Enzũko 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Noa amingira omo bwato

¹ Omwami Mukulu mwabwira Noa ati, Ingira uwe nʼekĩtũnga kyawe kyosĩ omo bwato, kusangwa nabirikulangira kʼutunganene embere syage omo lulengo Olũ.

² Oko buli nyama syosĩ syowene ũyĩmĩraye sirinda-sirinda, eyʼobulume nʼeyʼobũkalĩ. Oko syonyama sĩtowene ĩbĩrĩbĩrĩ, eyʼobulume nʼeyʼobũkalĩ.

³ Oko syonyonyũ nibya syʼomo kyanya, esirinda-sirinda, esyʼobulume nʼesyʼobũkalĩ, erĩteyasyo mo lubuto omo kihugo kyosĩ.

⁴ Kusangwa hakĩsĩya biro birinda ĩnawĩsya embũla oko kihugo ebiro makũmĩ anĩ omo musibo nʼomo kiro Obuli kindu ekiriho ekyo nabirihangika nasyaheryakyo oko bugali bwʼekitaka.

⁵ Neryo Noa mwakola ngoko Mwami Mukulu amuhana.

⁶ Neryo Noa abya wʼemyaka magana ndatu omugulu erigunga lyʼamagetsi lyahĩka oko kitaka,

⁷ Neryo Noa mwingira omo bwato, nʼabagala buwe, na mũkalĩwe, nʼabalĩana buwe, busana nʼerigunga lyʼamagetsi.

⁸ Oko syonyama syowene, esyonyama esĩtowene, esyonyonyũ, nʼobuli kindu ekikakululuka oko kitaka,

⁹ mosyingira omo bwato uku Noa ĩbĩrĩbĩrĩ, eyʼobulume nʼeyʼobũkalĩ, ngoko Nyamuhanga ahana Noa.

¹⁰ Neryo mokyabya enyũma wʼebiro birinda, erigunga lyʼamagetsi molyahĩka oko kihugo.

¹¹ Neryo oko mwaka wʼamagana ndatu wʼeribyaho lya Noa, oko mukera wʼakabiri, oko kiro kyʼerĩkũmĩ nʼebirinda kyʼomukera, oko kiro ekyo esĩsoko syosĩ syʼemitobero minene-minene mosyahũta, nʼebĩtũ byʼelubula mobyawĩsya embũla.

¹² Embũla moyawa oko kihugo ebiro makũmĩ ani omo musibo nʼomo kiro.

¹³ Oko kiro ekyo, Noa, Semũ, Hamũ, na Yafetĩ, bagala ba Noa, muka Noa, nʼabalĩana buwe basatu, mobingira omo bwato.

¹⁴ Ibo, nʼobuli nyama ngʼomuhanda wayo, nʼesyonyama syʼeka syosĩ ngʼomuhanda wasyo, nʼobuli kindu kikakululuka oko kitaka ngʼomuhanda wakyo, nʼobuli nyonyũ ngʼomuhanda wayo, obuli nyonyũ yʼobuli kihanda.

¹⁵ Mosyingira uku Noa omo bwato, ĩbĩrĩbĩrĩ yʼebihangikwa byosĩ eyabya nʼomuka wʼengebe.

¹⁶ Ebyingira mobyingira ebyʼobulume nʼebyʼobũkalĩ ebyʼebihanda byosi, ngoko Nyamuhanga amuhana. Neryo Omwami Mukulu mwamukingiramo.

¹⁷ Neryo erigunga lyʼamagetsi molyabya oko kihugo ebiro makũmĩ ani. Amagetsi mwakanya, mwaleretya obwato, mobwalereta endata oko kihugo.

¹⁸ Amagetsi mwabwaga, mwakanyirira kutsibu endata oko kihugo, nʼobwato mobwalendera oko magetsi.

¹⁹ Amagetsi mwabwaga kutsibu-tsibu endata oko kihugo, nʼebitwa biri-biri byosĩ ebyabya eyĩkwa oko bũtũkũ, ebyosĩ mobyakũnĩngĩrwa.

²⁰ Amagetsi mwabwaga metere saba oko buli bwʼendata, nʼebitwa mobyakũnĩngĩrwa.

²¹ Kandi ebihangikwa byosĩ mobyahola ebikagenda oko kihugo, esyonyonyũ, esyonde, nʼesyonyama, obuli kindu ekikakululuka oko kitaka, nʼobuli mundu.

²² Ebyosĩ ebyabya nʼomuka wʼekĩrimũ kyʼengebe omo nĩndo syabyo, nʼebyosĩ oko kitaka kyũmĩre, mobyahola.

²³ Litya Omwami Mukulu mwalĩma obuli kindu ekyabyaho oko kihugo, omundu, esyonde, ebindu ebikakululuka, nʼesyonyonyũ syʼomo kyanya, mobyasangulwa erĩlũa oko kihugo, nina Noa musa yo wanasĩgalira, nʼababya haguma naye omo bwato,

²⁴ Amagetsi mwabwaga oko kihugo ebiro erĩgana nʼamakũmĩ atanu.