Enzũko 44 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriyiswekera lyʼabagala babo Yosefũ

¹ Neryo Yosefũ mwahana omwĩmanĩrĩ wʼenyũmba yiwe ati, Ũsũlaye omo ngunza syʼabandu aba mwʼakalyo, ngoko bangatoka eriheka, ũhĩre esyofranka syʼobuli mundu omo buno bwʼengunza yiwe.

² Kandi Ũhĩre olũtehĩ lwage, olũtehĩ lwʼekĩtsĩpa omo buno bwʼengunza yʼomulere nʼesyofranka siwe esyʼengano. Neryo omwĩmanĩrĩ mwakola ngʼekĩnywa ekyo Yosefũ abũga.

³ Neryo bwabere bwakya, abandu abo mobatsindikwa, ibo nʼesyopunda syabo.

⁴ Omugulu bahĩka ekyaswa, ĩsĩbebahĩka hali, Yosefũ mwabũga nʼomwĩmanĩrĩ wuwe ati, Uhongoke, ukwame abandu aba, neryo wamabibanabo, ũbũge nabo uti, Busana nakĩ mũkatũhũlaya ekibi kyʼoko kibuya kwehĩ?

⁵ Olũ si lo lũtehĩ omukama wage akapũlayamo, nʼerilagula mulo kwehĩ? Mwamakola mutya imwamakola nabi.

⁶ Neryo mwahĩka kubo, mwabwirabo ebĩnywa ebĩ.

⁷ Nabo mobamũsũbĩrya bati, Busana nakĩ omukama wage akabũga ebĩnywa ebiri ngʼebĩ kwehĩ? Kibye hali oko bagombe bawe erikola ebiri ngʼebĩ.

⁸ Lebaya, esyofranka esyo twegaya omo buno bwʼesyongunza syetu, motwakuleterasyo kandi tũkalũa omo kihugo kyʼeKanana. Twangatoka tuti erĩĩba ebĩtsĩpa kutse esyamagetsi omo nyũmba yʼomukama wawe kwehĩ?

⁹ Oko bagombe bawe oyo wasyabanika nalo, iniahola, netu nibya twasyabya bakobe bʼomukama wawe.

¹⁰ Naye mwabũga ati, Lino kibye ngʼebĩnywa byenyũ. Oyo wasyabanika nalo asyabya mukobe wage. Nenyũ mwasyabya butsira lubanza.

¹¹ Neryo mobanguha, mobĩkya obuli mundu engunza yiwe oko kitaka, mobasengula obuli mundu engunza yiwe.

¹² Naye mwasondyalo, erĩtsũka oko mukulu erĩhĩndĩra oko mulere. Olũtehĩ olo molwabanika omo ngunza ya Benyamĩna.

¹³ Neryo mobasatangya esyongimba syabo, obuli mundu mwahekya epunda yiwe, mobasuba oko mũyĩ.

¹⁴ Neryo Yũda nʼabagala babo mobahĩka oko nyũmba ya Yosefũ. Naye inianeho. Mobawa embere siwe oko kitaka.

¹⁵ Neryo Yosefũ mwabũga nabo ati, Oyũ ni mwatsi wahi ogo mulyakola kwehĩ? Ko sĩmwasĩ omundu nga ngye kwʼanganatoka erilagula kwehĩ?

¹⁶ Neryo Yũda mwabũga ati, Tũkandĩbũgakĩ nʼomukama wage kwehĩ? Twasyabũgakĩ kwehĩ? Kutse twasyayĩbalya tuti kwehĩ? Nyamuhanga abiribana obubi bwʼabakobe bawe. Talebaya, tuli bagombe bʼomukama wage, ĩtwe, nʼoyo wabanika kʼolũtehĩ omo byala biwe.

¹⁷ Nĩkwa Yosefũ mwabũga ati, Sikibye kwĩngye erikola nyitya. Omo byala byʼomundu oyo lũtehĩ lukandibanikako, iye asyabya mukobe wage, nĩkwa Ĩnywe, mwagenda nʼobuholo uku tata wenyũ.

¹⁸ Neryo Yũda mwasegera hakũhĩ naye, mwabũga ati, Uwe mukama wage, ngakũbũlaya, uhamule omugombe wawe abũge ekĩnywa kiguma omo matwĩ wʼomukama wage, kandi Suleke erihitana lyawe erigulumira oko mugombe wawe, kusangwa ulingene na Farao.

¹⁹ Omukama wage mwabũlya abagombe buwe, ati, Munawite tata kutse mugala wenyũ kwehĩ?

²⁰ Netu motwabwira omukama wetu tuti, Tunawite tata, omũsyakulu, nʼendũngo yiwe, ni mulere. Omugala wabo aholĩre, naye ĩyowene yũkĩnasĩya uku koyo wuwe, kandi tata wuwe amwanzĩre.

²¹ Nawe mowabwira abagombe bawe uti, Mũnyandagalĩrayeye, inatoka erimugusa kwʼameso.

²² Netu motwabwira omukama wetu tuti, Omũlwana siangatoka erĩsĩganĩa tata wuwe. Kusangwa amasĩganĩa tata wuwe, tata wuwe iniasyayirekulira.

²³ Nawe mowabwira abagombe bawe uti, Mugala wenyũ mulere amatendiandagala haguma nenyũ, simwendisyalola oko bũsũ bwage kandi.

²⁴ Enyũma wʼaho omugulu twahetukira oko mugombe wawe tata wage, motwamũtũlĩra ebĩnywa byʼomukama wage.

²⁵ Na tata wetu mwabũga ati, Mugende kandi muyatugulire akalyo kake.

²⁶ Netu motwabũga tuti, Sitwenditoka eriandagala. Omugala wetu mulere amabya ali haguma netu neryo twasyandagala, kusangwa Sitwangatoka erilola oko bũsũ bwʼomundu oyo, mugala wetu mulere ate haguma netu.

²⁷ Nĩkwa omugombe wawe tata wage mwatubwira ati, Mũnasĩ omũkalĩ wage ko mwambutira abagala babiri.

²⁸ Omuguma mwagenda, neryo monabũga nyiti, Kwenene abiritulangwa mo bihande-bihande. Kandi sinditaswamulolako.

²⁹ Nenyũ mwamandũsya kwʼoyũ nibya, nʼekitsibu kyamamũhĩkako, mwasyandagalĩrya esyombwĩ syage syʼeKũlĩmũ nʼobũlĩge.

³⁰ Neryo omugulu nasyahĩka oko mugombe wawe tata wage, nʼomũlwana isiali haguma netu kusangwa engebe yiwe ibohene nʼengebe yʼomũlwana.

³¹ Omugulu asyalangira ko mũlwana ate haguma netu, asyayirekulira, nʼabagombe bawe basyandagalĩrya esyombwĩ syʼomugombe wawe tata wetu syʼeKũlĩmũ nʼobũlĩge.

³² Kusangwa omugombe wawe mwabya muhingo wʼomũlwana uku tata wage, ati, Namatendikuleteraye, nasyaheka omusango uku tata wage kera na kera.

³³ Neryo lino, ngakũbũlaya, Uleke omugombe wawe, asĩgale mo mukobe wʼomukama wage omo mwanya wʼomũlwana. Uleke omũlwana ahetuke nʼabagala babo.

³⁴ Kusangwa nasyahetukira uku tata wage ko nyiti, omũlwana ate haguma nage kwehĩ? Ngasyalola oko kibi ekyasyahĩka uku tata wage.