Eribisurirwa 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũkalĩ nʼekiyoka

¹ Neryo ekitiko-tiko kinene mokyabutuka elubula. Habya omũkalĩ iniambite eryuba, nʼomukera abya eyĩkwa oko bisando biwe, nʼoko mutwe wuwe kwabya embĩta yʼesyongũnũnũ erĩkũmĩ nʼesĩbĩrĩ.

² Omũkalĩ oyo abya mukule, neryo mwalaka nʼerikunda iniakagalawa akabuta.

³ Neryo ekindi kitiko-tiko mokyabutuka elubula. Neryo lebaya! Habya ekiyoka kinene ekĩhenĩrye ngʼengula, ikiwite emitwe irinda, nʼamahembe ĩkũmĩ, nʼesyombĩta sirinda syabya oko mitwe yakyo.

⁴ Neryo omukira wakyo mwakumula ekiguma kyʼomo bisatu kyʼesyongũnũnũ syʼekyanya, neryo mokyagusasyo oko kihugo. Nĩkwa ekiyoka ekyo mokyahangana embere syʼomũkalĩ oyo wasonda eributa, kiti akandibya abibuta, ikyalya omwana.

⁵ Neryo omũkalĩ oyo mwabuta omwana wʼobulume oyo Wasyatabala oko Bihanda byosĩ omo mũtso wʼekyuma. Neryo omwana wuwe mwabatulirwa endata, uku Nyamuhanga, nʼoko kĩtũmbĩ kiwe kyʼobwami.

⁶ Nĩkwa omũkalĩ mwasagira omo mbwarara, aho Nyamuhanga akokotaya omwanya busana naye, aho asyalemberwa ebiro elfu nguma nʼamagana abiri nʼamakũmĩ ndatu (1,260).

⁷ Neryo mohahuluka amalwa elubula. Mĩkaelĩ nʼabamalaĩka buwe mobalwa nʼekiyoka ekyo. Nʼekiyoka ekyo nʼabamalaĩka bakyo mobalwa.

⁸ Neryo ekiyoka ekyo nʼabamalaĩka bakyo mobakĩndwa. Kandi mohataswabanika omwanya busana nabo elubula.

⁹ Kandi ekiyoka kinene ekyo mokyaguswa ahisi! Ekyo ni kiyoka kya kera ekikahulawa mo Dĩabolo nʼeSatanĩ, oyukateba ekihugo kyosĩ. Mokyaguswa ahisi oko kihugo, nʼabamalaĩka bakyo mobaguswa ahisi haguma nakyo.

¹⁰ Neryo monowa omulenge munene omo lubula ati, Lino erilama lya Nyamuhanga wetu lyabĩrĩhĩka! Lino obũtokĩ, nʼobwami bwa Nyamuhanga wetu, nʼehamũlĩ ya Kristo wuwe byabĩrĩhĩka! Kusangwa omũtsongerĩ wʼabalĩkyetu abiriguswa ahisi, Oyukahandikirira abalĩkyetu embere sya Nyamuhanga omo musibo nʼomo kiro.

¹¹ Kandi abalĩkyetu mobakĩnda Satanĩ omo musasi wʼEkyana kyʼembũlĩ kandi, kusangwa batũla omwatsi wa Nyamuhanga. Kandi mobatalanda oko ngebe yabo, mobalĩga erihola.

¹² Neryo busana nʼomwatsi oyũ, ĩnywe lubula, mutseme, nenyũ abĩkere omo lubula! Obũlĩge oko kihugo nʼoko ngetsi! Kusangwa Satanĩ yabiribandagalirako iniahitene kutsibu, kusangwa yasĩ ko yiwite katambĩ kake buyira.

¹³ Neryo ekiyoka kyabere kyalangira ko kyamaguswa ahisi oko kihugo, mokyendererya omũkalĩ oyo wabuta omwana wʼobulume.

¹⁴ Omũkalĩ oyo mwahabwa ebĩpũpa bibiri byʼerĩsamba ĩnene, atoke erigulukira omo mbwarara oko mwanya wuwe, aho asyalembererwa ndeke omo myaka ĩsatu nʼembindi, ahate erĩendererya lyʼekiyoka ekyo.

¹⁵ Neryo ekiyoka mokyũtĩra omũkalĩ oyo amagetsi ngʼolũsĩ olũkalũa omo buno bwakyo, kiti kĩkamusendaya omwʼigunga lyʼamagetsi.

¹⁶ Nĩkwa ekitaka mokyawatĩkya omũkalĩ oyo, mokyatanda obuno bwakyo, neryo ekitaka mokyanywa olũsĩ olo ekiyoka kyũtũla omo buno bwakyo.

¹⁷ Neryo ekiyoka ekyo mokyahitana oko mũkalĩ. Mokyayalwa nʼabandi bandu bʼolubuto lwʼomũkalĩ, ababya bakateya ebihano bya Nyamuhanga nʼabakwama erĩtũlago lya Yesu.

¹⁸ Neryo ekiyoka mokyahangana oko mũsĩke wʼengetsi.