Enzũko 47 - AMASAKO ABOYTRTRE WA NYAMUHANGA AWAKAHULAWA MO BIBLIA

Yakobo akahĩka emuliro wa Farao

¹ Neryo Yosefũ mwayabwira Farao ati, Tata wage nʼabagala betu, nʼesyombũlĩ syabo, nʼesyonde syabo, nʼebyosĩ bawite, babiriasa erĩlũa omo kihugo kyʼeKanana. Neryo lebaya, bali omo kihugo kyʼeGosenĩ.

² Neryo mwĩmya abandu batanu omo katĩkatĩ kʼabagala babo, mwayakangyabo Farao.

³ Na Farao mwabũlya bagala babo ati, Omũbĩrĩ wenyũ ni wahi kwehĩ? Nabo mobabwira Farao bati, Abagombe bawe nĩ balĩsya bʼesyombũlĩ, ĩtwe nʼabotata wetu.

⁴ Neryo mobabũga na Farao bati, Twamasa eribya babunga omo kihugo kino, kusangwa sihali obũlĩsĩryo busana nʼesyombũlĩ syʼabagombe bawe, kusangwa enzala ĩkalĩre omo kihugo kyʼeKanana. Neryo lino tũkakũbũlaya, Uleke abagombe bawe bĩkale omo kihugo kyʼeGosenĩ.

⁵ Na Farao mwabũga na Yosefũ ati, Tata wawe nʼabagala benyũ babĩrĩkũhĩkako.

⁶ Ekihugo kyʼeMĩsĩrĩ kiri embere syawe. Wĩkalaye tata wawe nʼabagala benyũ omo kihugo ekyowenenga. Bĩkale omo kihugo kyʼeGosenĩ, kandi wamabya ũnasĩ abandu bʼamenge omo katĩkatĩ kabo, uyirebo mo bakulu oko bihangulo byage.

⁷ Neryo Yosefũ mwaleta Yakobo ĩse wuwe, mwamũhĩra emuliro wa Farao. Yakobo mwatsumula Farao.

⁸ Neryo Farao mwabũlya Yakobo ati, Ebiro byʼemyaka yʼeribyaho lyawe ni bingahi kwehĩ?

⁹ Yakobo mwasũbĩrya Farao ati, Ebiro byʼemyaka yʼobubunga bwage ni myaka erĩgana nʼamakũmĩ asatu. Ebiro byʼemyaka yʼeribyaho lyage nina bike, kandi ni byʼobũlĩge, kandi sibiribyahĩka oko biro byʼemyaka yʼeribyaho lyʼabotata wage omo biro byʼobubunga bwabo.

¹⁰ Na Yakobo mwatsumula Farao, neryo mwalũa embere siwe.

¹¹ Neryo Yosefũ mwĩkalya tata wuwe nʼabagala babo, mwahabo ekitaka omo kihugo kyʼeMĩsĩrĩ, omo kihugo kyowenenga, omo kihugo kyʼeRamese, ngoko Farao ategeka.

¹² Na Yosefũ mwakuma ĩse wuwe nʼabagala babo, nʼekĩtũnga kyosĩ kya tata wuwe, omo kalyo ngʼeriganza lyʼabana babo ko bali.

Erikanya lyʼenzala omo kihugo

¹³ Kandi omo kihugo kyosĩ sihabya kalyo, kusangwa enzala moyakala kutsibu, kyaleka ekihugo kyʼeMĩsĩrĩ nʼekihugo kyʼeKanana ibyawira busana nʼenzala.

¹⁴ Neryo Yosefũ mwakuma-kuma esyofranka syosĩ esyabya omo kihugo kyʼeMĩsĩrĩ, nʼomo kihugo kyʼeKanana, busana nʼengano eyo bagula. Neryo Yosefũ mwaleta esyofranka syosĩ omo nyũmba ya Farao.

¹⁵ Neryo omugulu esyofranka syahwa omo kihugo kyʼeMĩsĩrĩ, nʼomo kihugo kyʼeKanana, Abanya Mĩsĩrĩ bosĩ mobasa uku Yosefũ bati, Utuhe akalyo, busana nakĩ tukandiholera embere syawe kwehĩ? Kusangwa esyofranka syetu syamatuhwera.

¹⁶ Na Yosefũ mwabũga ati, Esyofranka syamabula, mubane ebihangulo byenyũ, nage ngandibahako.

¹⁷ Neryo mobaleta esyonde syabo uku Yosefũ. Neryo Yosefũ mwahabo akalyo omo mwanya wʼesyosabayĩrĩ nʼesyombũlĩ, nʼesyonde, nʼesyopunda. Kandi mwalemberabo omo kalyo omo mwanya wʼebihangulo byabo byosĩ oko kirimo ekyo.

¹⁸ Omwaka oyo abere abihwa, mobamũhĩkako oko mwaka wʼakabiri, mobamubwira bati, Sĩtwendĩbĩsa oko mukama wetu ngoko syofranka syetu syamahwa esyosĩ. Ebihangulo byʼesyonde ni byʼomukama, sihali kindi kĩsĩgere embere wʼameso wʼomukama wetu, ye nʼemibiri yetu nʼebitaka byetu.

¹⁹ Busana nakĩ tuholere embere syʼameso wawe, ĩtwe nʼebitaka byetu kwehĩ? Utugule nʼekitaka kyetu oko kalyo, ĩtwe nʼebitaka byetu twasyabya bakobe ba Farao. Utuhe embuto, imotwabyaho, itutaswahola, nʼekitaka sikibye kĩma.

²⁰ Neryo Yosefũ mwagulira Farao yʼekitaka kyosĩ kyʼeMĩsĩrĩ. Kusangwa Abanya Mĩsĩrĩ mobagũlya obuli mundu olubibi luwe, kusangwa enzala moyakala kubo. Ekihugo mokyabya kya Farao.

²¹ Neryo mwahũmya abandu bʼomo mĩyĩ erĩlũa oko mutano muguma wʼeMĩsĩrĩ erĩhĩka oko gundi mutano wakyo.

²² Ekihugo kyʼabamĩnyererĩ kisa mwatagulakyo, kusangwa abamĩnyererĩ babya nʼamagabo uku Farao, ibakalya erĩgabo eryo Farao ahabo. Kyaleka ebihugo byabo ĩbĩtagũlĩbwa.

²³ Neryo Yosefũ mwabũga nʼabandu ati, Lebaya, nabiribagula mũnabwĩre nʼekitaka kyenyũ busana na Farao. Lebaya, esyombuto syenyũ syesĩ. Mwasyaherasyo omo kitaka.

²⁴ Neryo omugulu wʼerigesa mwasyaha Farao yʼengemu ekiguma kyʼebitanu, nʼotũlengĩ tuni twasyabya twenyũ, oko mbuto syʼamalima, nʼoko bana benyũ.

²⁵ Nabo mobabũga bati, Wabĩrĩlamya esyongebe syetu. Tubane eriganyira omo meso wʼomukama wetu, netu twasyabya bakobe ba Farao.

²⁶ Neryo Yosefũ mwahĩra amahano busana nʼebitaka byʼeMĩsĩrĩ erĩhĩka lino, Farao ĩmaye erĩgabo lyʼengemu yʼekiguma oko bitanu. Kye nʼekihugo kyʼabahererĩ kisa, mokitabya kya Farao.

²⁷ Neryo Ĩsraelĩ mwĩkala omo kihugo kyʼeMĩsĩrĩ, omo kihugo kyʼeGosenĩ. Aho bayitundira ebindu, mobabuta mobakanya kutsibu.

Yakobo akakanaya na Yosefũ

²⁸ Neryo Yakobo mwĩkala omo kihugo kyʼeMĩsĩrĩ mo myaka ĩkũmĩ nʼeyirinda. Neryo ebiro byʼemyaka yʼeribyaho lya Yakobo mobyabya myaka erĩgana nʼamakũmĩ ani nʼeyirinda.

²⁹ Neryo omugulu wʼerihola lya Ĩsraelĩ mwahĩka hakũhĩ. Mwabirikira mugala wuwe Yosefũ, mwamubwira ati, Kumbe namabana erĩsĩmwa omo meso wawe, ngakũbũlaya Ũhĩre ebyala byawe oko kihinga kyage, ungolere ekibuya nʼekwenene. Ngakũbũlaya susyenyita eMĩsĩrĩ.

³⁰ Nĩkwa omugulu ngayabana abotata-kulu wage, wasyambeka erĩlũa eMĩsĩrĩ, nʼerinyita omo mahero wabo. Neryo Yosefũ mwamũsũbĩrya ati, Nasyakola ngoko wamabĩbũga.

³¹ Nĩkwa Yakobo mwabũga ati Ũnyĩlahĩrayeko. Neryo mwamũlahĩryako. Neryo Ĩsraelĩ mũnamira oko musegemo wʼengyingo.