Enzũko 46 - AMASAKO ABOYTRTRE WA NYAMUHANGA AWAKAHULAWA MO BIBLIA

Yakobo nʼekihanda kiwe bakaya eMĩsĩrĩ

¹ Neryo Ĩsraelĩ mwahongoka haguma nʼebyosĩ abya nabyo, mwahĩka eBerĩ-seba, mwahera amahere uku Nyamuhanga wa tata wuwe Ĩsaka.

² Na Nyamuhanga mwabũga na Ĩsraelĩ omwʼilota omo kiro ati, Yakobo, Yakobo, naye mwabũga ati, Nandi hano.

³ Neryo mwabũga ati, Ĩngye indi Nyamuhanga, Nyamuhanga wa tata wawe, Sigubahe eriandagalira eMĩsĩrĩ, kusangwa eyo nasyakuyira mo kihanda kinene.

⁴ Nasyandagala haguma nawe eMĩsĩrĩ, kwenene nasyakũhetũkya kandi. Yosefũ asyahĩra ebyala biwe oko meso wawe.

⁵ Neryo Yakobo mwahangana erĩlũa eBerĩ-seba. Abagala ba Ĩsraelĩ mobaheka Yakobo tata wabo, nʼabana babo, nʼabakalĩ babo, oko syogalĩ esyo Farao atuma erimuheka.

⁶ Mobatwala nʼesyonyama syabo, nʼebindu byabo ebyo babana omo kihugo kyʼeKanana, mobaya eMĩsĩrĩ, ye Yakobo, nʼabana buwe bosĩ haguma naye,

⁷ abagala buwe, nʼabitsikulu buwe, nʼabali buwe, nʼabali bʼabagala buwe, nʼabana buwe bosĩ mwaletabo haguma naye eMĩsĩrĩ.

⁸ Aya wa mena wʼabana ba Ĩsraelĩ abahĩka eMĩsĩrĩ, Yakobo nʼabagala buwe; Rũbenĩ, akambere ka Yakobo.

⁹ Abagala ba Rũbenĩ: Hanoko, na Palũ, na Nesĩronĩ, na Karmĩ.

¹⁰ Abagala ba Sĩmeonĩ: Yemwelĩ, na Yamĩnũ, na Ohadũ, na Yakĩnĩ, na Zoharĩ, na Saũlĩ mugala wʼomwali wʼeKanana.

¹¹ Abagala ba Lawĩ: Gersonĩ, na Kohatĩ, na Merarĩ.

¹² Abagala ba Yũda: Erĩ, na Onanũ, na Sela, na Peresĩ, na Zera; nĩkwa Erĩ na Onanũ mobaholera omo kihugo kyʼeKanana. Nʼabagala ba Peresĩ babya Hesĩronĩ na Hamũlĩ.

¹³ Abagala ba Ĩsakarĩ: Tola, na Pũwa, na Ĩobũ, na Sĩmũronĩ.

¹⁴ Abagala ba Zebũlũnĩ: Seredĩ, na Elonĩ, na Yalelĩ.

¹⁵ Aba ni bagala ba Lea, abo abutira Yakobo aPadanĩ-aramũ, haguma na mwali wuwe Dĩna. Emiganzo yosĩ yʼabagala buwe nʼabali buwe yabya makũmĩ asatu nʼabasatu.

¹⁶ Abagala ba Gadĩ: Sĩfonĩ, na Hagĩ, na Sũnĩ, na Ezĩbonĩ, na Erĩ, na Arodĩ, na Arelĩ.

¹⁷ Abagala ba Aserĩ: Ĩmũna, na Ĩsĩwa, na Ĩsĩwĩ, na Berĩa, na Sera, mwali wabo; nʼabagala ba Berĩa, Heberĩ, na Malĩkĩelĩ.

¹⁸ Aba ni bagala ba Sĩlpa, oyo Labanĩ aha Lea mwali wuwe; abana abo abutira Yakobo, ni bandu ĩkũmĩ nʼendatu

¹⁹ Abagala ba Rakelĩ muka Yakobo, Yosefũ na Benyamĩna.

²⁰ Neryo Yosefũ mwabutira Manase na Efũraĩmũ omo kihugo kyʼeMĩsĩrĩ, abo Asenatĩ mwali wa Potĩfera omũhererĩ wa Onĩ, amubutira.

²¹ Abagala ba Benyamĩna: Bela na Keberĩ, na Asĩberĩ, Gera, na Namanĩ, Ehĩ, na Rosĩ, na Mũpĩmũ, na Hũpĩmũ, na Aradĩ.

²² Aba ba bagala ba Rakelĩ, abo Yakobo abuta. Abosĩ babya ĩkũmĩ nʼabani.

²³ Abagala ba Danĩ: Hũsĩmũ.

²⁴ Abagala ba Nafũtalĩ: Yazelĩ, na Gũnĩ, na Yezerĩ, na Sĩlemũ.

²⁵ Aba ni bagala ba Bĩlĩha, oyo Labanĩ aha Rakelĩ mwali wuwe, abo abutira Yakobo. Abosĩ babya bandu balinda.

²⁶ Abandu bosĩ abasa haguma na Yakobo eMĩsĩrĩ, abalũa omo kisimbiri kiwe, butsira abalĩana ba Yakobo, abandu bosĩ babya makũmĩ ndatu nʼendatu.

²⁷ Neryo abagala ba Yosefũ, abo abutira eMĩsĩrĩ, babya babiri. Abandu bosĩ bʼekĩtũnga kya Yakobo abagenda eMĩsĩrĩ babya makũmĩ alinda.

²⁸ Kandi mwatuma Yũda mo ndangĩrĩrĩ uku Yosefũ, erimusondola erĩhĩka eGosenĩ, neryo mobahĩka omo kihugo kyʼeGosenĩ.

²⁹ Neryo Yosefũ mwategekanĩa egalĩ yiwe, nʼerihetuka erĩhĩndana na Ĩsraelĩ tata wuwe, eGosenĩ. Mwayĩkangya kwiye, mwawa oko bĩkya biwe, mwalirira oko bĩkya biwe, endambĩ nyiri.

³⁰ Neryo Ĩsraelĩ mwabũga na Yosefũ, ati, Lino nanganahola, namabilola oko bũsũ bwawe, ngoko ukineho.

³¹ Kandi Yosefũ mwabũga nʼabagala babo, riʼabʼekĩtũnga kya tata wuwe ati, Ngahetuka nʼeriyabwira Farao, nʼerĩmũkanĩrya nyiti, Abagala betu nʼabʼekĩtũnga kya tata wage, ababya omo kihugo kyʼeKanana, babĩrĩmbĩkako.

³² Nʼabandu aba nĩ balĩsya bʼesyombũlĩ, kusangwa babiribya bateya bʼebihangulo. Babirireta esyombũlĩ syabo nʼesyonde syabo nʼebyosĩ ko babya nabyo.

³³ Neryo omugulu Farao asyababirikira, asyabũga ati, Omũbĩrĩ wenyũ ni wahi kwehĩ?

³⁴ Nenyũ mwasyabũga muti, Abagombe bawe babya balĩsya bʼebihangulo erĩlũa omo bũlwana bwetu erĩhĩka lino, ĩtwe nʼabotata wetu. Imwatoka erĩĩkala omo kihugo kyʼeGosenĩ, kusangwa obuli, mũlĩsya ni nye oko Banya Mĩsĩrĩ.