Enzũko 42 - AMASAKO ABOYTRTRE WA NYAMUHANGA AWAKAHULAWA MO BIBLIA

Abagala ba Yakobo bakahĩka eMĩsĩrĩ

¹ Neryo Yakobo mowa ngoko hali engano eMĩsĩrĩ, neryo Yakobo mwabwira bagala buwe ati, Busana nakĩ mukatungererana kwehĩ?

² Kandi mwabũga ati, Nabĩrĩowa ngoko engano iri eMĩsĩrĩ. Mwandagalireyo, muyatugulire eyo. Itwatoka eribyaho, itutahola.

³ Nʼabagala babo Yosefũ erĩkũmĩ mobandagalira eMĩsĩrĩ eriyagula engano.

⁴ Nĩkwa Yakobo mwatatuma Benyamĩna mugala wabo Yosefũ, haguma nʼabagala babo, kusangwa abũga ati, Kwamũhwa akasyahĩka ko kitsibu omo nzira.

⁵ Neryo abagala ba Ĩsraelĩ mobagenda haguma nʼabandi abagenda eriyagula, kusangwa enzala yabya omo kihugo kyʼeKanana.

⁶ Nĩkwa Yosefũ abya mukulu wʼekihugo. Naye yo wagũlaya oko bandu bosĩ bʼekihugo. Neryo abagala babo Yosefũ mobasa mobamũnamira nʼamũsũ wabo erĩhĩka oko kitaka.

⁷ Omugulu Yosefũ alangira abagala babo, mwaminyererabo, nĩkwa mwayiyira kubo ngʼowʼehandi, mwakala kubo. Mwabũga nabo ati, Mũkalũa hahi kwehĩ? Nabo mobabũga bati, Tũkalũa omo kihugo kyʼeKanana erisyagula akalyo.

⁸ Na Yosefũ mwaminyerera bagala babo, nĩkwa ibo mobatamuminya.

⁹ Neryo Yosefũ mwibuka erilota eryo alota busana nabo, mwabũga nabo ati, Muli balĩngĩ, muliasa erilangira omulala wʼekihugo.

¹⁰ Nabo mobamũsũbĩrya bati, Iyihi, mukama wetu, nĩkwa abagombe bawe bakabiasa erisyagula akalyo.

¹¹ Ĩtwe bosĩ tuli bagala bʼomundu muguma. Tuli bandu bʼekwenene, abagombe bawe sĩ balĩngĩ.

¹² Neryo mwabũga nabo ati, Iyihi, nĩkwa mwabiriasa erilangira omulala wʼekihugo kyetu.

¹³ Nabo mobabũga bati, Ĩtwe abakobe bawe, tuli bagala ĩkũmĩ nʼababiri, abagala bʼomundu muguma omo kihugo kyʼeKanana. Neryo lebaya, Omulere ali haguma na tata wetu, nʼomuguma sialiho.

¹⁴ Na Yosefũ mwabũga nabo ati, Ekyo kyo ndyabũga nenyũ nyiti, Muli balĩngĩ.

¹⁵ Ũmwʼekĩ mwasyalengwako: okwʼibyaho lya Farao, sĩmwendĩlũa hano, omugala wenyũ mulere ate ahĩka hano.

¹⁶ Mutume omuguma wʼũkwʼĩnywe, ende mugala wenyũ, nenyũ mukandibohwa, ebĩnywa byenyũ birengawe nga mũnemũbũga kwenene, busana nʼeribyaho lya Farao, kwenene muli balĩngĩ.

¹⁷ Neryo mwabohabo abosĩ haguma ebiro bisatu.

¹⁸ Ekiro kyʼebisatu Yosefũ mwabũga nabo ati, Mukole ekĩ imomwabyaho, kusangwa ngubaha Nyamuhanga;

¹⁹ mwamabya muli bandu bʼekwenene, omuguma gʼoko bagala benyũ abohawe omo nyũmba yʼomũlĩkĩ. Nĩkwa Ĩnywe mugende, muheke engano busana nʼenzala yʼebĩtũnga byenyũ.

²⁰ Munyiretere mugala wenyũ mulere. Neryo ebĩnywa byenyũ byasyamĩnyĩkalĩbwa, nenyũ imutaswahola. Nabo mobakola batya.

²¹ Neryo mobabwirana bati, Kwenene tuli nʼolubanza busana na mugala wetu, kusangwa motwalangira obuligo bʼomutima wuwe, omugulu atuhatikana, motũtowa, ekyo kikaleka obuligo obũ ĩbwatũhĩkako.

²² Neryo Rũbenĩ mwasũbĩryabo ati, Mondababwira nyiti, Simukole omũlwana yo nabi, nenyũ momũtowa kwehĩ? Neryo kikaleka omusasi wuwe ĩnĩasondĩbwa.

²³ Kandi mobataminya ko Yosefũ amowabo, kusangwa habya omũbĩndũlĩ wa kubo.

²⁴ Neryo mwayihigula kubo, mwalira. Neryo mwasuba aho bali, mwabũga nabo, neryo mwĩmya Sĩmeonĩ omo katĩkatĩ kabo, mwamuboha embere syʼameso wabo.

²⁵ Neryo Yosefũ mwategeka ati bũsũlaye ebindu byabo mwʼengano, nʼerĩsũbũlĩrya obuli mundu yʼesyofranka siwe omo kisaho kiwe, nʼerihabo endanda busana nʼenzira. Ko bakolerabo batya.

²⁶ Mobahekya esyopunda syabo syʼengano, mobalũayo.

²⁷ Neryo omugulu omuguma wa kubo abohola ekigunza kiwe eriha epunda yiwe yʼebiti aho bagotsera, mwabanamo esyofranka siwe, neryo lebaya, ibine omo buno bwʼekigunza kiwe.

²⁸ Neryo mwabwira abagala babo ati, Esyofranka syage syasũbwĩre, sine omo ngunza yage. Emitima yabo moyahenĩa omo nda mobabindukirana nʼerititimana bati, Ekĩ nĩkĩ ekyo Nyamuhanga abiritukolera kwehĩ?

Abagala babo Yosefũ bakahĩka ewabo

²⁹ Neryo mobahĩka uku Yakobo tata wabo omo kihugo kyʼeKanana, mobamũtulĩra ebyosĩ ebyahĩka kubo, bati,

³⁰ Omundu oyo, omukama wʼekihugo, mwabũga netu ebĩkalĩre, mwatulangira nga balĩngĩ bʼekihugo.

³¹ Netu motwabũga naye tuti, Tuli bandu bʼekwenene. Situli balĩngĩ.

³² Tuli bagala ĩkũmĩ nʼababiri, abagala ba tata wetu. Omuguma siakiriho, nʼomulere ane haguma na tata wetu mũnabwĩre omo kihugo kyʼeKanana.

³³ Omundu oyo, omukama wʼekihugo, mwabũga netu ati, Ũkwʼekĩ nasyaminya ko muli bandu bʼekwenene: mũnyĩsĩgĩre mugala wenyũ muguma, mwĩmaye engano busana nʼenzala yʼebĩtũnga byenyũ, muyigendere.

³⁴ Nĩkwa munyiretere mugala wenyũ mulere. Ukwʼekyo nasyaminya ko mute balĩngĩ, nĩkwa ko muli bandu bʼekwenene. Neryo nasyabasũbũlĩrya mugala wenyũ, neryo imwatundira omo kihugo.

³⁵ Enyũma wʼaho omugulu bũtũla ebyabya omo syongunza syabo, neryo lebaya, ekitu kyʼesyofranka kyʼobuli mundu ikine omo ngunza yiwe, nʼomugulu balangira haguma na tata wabo ebitu byabo byʼesyofranka, mobubaha.

³⁶ Na Yakobo tata wabo mwabwirabo ati, Busana nenyũ namakwĩrwa abana. Yosefũ siali, na Sĩmeonĩ siali, kandi mukatwala Benyamĩna. Emyatsi yosĩ eyĩ yamanyilundamanako.

³⁷ Neryo Rũbenĩ mwabwira tata wuwe ati, Wasyĩta abagala bage babiri namatendĩmũsũbũlya. Ũmũhĩre omo byala byage, nage nasyamuleta kandi ukʼuwe.

³⁸ Yakobo mwabũga ati, Omugala wage siendisyandagala haguma nenyũ. Kusangwa mugala wabo abirihola, naye ĩyowene yũkĩnasĩya. Kusangwa ekitsibu kyamamũhĩkako omo nzira eyo mukaya, neryo mwasyaleka inahola nʼobũlĩge.