Enzũko 39 - AMASAKO ABOYTRTRE WA NYAMUHANGA AWAKAHULAWA MO BIBLIA

Yosefũ akakolera Potĩfarĩ

¹ Neryo Yosefũ mwatwalwa eMĩsĩrĩ. Neryo Omunya Mĩsĩrĩ ye Potĩfarĩ, omũtabalĩ wa Farao, omukulu wʼabateya, mwamugula omo byala byʼAbaĩsmaelĩ, abamuletayo.

² Nĩkwa Omwami Mukulu abya haguma na Yosefũ, neryo mwabya mundu wʼomũyĩsa. Kandi mwabya omo nyũmba yʼomukama wuwe Omunya Mĩsĩrĩ.

³ Omukama wuwe Potĩfarĩ mwalangira ngoko Mwami Mukulu abya haguma na Yosefũ, nʼakandi ngoko Mwami Mukulu mwatsumula ebyosĩ akola omo byala biwe.

⁴ Neryo Yosefũ mwabana erĩsĩmwa omo meso wuwe, mwabya mugombe wuwe. Neryo Potĩfarĩ mwayira Yosefũ mo tsongo-mwami wuwe omo nyũmba yiwe, nʼebyosĩ abya awite mwahĩrabyo omo byala biwe.

⁵ Enyũma wʼaho erĩtsũka omugulu amuyira mo mũhangamĩ oko nyũmba yiwe, nʼoko byosĩ abya nabyo, Omwami Mukulu mwatsumula enyũmba yʼOmunya Mĩsĩrĩ busana na Yosefũ. Omũyĩsa wʼOmwami Mukulu mwabya oko byosĩ abya awite, omo nyũmba, nʼomwʼirima.

⁶ Kandi mwahĩra ebyosĩ abya awite omo byala bya Yosefũ, kandi mwataswaminya kindu ukwʼebyo abya nabyo, ka nʼakalyo alya kasa. Nĩkwa Yosefũ abya mubuya, nʼogʼobũsũ butendere.

Yosefũ akagana muka Potĩfarĩ

⁷ Enyũma wʼemyatsi eyĩ, omũkalĩ wʼomukama wuwe mwabuyahirwa Yosefũ, mwabũga naye ati, Gotsera nage.

⁸ Nĩkwa Yosefũ mwagana, mwabwira omũkalĩ wʼomukama wuwe ati, Lebaya, omukama wage sĩasĩ ekiri haguma nage omo nyũmba, abĩrĩhĩra ebyosĩ awite omo byala byage.

⁹ Sihali mundu oyũndabĩreko omo nyũmba eyĩ, kutse sialitanyikaga kindu nina we, kusangwa uli mũkalĩ wuwe. Neryo nangakola erĩlolo lingaha erĩ ryo nyiti, nʼerĩhalya uku Nyamuhanga kwehĩ?

¹⁰ Enyũma wʼaho omugulu ahatikana erĩbũga na Yosefũ obuli kiro, Yosefũ mwatalĩga erigotsera naye, kutse erilambama naye.

¹¹ Enyũma wʼaho oko mugulu oyo, Yosefũ mwaya omo nyũmba erikola omũbĩrĩ wuwe, kandi sihabya mundu gʼoko bʼomo nyũmba oyo wabyamo.

¹² Neryo omũkalĩ mwamuwata omo lukimba luwe ati, Gotsera nage. Neryo Yosefũ mwasĩga olukimba luwe omo byala biwe, mwatibita, mwahulukira eyĩhya.

¹³ Enyũma wʼaho omugulu alangira kwʼamabĩsĩga olukimba omo byala biwe, nʼeritibita eyĩhya.

¹⁴ Omũkalĩ oyo mwabirikira abalume bʼenyũmba yiwe, mwabũga nabo ati, Lebaya, abirituletera Omuebrania erituseka. Mwakingira omwage erigotsera nage, nage mongalaka nʼomulenge munene.

¹⁵ Enyũma wʼaho omugulu alĩowa ngoko namalaka nʼeribirikira, mwakasĩganaya olukimba luwe hakũhĩ nage mwakatibita eyĩhya.

¹⁶ Neryo omũkalĩ mwabika olukimba luwe aho ali erĩhĩka aho ĩba wuwe akandĩhĩkĩra eka.

¹⁷ Neryo mwamubwira ebĩnywa ebĩ ati, Omukobe Muebrania oyo watuletera, mwĩngĩre omwage erinzeka.

¹⁸ Enyũma wʼaho, omugulu nasumba omulenge wage nʼerilaka mwanyĩsĩgĩra olukimba luwe mwatibita eyĩhya.

¹⁹ Enyũma wʼaho omugulu omukama wuwe owa ebĩnywa byʼomũkalĩ wuwe, ebyo amubwira, ati, Omukobe wawe mwanyĩkolĩre emyatsi eyĩ; neryo mwahitana.

Eribohwa lya Yosefũ

²⁰ Neryo omukama wa Yosefũ mwamuhamba, mwamũhĩra omo mũlĩkĩ aho abʼomũlĩkĩ bʼomwami baboherwe, neryo Yosefũ mwabya hʼomo mũlĩkĩ.

²¹ Nĩkwa Omwami Mukulu mwabya haguma na Yosefũ mwamũkangya eriganyira liwe, mwamuha erĩsĩmwa omo meso wʼomũteya wʼomũlĩkĩ.

²² Neryo omũteya wʼenyũmba yʼomũlĩkĩ mwahĩra abʼomũlĩkĩ bosĩ omo byala bya Yosefũ. Ebyosĩ bakolaho iye mwabya mũkolĩ wabyo.

²³ Neryo omũteya wʼenyũmba yʼomũlĩkĩ mwataswalangira ebyo Yosefũ akola kusangwa Omwami Mukulu abya haguma na Yosefũ. Ebyosĩ akola, Omwami Mukulu m watsumulabyo.