Enzũko 34 - AMASAKO ABOYTRTRE WA NYAMUHANGA AWAKAHULAWA MO BIBLIA

Dĩna na Sekemũ

¹ Nĩkwa Dĩna, mwali wa Lea, oyo abutira Yakobo, mwayalenderera oko bali bʼomo kihugo ekyo.

² Na Sekemũ, mugala wa Hamorĩ Mũhĩvĩ, omukama wʼekihugo, mwamulolako. Mwamuhamba, mwamwĩmya, mwamuhemula.

³ Neryo Sekemũ mwanza Dĩna mwali wa Yakobo yo ndeke, kandi mwanza omwana-muto oyo, neryo mwabũga naye ebĩnywa bitendere.

⁴ Neryo Sekemũ mwabũga na tata wuwe ye Hamorĩ ati, Ũnyĩtahĩraye omwanamuto oyũ eribya mũkalĩ wage.

⁵ Nĩkwa Yakobo mowa kwʼamabĩtsandya Dĩna mwali wuwe. Abagala buwe babya haguma nʼebihangulo biwe omo lũlĩsĩryo, neryo Yakobo mwabya bũkũtũ erĩhĩka okwʼasa lyabo.

⁶ Neryo Hamorĩ ĩse wa Sekemũ mwaya ewa Yakobo erĩkanĩa naye.

⁷ Nʼabagala ba Yakobo mobasa bakalũa omo lũlĩsĩryo babĩowago. Mobasũ sũmana, mobahitana kutsibu, kusangwa amabĩhalya oko Baĩsraelĩ eriteta mwali wa Yakobo kusangwa omwatsi ali ngʼoyũ isialikolawa.

⁸ Neryo Hamorĩ mwakanĩa nabo ati, Omutima wa mugala wage Sekemũ amanza mwali wenyũ. Ngababũlaya nyiti, mumuheye abye mũkalĩ wuwe.

⁹ Kandi tũ taha-tahanaye. Mutuhe bali benyũ, nenyũ mwĩmaye bali betu.

¹⁰ Nenyũ mwasyĩkala haguma netu. Ekihugo kiri embere syenyũ. Mwĩkale mutundire mukyo, muyibanire mwʼebindu.

¹¹ Kandi Sekemũ mwabwira Yakobo nʼabagala babo Dĩna ati, Muleke nyibane erĩsĩmwa omo meso wenyũ, nʼebyo mwasyanzwera, nasyabanabyo.

¹² Mwahule omũtahyo, nomo byangabya bingi nʼebihembo, nasyabanabyo ngoko mukandimbwira. Nĩkwa mumbe omwana-muto eribya mũkalĩ wage.

¹³ Nĩkwa abagala ba Yakobo mobasũ bĩrya Sekemũ na Hamorĩ tata wuwe omo matebo, mobabũga batya kusangwa ĩnĩabĩrĩtsandya mwali wabo ye Dĩna.

¹⁴ Neryo mobabwirabo bati, Sitwangatoka erikola ekĩ, eriha mwali wetu oko yutabwene; kusangwa ekyo nĩʼlolo kwĩtwe.

¹⁵ Hali kiguma ekyangatuma ĩtwabalĩgĩra. Mwamasonda eribya nga twe, obuli mulume kwĩnywe ĩnĩabanĩbwa.

¹⁶ Neryo twasyabaha bali betu, netu twasyĩmya bali benyũ, netu twasyĩkala nenyũ, neryo itwabya kihanda kiguma.

¹⁷ Nĩkwa mwamatĩndatowa erĩbanĩbwa, neryo ĩtwĩmya mwali wetu itwagenda ewetu.

¹⁸ Ebĩnywa byabo mobyatsemesya Hamorĩ, na Sekemũ mugala wa Hamorĩ.

¹⁹ Neryo omũlwana oyo mwatalinda erikola omwatsi oyo, kusangwa mwatsema busana na mwali wa Yakobo. Sekemũ naye, abya akengĩrwe kwilaba abosĩ bʼekĩtũnga kya tata wuwe.

²⁰ Neryo Hamorĩ na Sekemũ mugala wuwe mobasa oko kyaganda kyʼomũyĩ wabo, mobakanĩa nʼabalume bʼomũyĩ wabo, bati,

²¹ Abalume aba nĩ bĩra betu. Neryo tuleke bĩkale omo kihugo, batundire mukyo. Kusangwa ekihugo ni kinene kinatolerebo. Twĩmaye bali babo eribya bakalĩ betu, netu tuhebo abana-bato betu.

²² Nĩkwa hali kiguma kisa kyasyaleka abalume aba ĩbĩkala netu, eribya kihanda kiguma, bati obuli mulume omo katĩkatĩ ketu abanĩbawe, ngoko babwene.

²³ Ebihangulo byabo nʼebindu byabo, nʼesyonyama syabo sibyendisyabya byetu kwehĩ? Tũlĩgĩrebo, neryo basyĩkala haguma netu.

²⁴ Neryo abalume bosĩ bʼomũyĩ mobahũlĩkĩrĩrya Hamorĩ na Sekemũ mugala wuwe. Obuli mulume oyũkalĩre, mwabanĩbwa, nʼabosĩ bʼomũyĩ wuwe.

Erĩkwa lyʼabandu ba Sekemũ

²⁵ Neryo mokyabya enyũma wʼaho oko kiro kyʼakasatu, omugulu babya nʼobwagalĩ, ababiri bʼoko bagala ba Yakobo, Sĩmeonĩ na Lawĩ, abagala babo Dĩna, mobĩmya, obuli mundu omũyalĩ wuwe, mobahĩka oko mũyĩ mo basombĩ, mobĩta abalume bosĩ.

²⁶ Mobĩta na Hamorĩ na Sekemũ mugala wuwe omo mũyalĩ, mobatwala Dĩna erĩmũlũsya omo nyũmba ya Sekemũ, neryo mobayigendera.

²⁷ Neryo abandi bagala ba Yakobo mobasa eriya embũlũlĩ, mobahũnga omũyĩ, kusangwa batsandaya mwali wabo.

²⁸ Mobĩmya ebihangulo byabo, nʼesyonde syabo, nʼesyopunda syabo, nʼebyosĩ ebyabya omo mũyĩ, nʼebyabya omo malima,

²⁹ nʼobũsokĩ bwabo bosĩ, nʼabana babo bosĩ nʼabakalĩ babo, mobatwalabo mo banyegwa nʼerĩhũngwa, nʼebyosĩ ebyabya omo manyũmba.

³⁰ Neryo Yakobo mwabwira Sĩmeonĩ na Lawĩ ati, Mwabĩrĩnyagalĩranĩa, mukaleka inakumba nabi oko ndũnĩ syʼekihugo, nʼoko Banya Kanana, nʼoko Baperĩsĩ, kandi, eriganza lyetu nĩ ĩke, basyakuma-kumana busana nage nʼerĩnyĩta. Nage nasyaherĩbwa, ĩngye nʼekĩtũnga kyage.

³¹ Nabo mobabũga bati, Angakolĩre mwali wetu ngʼomũmalaya kwehĩ?