Enzũko 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Abana ba Adamu. Kaĩna akĩta Abele

¹ Neryo omundu oyo mwĩmya mũkalĩwe Eva, naye mwaheka obukule, mwabuta Kaĩna. Neryo mwabũga ati, Nabiributa omwana wʼobulume busana nʼOmwami Mukulu.

² Kandi mwabuta mugala wabo ye Abele. Neryo Abele abya mũlĩsya wʼesyombũlĩ, nĩkwa Kaĩna abya mũlĩmĩ wʼamalima.

³ Neryo ebindi biro byabere byabilaba Kaĩna mwaletera Omwami Mukulu yʼebĩgũma byʼekitaka eribya buhere.

⁴ Nĩkwa Abele, mwaleta ebyana byʼerĩmbere byʼesyombũlĩ syʼekĩhyo kiwe nʼebĩsabũ byasyo. Neryo Omwami Mukulu mwasĩma Abele nʼobuhere buwe.

⁵ Nĩkwa mwatasĩma Kaĩna nʼobuhere buwe. Neryo Kaĩna mwahitana kutsibu, nʼobũsũ buwe mobwahĩna.

⁶ Neryo Omwami Mukulu mwabũga na Kaĩna ati, Busana nakĩ ukahitana nʼobũsũ bwawe bwamahĩna?

⁷ Wamakola ndeke, sĩwendĩsyalĩgwa kwehĩ? neryo wamatindakola ndeke, ebibi bĩnasũnamĩre oko lũkyo, iwakola ekyo wanzĩre, nĩkwa utabale kubyo.

⁸ Neryo Kaĩna mwabũga na mugala wabo ye Abele, ati, Tugende eyĩhya omolĩ. Neryo omugulu babya omolĩ, Kaĩna mwagulukira uku mugala wabo ye Abele, mwamwĩta.

Eritswerwa lya Kaĩna

⁹ Neryo Omwami Mukulu mwabũga na Kaĩna ati, Ko mugala wenyũ Abele ali hahi kwehĩ? Neryo mwamũsũbĩrya ati, Sĩnyasĩ, ĩngye indi mũteya wa mugala wetu kwehĩ?

¹⁰ Neryo Nyamuhanga mwabũga ati, Wabirikolakĩ kwehĩ? Omulenge wʼomusasi wa mugala wenyũ akanyiririra erĩlũa oko kitaka.

¹¹ Na lino uli mutakirwa busana nʼekitaka, ekyabiriangirira omusasi wa mugala wenyũ oko byala byawe.

¹² Omugulu ukalima ekitaka, sikyendisyakuha amaka wakyo. Wasyabya mũsayĩ nʼomũgendĩ-gendĩ omo kihugo.

¹³ Neryo Kaĩna mwabũga nʼOmwami Mukulu ati, Erisuyira lyage lĩlabĩre nʼobũlĩto okwʼihekwa.

¹⁴ Lebaya, mũnabwĩre wabirimbiga oko kitaka, nasyabĩswa nʼoko bũsũ bwawe, kandi nasyabya mũsayĩ nʼomũgendĩ-gendĩ omo kihugo, neryo omundu akasyabya amanyeya ĩnĩanyĩta.

¹⁵ Neryo Omwami Mukulu mwabũga naye ati, Omundundi oyo wasyĩta Kaĩna, asyakĩsĩrĩbwako ngendo sirinda. Neryo Omwami Mukulu mwahĩra uku Kaĩna kwʼekiminyikalo, omundu amamweya ĩsyamwĩta.

¹⁶ Neryo Kaĩna mwalũa omo meso wʼOmwami Mukulu, mwĩkala omo kihugo kyʼeNodĩ, oko luhande lwʼendata wʼeEdenĩ.

¹⁷ Neryo Kaĩna mwĩmya omũkalĩ wuwe, naye mwaheka obukule, mwabuta Enoka. Naye mwahĩmba omũyĩ, mwahula erĩna lyʼomũyĩ oyo omo lĩna lya mugala wuwe Enoka.

¹⁸ Neryo Enoka mwabuta Ĩradĩ, na Ĩradĩ mwabuta Mehũyalĩ, na Mehũyalĩ mwabuta Metũsela, na Metũsela mwabuta Lameke.

¹⁹ Neryo Lameke mwahĩkya abakalĩ babiri. Erĩna lyʼomuguma lyabya Ada, nʼerĩna lyʼowʼakabiri ni Sila.

²⁰ Neryo Ada mwahuta Yabalĩ. Neryo Yabalĩ abya Ĩse wʼabandu abĩkere omo mahema, ibawite esyonde.

²¹ Nʼerĩna lyʼomugala wabo lyabya Yũbalĩ, Yũbalĩ abya ĩse wʼabawatĩ bʼebinanga nʼesyonyamulera.

²² Neryo Sila naye mwabuta Tũbalĩ-Kaĩna, omũhesĩ wʼebyuma byʼemiringa nʼebyuma, na mwali wabo Tũbalĩ-Kaĩna abya Nama.

²³ Neryo Lameke mwabũga nʼabakalĩ buwe babiri ati: Ada na Sila, myowe omulenge wage: Ĩnywe bakalĩ ba Lameke, muhulikirire ekyo ngabũga: Kusangwa nabĩrĩta omundu busana nʼerĩnyagalya, Nʼomũlwana busana nʼerinyibanda:

²⁴ Kumbe Kaĩna asyakĩsĩbwa ngendo sirinda Kwenene Lameke asyakĩsĩbwa ngendo makũmĩ alinda nʼesirinda.

²⁵ Neryo Adamu mwĩmya mũkalĩ wuwe kandi, naye mwabuta mugala, mwahula erĩna liwe mo Setĩ, kusangwa ati, Nyamuhanga abirinyibanira ogundi mwana omo mwanya wa Abele, kusangwa Kaĩna mwamwĩta.

²⁶ Setĩ naye mwabuta mugala, neryo mwahula erĩna liwe mo Enosĩ. Neryo oko mugulu oyo abandu mobatsũka eribirikira oko lĩna lyʼOmwami Mukulu.