Enzũko 37 - AMASAKO ABOYTRTRE WA NYAMUHANGA AWAKAHULAWA MO BIBLIA

Erilota lya Yosefũ

¹ Nĩkwa Yakobo mwĩkala omo kihugo ekyo tata wuwe abungiramo, ekihugo kyʼeKanana.

² Esĩ ni ndengo sya Yakobo. Yosefũ abere abibya wʼemyaka ĩkũmĩ nʼeyirinda, abya akalĩsya ekihangulo haguma nʼabagala babo, abya mũlwana haguma nʼabagala ba Bĩlĩha, na haguma nʼabagala ba Sĩlpa, abakalĩ ba tata wuwe; kandi Yosefũ mwabya akatũla emyatsi mibi yabo uku tata wabo.

³ Nĩkwa Ĩsraelĩ mwanza Yosefũ kwilaba bagala babo bosĩ, kusangwa abya ndũngo yiwe. Neryo mwamulandira ekanzu nyiri eyʼemirera.

⁴ Neryo abagala babo mobalangira ngoko tata wabo amwanzĩre kwilaba bagala babo bosĩ, mobamũkwa obusu, mobatatoka erĩkanĩa naye nʼobuholo.

⁵ Na Yosefũ mwalota esyonzolĩ, mwabikulirasyo abagala babo. Neryo mobamũkwa kwʼekĩnĩga kwilaba.

⁶ Neryo mwabũga nabo ati, Ngababũlaya, muhulikirire esyonzolĩ indialota.

⁷ Lebaya, twabya tukasenga emiganda omwʼirima, neryo lebaya, omuganda wage mwahangana mwasingilila. Neryo emiganda yenyũ moyatĩmba nʼerĩũnama embere syʼomuganda wage.

⁸ Nʼabagala babo mobabũga naye bati, Kwenene wasyatutabalako kwehĩ? Kutse kwenene Wasyabya mukama wetu kwehĩ? Mobamũkwa kwʼekĩnĩga kwilaba busana nʼerilota liwe nʼebĩnywa biwe.

⁹ Neryo mwalota esindi nzolĩ, mwabikulirasyo bagala babo, mwabũga ati, Lebaya, nabirilota esindi nzolĩ. Eryuba nʼomukera, nʼesyongũnũnũ erĩkũmĩ nʼenguma mosyũnama embere syage.

¹⁰ Kandi mwayabikulirasyo tata wuwe, nʼabagala babo. Tata wuwe mwamukunga, mwabũga naye ati, Nĩ nzolĩkĩ esyo wabirilota kwehĩ? Ĩngye na koyo wawe nʼabagala benyũ kwenene twasyasa ĩtũnama, embere syawe oko kitaka kwehĩ?

¹¹ Nʼabagala babo mobamutsura nĩkwa tata wuwe mwabika ebĩnywa ebĩ byʼomo mutima wuwe.

¹² Abagala babo mobayalĩsĩrya esyombũlĩ sya tata wabo eSekemũ.

¹³ Na Ĩsraelĩ mwabwira Yosefũ ati, Abagala benyũ sĩbelĩsĩraya esyombũlĩ syʼeSekemũ kwehĩ? Wase, ngandikutuma eyo bali. Naye mwabũga naye ati, Nandi hano.

¹⁴ Neryo mwamubwira ati, Ugende lino ũyalebaye bagala benyũ nga banabũkĩre, nʼesyombũlĩ nga sine ndeke, neryo iwandetera engulu yabo. Neryo mwamutuma oko musya wʼeHebronĩ, mwahĩka nʼeSekemũ.

¹⁵ Neryo omundu muguma mwamweya eyo, akaganga-ganga omolĩ. Omundu oyo mwamũbũlya ati, Ukasondakĩ kwehĩ?

¹⁶ Neryo Yosefũ mwabũga ati, Ngakũbũlaya umbwire aho bakalĩsĩraya esyombũlĩ.

¹⁷ Omundu oyo mwabũga ati, Babĩrĩlũa hano, kusangwa monowa bakabũga bati, Tugende eDotana. Neryo Yosefũ mwakwamirira bagala babo, mweyabo eDotana.

¹⁸ Neryo mobamulangira hali, nʼembere wʼerĩhĩka hakũhĩ nabo, mobaya embĩta yʼerĩmwĩta.

¹⁹ Neryo mobabwirana bati, Lebaya, omukama wʼesyonzolĩ amasa.

²⁰ Neryo mwase, tũmwĩte, tumuguse omo buhya buguma, neryo twasyabũga tuti, Enyama nyibi yabirimulya. Neryo twasyalebya esyonzolĩ siwe nga syasyabya siti.

²¹ Neryo Rũbenĩ mowa, mwamũlamya omo byala byabo, mwabũga ati, Sĩtũmwĩte.

²² Na Rũbenĩ mwabwirabo ati, Sĩmũte omusasi, mumuguse omo buhya obũ obuli omo mbwarara, nĩkwa sĩmũmũhĩre kwʼebyala. Iniatoka erĩmũbalya omo byala byabo, nʼerĩmũsũbya uku tata wuwe.

²³ Enyũma wʼaho Yosefũ abere ahĩka uku bagala babo, mobamũlũsya kwʼekanzu yiwe, ekanzu yʼemirera eyo abya ambite.

²⁴ Mobamuhamba mobamugusa omo buhya, nʼobuhya obo sibwabya mo magetsi.

²⁵ Neryo mobĩkala ahisi erirya akalyo. Neryo mobasumba ameso wabo mobalangira omulondo wʼAbaĩsmaelĩ bakalũa eGĩleadĩ, haguma nʼesyongamia syabo ĩbahekĩre amanũkato, na zerĩ, nʼamanemane, eryandagalĩryabyo eMĩsĩrĩ.

²⁶ Neryo Yũda mwabũga nʼabagala babo ati, Nĩ ndũndĩ yahi ũkwʼĩtwe erĩĩta mugala wetu nʼerĩbĩsa omusasi wuwe kwehĩ?

²⁷ Mwase tũmũgũaye oko Baĩsmaelĩ, neryo ebyala byetu ibitabya ukwʼiye. Kusangwa ni mugala wetu, nʼomubiri wetu. Nʼabagala babo mobalĩga.

²⁸ Neryo mohalaba Abanya Mĩdĩanĩ, abatũndĩ. Mobasumba Yosefũ erĩmũlũsya omo buhya, mobagũlya Yosefũ oko Baĩsmaelĩ busana nʼebihasa byʼekĩtsĩpa makũmĩ abiri. Ko batwala Yosefũ batya eMĩsĩrĩ.

Obũlĩge bwa Yakobo

²⁹ Neryo Rũbenĩ mwasuba oko buhya obo, nĩkwa Yosefũ isiali omo buhya. Neryo mwatulanga esyongimba siwe.

³⁰ Mwasuba eyiri bagala babo, mwabũga ati, Omwana siakiriyo. Nage, nasyayahi kwehĩ?

³¹ Neryo mobĩmya ekanzu ya Yosefũ, mobĩta embaya, mobĩkĩrya ekanzu yʼomo musasi.

³² Neryo mobaheka ekanzu yʼemirera, mobaletayo uku tata wabo, mobabũga bati, Twamabana eyĩ. Uminye lino nga ni kanzu yʼomugala wawe kutse iyihi.

³³ Naye mwaminyererayo, mwabũga ati, Ye kanzu yʼomugala wage. Enyama nyibi yabirimulya. Kwenene Yosefũ abiritulangwa mo bihande-bihande.

³⁴ Neryo Yakobo mwatulanga esyongimba siwe, mwahĩra omulemba gʼomo mbindi yiwe, mwalira mugala wuwe ebiro bingi.

³⁵ Nʼabagala biwe bosĩ nʼabali buwe bosĩ mobayamũ kĩranĩa. Nĩkwa mwagana erĩsĩbĩkĩbwa, mwabũga ati, Ngandisyandagalira eKũlĩmũ, inandimulira omugala wage. Na tata wuwe mwasekemũka busana naye.

³⁶ NʼAbamĩdĩanĩ mobamũ gũlya eMĩsĩrĩ uku Potĩfarĩ, omũtabalĩ wa Farao, omukulu wʼabasĩrĩkanĩ abakamũtegaya.