Enzũko 43 - AMASAKO ABOYTRTRE WA NYAMUHANGA AWAKAHULAWA MO BIBLIA

Olugendo lwʼakabiri lwʼabagala babo Yosefũ

¹ Enzala moyakanya omo kihugo.

² Enyũma wʼaho, babere babuga erirya engano eyo balũsaya eMĩsĩrĩ, tata wabo mwabũga nabo ati, Mugende kandi, muyatugulire akalyo kake.

³ Na Yũda mwabũga naye ati, Omundu oyo mwatũgomerya kutsibu ati, Simwendisyalola oko bũsũ bwage, mugala wenyũ ate haguma nenyũ.

⁴ Wamatuma mugala wetu haguma netu, twasyandagala erikugulira akalyo.

⁵ Nĩkwa wamatindamutuma, sitwendiandagala, kusangwa omundu oyo mwatubwira ati, Simwendisyalola oko bũsũ bwage, omugala wenyũ ate haguma nenyũ.

⁶ Neryo Ĩsraelĩ mwabũga ati, Busana nakĩ momwanyikola nabi eribwira omundu oyo ngoko muwite ogundi mugala wenyũ kwehĩ?

⁷ Nabo mobabũga bati, Omundu oyo mwabũlya ndeke-ndeke busana netu, na busana nʼekihanda kyetu ati, Tata wenyũ akineho kwehĩ? Munawite gundi mugala wenyũ kwehĩ? Netu motwamũtũlĩrago ngoko biri. Ko twangatokĩre eriminya tuti kwʼangabũga ati, Mwandagale haguma na mugala wenyũ kwehĩ?

⁸ Neryo Yũda mwabũga na Ĩsraelĩ tata wuwe ati, Tuma omũlwana haguma nage, tuhongoke tugende. Itwatoka eribyaho, nʼeritindahola, ĩtwe, nawe, nʼabana betu.

⁹ Nasyahingana naye erimwimira. Wasyanyiganza mo mũlemberĩ wuwe. Namatendimuleta ukʼuwe, nʼerĩmũhĩra embere syawe, neryo nasyaheka omusango oyo kera na kera.

¹⁰ Kusangwa kumbe tutalirinda, nga twabirisubula engendo yʼakabiri.

¹¹ Neryo tata wabo Ĩsraelĩ mwabũga nabo ati, Byamabya iko biri bitya lino, mukole ekĩ. Mwĩmaye ebĩgũma byowene byʼekihugo omo bindu byenyũ, mutwalire omundu oyo yʼolutsumbi, nʼotũgũta tuke, nʼehyuki, nʼamanũkato, nʼamane-mane, nʼakalanga, nʼelosĩ.

¹² Mwĩmaye esyofranka syo kabiri omo byala byenyũ nʼesyofranka esyasubula omo muno wʼesyongunza syenyũ muswehekasyo omo byala byenyũ. Kwamũhwa byibiriranawa.

¹³ Mutwale omugala wenyũ nibya, muhongoke, mugende kandi oko mundu oyo.

¹⁴ Kandi Nyamuhanga Omũtokĩ Wʼebyosĩ abaganyire embere syʼomundu oyo, iniababoholera ogundi mugala wenyũ na Benyamĩna. Nage namakwĩrwa nʼabana bage, ĩnamabĩkwĩrwa.

Yosefũ akakokaya bagala babo

¹⁵ Neryo abandu abo mobĩmya olutsumbi, kandi mobĩmya esyofranka esyongendo ĩbĩrĩ omo byala byabo, mobatwala na Benyamĩna, mobahongoka, mobandagalira eMĩsĩrĩ, mobahangana embere sya Yosefũ.

¹⁶ Omugulu Yosefũ alangira Benyamĩna haguma nabo, mwabwira omwĩmanĩrĩ wuwe wʼenyũmba yiwe ati, Ĩngĩraya bandu aba omo nyũmba, ukere enyama nʼerĩkokotya ebyʼerirya, kusangwa abandu aba bakandirya haguma nage omwʼitungi.

¹⁷ Omundu oyo mwakola ngoko Yosefũ amuhana. Omundu oyo mwaleta abandu abo omo nyũmba ya Yosefũ.

¹⁸ Nʼabandu abo mobakwa obuba, kusangwa mobaletwa omo nyũmba ya Yosefũ mobabũga bati, Tukaletawa muno busana nʼesyofranka esyasubula omo syongunza syetu engendo yʼerĩmbere. Iniatoka eritutsongera, nʼerituwako, nʼeritutwala eribya bakobe, nʼesyopunda syetu.

¹⁹ Neryo mobasegera hakũhĩ nʼomwĩmanĩrĩ wʼenyũmba ya Yosefũ, mobabũga naye oko lũkyo lwʼenyũmba,

²⁰ bati, Uwe mukama wage, kwenene motwandagala engendo yʼerĩmbere erigula akalyo.

²¹ Enyũma wʼaho omugulu twahĩka omo nyũmba yʼabagenĩ omo nzira, motwasengula esyongunza syetu, neryo lebaya esyofranka syʼobuli mundu isine omo buno bwʼekisaho kiwe, esyofranka syetu ĩsĩnahĩkene esyosĩ. Neryo twamaletasyo kandi omo byala byetu.

²² Esindi franka twabiriretasyo omo byala byetu erigula akalyo. Sĩtwasĩ nga nindi oyo wahĩra esyofranka syetu omo ngunza syetu.

²³ Neryo omwĩmanĩrĩ mwabũga nabo ati, Obuholo bubye nenyũ, simubahe. Nyamuhanga wenyũ, na Nyamuhanga wa tata wenyũ, abiribaha ebindu omo bisaho byenyũ. Ĩngye nabya nʼesyofranka syenyũ. Neryo mwahũlũkĩryabo Sĩmeonĩ.

²⁴ Neryo omwĩmanĩrĩ oyo mwaleta abandu abo omo nyũmba ya Yosefũ, mwahabo amagetsi, mobanaba oko bisando byabo. Kandi mwaha nʼesyopunda syabo syʼebyʼerirya.

²⁵ Neryo mobategekanĩa olũsũnzo busana nʼerĩhĩka lya Yosefũ omwʼitungi, kusangwa mobowa ngoko bakandiriraho.

Erirya ĩnene Yosefũ akokotaya busana nʼabagala babo

²⁶ Omugulu Yosefũ ahĩka eka mobamuha olũsũnzo olwabya omo byala byabo omo nyũmba, mobayũnamya embere siwe erĩhĩka oko kitaka.

²⁷ Naye mwabũlyabo ewahi, ati, Tata wenyũ anabũkĩre, omũsyakulu oyo mwahula kwehĩ? Erĩhĩka lino akineho kwehĩ?

²⁸ Nabo mobamũsũbĩrya bati, Omugombe wawe, tata wetu anabũkĩre, akineho. Neryo mobũnamya emitwe yabo, mobalambama.

²⁹ Neryo Yosefũ mwasumba ameso wuwe, mwalangira Benyamĩna mugala wabo, omugala wa koyo wuwe, neryo mwabũga ati, Oyũ yo mugala wenyũ mulere, oyo mwahula kwehĩ? Neryo Yosefũ mwabũga ati, Nyamuhanga akuganyire uwe, mugala wage.

³⁰ Neryo Yosefũ mwanguha erĩlũaho, kusangwa omutima wuwe abya nʼolukando lunene busana na mugala wabo, neryo mwasondya ahʼeriririra. Neryo mwingira omo kyumba kiwe, mwaliriramo.

³¹ Neryo mwerya obũsũ buwe, mwahuluka, mwayĩsũnga, mwabũga ati, Mũhũkũle.

³² Neryo mobamũhũkũlĩra aho wuwe ĩyowene, nabo aho wabo; nʼAbanya Mĩsĩrĩ ababya bakalya haguma naye, nabo aho wabo; kusangwa Abanya Mĩsĩrĩ isibangalya akalyo haguma nʼAbaebrania; kusangwa ekyo ni nye oko Banya Mĩsĩrĩ.

³³ Neryo mobĩkala embere siwe, akambere aho wuwe, nʼomulere aho wuwe nʼabandu mobasamalirana nʼerisweka.

³⁴ Neryo mwahereryabo amagabo wʼakalyo kakalũa oko mesa yiwe, nĩkwa erĩgabo lya Benyamĩna molyabya ĩnene ngendo ĩtanu oko wabo. Neryo mobapũlya, nʼeritsema haguma naye.