Enzũko 35 - AMASAKO ABOYTRTRE WA NYAMUHANGA AWAKAHULAWA MO BIBLIA

Yakobo akaya eBetelĩ

¹ Neryo Nyamuhanga mwabwira Yakobo ati, Hangana, uye eBetelĩ, wĩkaleyo ũhĩmbeyo ahʼeriherera uku Nyamuhanga oyo wakuhulakako omugulu watibita ukasaga Esaũ mugala wenyũ.

² Neryo Yakobo mwabũga nʼabandu bʼekĩtũnga kiwe, nʼabosĩ ababya haguma naye ati, Mũlũsayeho esyonyamuhanga syʼehandi esiri omo katĩkatĩ kenyũ, mũyeraye, muhindule esyongimba syenyũ.

³ Neryo tuhongoke twirukire eBetelĩ, neryo nasyahĩmbĩra Nyamuhanga yʼekiherero, oyo wanyĩsũbĩraya oko kiro kyʼobũlĩge bwage, kandi abiribya haguma nage ehosĩ nalaba.

⁴ Neryo mobaha Yakobo yʼesyonyamuhanga syosĩ syʼehandi, esyabya omo byala byabo, nʼesyombũka esyabya omo matwĩ wabo; neryo Yakobo mwayabĩsasyo omo ndĩna yʼomuti wʼomwelo owabya hakũhĩ nʼeSekemũ.

⁵ Neryo mobagenda, nʼobuba bwa Nyamuhanga mobwabya oko mĩyĩ eyabya ĩtĩmbĩre kubo, kutse mobatasyakwamirira abagala ba Yakobo.

⁶ Neryo Yakobo mwasa eLũzĩ omũyĩ owali omo kihugo kyʼeKanana (aho nĩ Betelĩ), iye nʼabandu bosĩ ababya haguma naye.

⁷ Nʼeyo mwahĩmba yʼekiherero, mwalukaho mo El-betelĩ, kusangwa Nyamuhanga amuhulukiraho, omugulu abya akasaga mugala wabo.

⁸ Nĩkwa Debora, omũbegerya wa Rebeka, mwahola, mwatabwa eyĩkwa wʼeBetelĩ omo ndĩna yʼomuti wʼomwelo. Erĩna lyaho molyahulwa mo Alonĩ-bakũtĩ.

Yakobo akabya Ĩsraelĩ

⁹ Neryo Nyamuhanga mwahulukira Yakobo kandi, omugulu asa akalũa ePadanĩ-aramũ, mwamutsumula.

¹⁰ Neryo Nyamuhanga mwabũga naye ati, Erĩna lyawe ni Yakobo. Erĩna lyawe siryendisyaswahulwa mo Yakobo, nĩkwa erĩna lyawe lyasyabya Ĩsraelĩ. Litya Nyamuhanga mwaluka erĩna liwe mo Ĩsraelĩ.

¹¹ Kandi Nyamuhanga mwabũga naye ati, Ĩngye indi Nyamuhanga Omũtokĩ Wʼebyosĩ. Ukanyirire utomekerawe; ekihanda nʼendeko yʼebihanda byasyalũa ukʼuwe, kandi Wasyabya tata wʼabami.

¹² Ekihugo ekyo naha Abrahamũ na Ĩsaka, nasyahakyo ukʼuwe, nʼoko lubuto lwawe enyũma syawe.

¹³ Neryo Nyamuhanga mwahetuka akalũa aho akanĩraya naye.

¹⁴ Neryo Yakobo mwasingika endũyĩ yʼaho akanĩraya naye, endũyĩ yabya yʼerĩbwe. Neryo mũta kulyo kʼobuhere bwʼerĩpũlya, kandi mũtũlĩra kulyo kwʼamagũta.

¹⁵ Kyaleka Yakobo iniahula erĩna lyʼaho Nyamuhanga akanĩraya naye mo Betelĩ.

Erihola lya Rakelĩ

¹⁶ Neryo mobagenda bakalũa eBetelĩ, neryo babere basonda erĩhĩka hakũhĩ nʼeEfũratĩ, Rakelĩ mwakunda, mwagalwa kutsibu nʼerikunda.

¹⁷ Enyũma wʼaho, omugulu akunda kutsibu, omũyĩrya mwabũga ati, Sigubahe, kusangwa lino ukandibana ogundi mugala.

¹⁸ Enyũma wʼaho, omugulu omutima wuwe asonda erĩtwĩka, (kusangwa mwalekula), mwaluka erĩna liwe mo Benonĩ nĩkwa tata wuwe mwamuluka mo Benyamĩna.

¹⁹ Neryo Rakelĩ mwahola, mwatabwa omo nzira yʼeEfũratĩ (eyu ye Betelehemũ).

²⁰ Na Yakobo mwasingika endũyĩ okwʼisinda ya Rakelĩ. Eyo nĩ ndũyĩ yʼokwʼisinda yiwe erĩhĩka na lino.

Abana ba Ĩsraelĩ

²¹ Na Ĩsraelĩ mwaswagenda, mwahanda ehema yiwe eyisirya wʼenyũmba nyiri yʼeEderĩ.

²² Enyũma wʼaho, omugulu Ĩsraelĩ abya ĩkere omo kihugo ekyo, Rũbenĩ mwayateta Bĩlĩha, omũhwekĩ wa tata wuwe; na Ĩsraelĩ mowago. Neryo abagala ba Yakobo babya erĩkũmĩ nʼababiri:

²³ abagala ba Lea: Rũbenĩ, akambere ka Yakobo, na Sĩmeonĩ, na Lawĩ, na Yũda, na Ĩsakarĩ, na Zebũlũnĩ:

²⁴ nʼabagala ba Rakelĩ: Yosefũ na Benyamĩna:

²⁵ nʼabagala ba Bĩlĩha, omũbegerya wa Rakelĩ: ye Danĩ na Nafũtalĩ:

²⁶ nʼabagala ba Sĩlpa, omũbegerya wa Lea: ye Gadĩ na Aserĩ. Aba bo bagala ba Yakobo, abo abutira ePadanĩ-aramũ.

Erihola lya Ĩsaka

²⁷ Nĩkwa Yakobo mwahĩka uku tata wuwe Ĩsaka eMamũrĩ, oko Kĩrĩatĩ-eba (eyo nĩ Hebũronĩ), aho Abrahamũ na Ĩsaka babya bĩkere.

²⁸ Ebiro bya Ĩsaka byabya emyaka erĩgana nʼamakũmĩ munani.

²⁹ Neryo Ĩsaka mwalekula, mwahola, mweya abalĩkyabo, abya mũsyakulu iniabirikota biro bingi. Neryo Esaũ na Yakobo bagala buwe mobamuta.