengebe, ekihugo kite kyatsũka, basyasweka omugulu bakasamalira enyama eyo. Kusangwa enyama eyo yanabyaho, nĩkwa sikiriho, kandi yasyaswabutuka.

⁹ Obũlengekanĩa obuwite amenge bobũ. Emitwe irinda ni bitwa birinda aho mũkalĩ ĩkere. Kandi ni bami balinda.

¹⁰ Abatanu babiritoga, omuguma akinatabala, nʼogundi sĩalĩahĩka; ekiro asyasa asyĩkala katambĩ kake kasa.

¹¹ Nʼenyama eyabyaho, kandi siriho, oyũ ni mwami wʼomunani, kandi ni wʼabalinda, naye akayaherĩbawa.

¹² Nʼamahembe ĩkũmĩ ago walangira, ni bami ĩkũmĩ, abate basinga, nĩkwa basyahabwa ehamũlĩ eritabala ngʼabami esaa nguma haguma nʼenyama eyo.

¹³ Abami ĩkũmĩ aba bawite erĩyĩsũnza liguma, kandi bakaha enyama eyo yʼobũtokĩ nʼehamũlĩ yabo.

¹⁴ Aba basyalwa nʼEkyana kyʼEmbũlĩ, nĩkwa Ekyana kyʼEmbũlĩ, haguma nʼabakamukwama, ababirikirawa buwe, nʼabayisogawa, nʼabateregula buwe, basyakĩndabo, kusangwa iye ni Mukama wʼabakama, nʼOmwami wʼabami.

¹⁵ Neryo omũlaĩka mwambwira ati, Amagetsi ago walangira, ago mũkalĩ mũmalaya ĩkereko, ni bandu, nʼesyondeko, nʼebihanda, nʼemĩbũge.

¹⁶ Kandi amahembe ĩkũmĩ walangira, nʼenyama eyo, aba basyakwa Omũmalaya oyo yʼobusu. Basyamũtũtũla, nʼerimuyira ndũmbũ. Kandi basyalya omubiri wuwe, neryo basyamutalikirira omo muliro.

¹⁷ Kusangwa Nyamuhanga mwahĩra omo mitima yabo erisonda erikola erĩyĩsũnza liwe, ibakabya nʼobũlengekanĩa buguma, nʼeriha obwami bwabo oko nyama eyo, erĩhĩka aho ebĩnywa bya Nyamuhanga byasyabererera.

¹⁸ Omũkalĩ oyo walangira nĩ mũyĩ mukulu owakatabala oko bami bʼekihugo.