Enzũko 50 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritabwa lya Yakobo

¹ Neryo Yosefũ mwawa oko bũsũ bwa tata wuwe, mwamulirirako, nʼerimulyatsirira.

² Na Yosefũ mwahana abagombe buwe abasaki, erĩhakabya tata wuwe yʼobũbalya ati siahonde. Neryo abasaki mobahakabya Ĩsraelĩ yʼobũbalya.

³ Mobakola batya ebiro makũmĩ ani busana naye. Kusangwa bahĩkereraya ebiro byʼerihakabya obũbalya. Abanya Mĩsĩrĩ mobamulira ebiro makũmĩ alinda.

⁴ Neryo omugulu ekiriro kyahwa, Yosefũ mwabwira ekĩtũnga kya Farao ati, Namabana erĩsĩmwa omo meso wenyũ, ngabũlaya, nyiti mubwire Farao muti,

⁵ Tata wage mwanyisema ati, Lebaya ngyono ngahola. Wasyanyita omwʼisinda eyo nayitakulira omo kihugo kyʼeKanana. Neryo lino ngakũbũlaya ũndĩgĩre nyihetuke nʼerita tata wage, nage nasyaswasa.

⁶ Na Farao mwabũga ati, Uhetuke, nʼeriyata tata wawe, ngoko akusema.

⁷ Neryo Yosefũ mwahetuka eriyata tata wuwe, nʼabagombe bosĩ ba Farao mobahetuka haguma naye, nʼabakulu bʼenyumba yiwe, nʼabakulu bosĩ bʼekihugo kyʼeMĩsĩrĩ,

⁸ nʼekĩtũnga kyosĩ kya Yosefũ, nʼabagala babo, nʼekihanda kya tata wuwe. Abana babo basa, nʼesyombũlĩ syabo nʼesyonde syabo, bo banabya basĩgere omo kihugo kyʼeGosenĩ.

⁹ Neryo esyogalĩ nʼababya oko syosabayĩrĩ mobahetuka haguma naye. Nabo babya mulondo munene.

¹⁰ Neryo mobahĩka oko kibuga kyʼerĩhũmbĩrako kyʼeAtadĩ, ekiri eyisirya wʼeYorodanĩ, mobaliriraho nʼekiriro kinene nʼekĩkalĩre. Neryo Yosefũ mwahĩra ekiriro kya tata wuwe ebiro birinda.

¹¹ Omugulu esyondũlanĩ syʼekihugo, Abanya Kanana, balangira ekiriro oko kibuga kyʼeAtadĩ, mobabũga bati, Ekĩ ni kiriro kitsibu ekyʼAbanya Mĩsĩrĩ. Neryo erĩna lyaho molyahulwa mo eBelĩMĩsũraĩmũ, ahali eyisirya wʼeYorodanĩ.

¹² Abagala ba Yakobo mobamukola ngoko anahanabo.

¹³ Kusangwa bagala buwe mobamuhekera omo kihugo kyʼeKanana mobamuta omo mwangalũ gʼomwʼirima lyʼeMakĩpela, ogo Abrahamũ agula haguma nʼeririma, eribya kitaka kyʼamahero, uku Efũronĩ Omũhĩtĩ, embere wʼeMamũrĩ.

¹⁴ Neryo Yosefũ mwasuba eMĩsĩrĩ, abita tata wuwe, iye, nʼabagala babo, nʼabosĩ abahetuka haguma naye eriyata tata wuwe.

¹⁵ Neryo omugulu abagala babo Yosefũ balangira ngoko tata wabo amabihola, mobabũga, bati, Kwamũhwa Yosefũ asyatũkwa obusu, asyatũkĩsĩryako ebibi byosĩ twamukolera.

¹⁶ Mobalayira uku Yosefũ, bati, Tata wawe mwahana embere wʼerihola liwe ati,

¹⁷ Mwasyabũga na Yosefũ muti, Ngakũbũlaya lino, ubuyire ekibi kyʼabagala benyũ, nʼerĩlolo lyabo, kusangwa bakukola nabi. Na lino, ngakusaba, ubuyire ekibi kyʼabagombe ba Nyamuhanga wa tata wawe. Na Yosefũ mwalira omugulu babũga naye.

¹⁸ Abagala babo mobayawa embere syʼobũsũ buwe. Mobabũga bati, Lebaya, ĩtwe tuli bagombe bawe.

¹⁹ Na Yosefũ mwasũbĩryabo ati, Simubahe, kusangwa ĩngye, indi omo mwanya wa Nyamuhanga kwehĩ?

²⁰ Kandi Ĩnywe mwaganĩraya eringola nabi, nĩkwa Nyamuhanga mwaganĩrya eribya bibuya erĩberererya omulamo busana nʼabandu bangi ngoko kiri mũnabwĩre.

²¹ Na lino simubahe. Ngandibalembera nʼabana benyũ. Neryo mwakĩranĩabo, mwabũga nabo ebibuya.

Erihola lya Yosefũ

²² Na Yosefũ mwĩkala eMĩsĩrĩ, iye, nʼekĩtũnga kya tata wuwe. Neryo Yosefũ mwakota emyaka erĩgana nʼerĩkũmĩ.

²³ Kandi Yosefũ mwalola oko bana ba Efũraĩmũ, nʼabana bʼabitsikulu buwe. Kandi mwalola nʼoko bana ba Makĩrĩ mugala wa Manase ababutirawa oko marwĩ wa Yosefũ.

²⁴ Neryo Yosefũ mwabũga nʼabagala babo ati, Nyĩkĩsĩya inahola, nĩkwa Nyamuhanga asyabateya, asyabahetũkya erĩlũa omo kihugo ekĩ eriya oko kihugo ekyo alahĩrĩraya Abrahamũ, na Ĩsaka, na Yakobo.

²⁵ Neryo Yosefũ mwasema abana ba Ĩsraelĩ, ati, Kwenene Nyamuhanga asyabateya, nenyũ mwasyaheka amakũha wage erĩlũsyago hano.

²⁶ Neryo Yosefũ mwahola, ini wʼemyaka erĩgana nʼerĩkũmĩ. Kandi mobamuhakabya obũbalya bati siahonde, neryo mobamũhĩra omo sandũkũ eMĩsĩrĩ.