Enzũko 33 - AMASAKO ABOYTRTRE WA NYAMUHANGA AWAKAHULAWA MO BIBLIA

Yakobo na Esaũ bakalolanako

¹ Neryo Yakobo mwasumba ameso wuwe mwatungerera, neryo lebaya Esaũ akasa, haguma nʼabalume magana ani. Neryo mwagabira abana bʼuku Lea, nʼuku Rakelĩ, nʼoko babegerya babiri.

² Neryo mwahĩra ababegerya nʼabana babo embere, na Lea nʼabana buwe omo katĩkatĩ, na Rakelĩ na Yosefũ oko ndũlĩ.

³ Naye mwasoka embere syabo, neryo mũnama oko kitaka esyongendo sirinda, erĩhĩka hakũhĩ na mugala wabo.

⁴ Na Esaũ mwatibita erĩhĩndana naye, mwamuwako, nʼeriwa oko bĩkya biwe, nʼerimulyatsirira. Neryo mobaliriranako nʼemĩsonĩa.

⁵ Neryo Esaũ mwasumba ameso wuwe mwalangira abakalĩ nʼabana, mwabũga ati, Abali haguma nawe ni bahi kwehĩ? Na Yakobo mwabũga ati, Ni bana abo Nyamuhanga abiriha omugombe wawe omwʼiganyira liwe.

⁶ Neryo ababegerya mobasa hakũhĩ haguma nʼabana babo, nabo mobũnama.

⁷ Na Lea nʼabana buwe nibya mobayĩtũnda hakũhĩ, mobũnama. Enyũma wʼaho Yosefũ na Rakelĩ mobasa hakũhĩ, nabo mobũnama.

⁸ Neryo Esaũ mwabũga ati, Emilondo eyo ngabĩhĩndana nayo nĩ yakĩ kwehĩ? Neryo Yakobo mwabũga ati, Eribana erĩsĩmwa omo meso wʼomukama wage.

⁹ Na Esaũ mwabũga ati, Ngwite bingi, mugala wetu. Uleke ebyo uwite bibye byawe.

¹⁰ Na Yakobo mwabũga ati, Iyihi, ngakusaba, nyiti, lino namabya nabiribana erĩsĩmwa omo meso wawe, wangirire oluhembo lwage omo byala byage; kusangwa nabirilangira obũsũ bwawe ngoko mundu akalangira obũsũ bwa Nyamuhanga, nawe wabirinyitsemera.

¹¹ Ngakũbũlaya, wangirire oluhembo lwage olo gulyaleterawa, kusangwa Nyamuhanga abirinyikolera omo lukogo, nʼakandi kusangwa ngwite bingi. Neryo Yakobo mwamuhatikana, naye mwĩmyabyo.

¹² Neryo Esaũ mwabũga ati, Twĩmaye enzira tugende, nage nasyagenda embere syawe.

¹³ Neryo Yakobo mwamũsũbĩrya ati, Omukama wage anasĩ abana ko bali bolo, nʼebihangulo nʼebĩhyo ebiri haguma nage biwite ebyana. Byamabingwa kutsibu, ibikandihola.

¹⁴ Ngakulembalemba nyiti, mukama wage usoke embere syʼomugombe wawe, nage nasyasondolabo bolo-bolo, ngʼolulengo lʼolugendo lwʼesyonde esiri embere syage nʼoko lulengo lʼolugendo lwʼabana, erĩhĩka aho nasyeya omukama wage eSeĩrĩ.

¹⁵ Neryo Esaũ mwabũga ati, Uleke lino ngakũsĩgĩre oko bandu abali haguma nage. Yakobo naye mwabũga ati, Busana nakĩ kwehĩ? Uleke nyibane erĩsĩmwa omo meso wʼomukama wage.

¹⁶ Neryo Esaũ mwasubula ekiro ekyo omo nzira yiwe erĩhĩka eSeĩrĩ.

¹⁷ Yakobo mwahongoka eriya eSũkotĩ, mwayĩhĩmbĩra enyũmba, kandi mwahĩmba otutalikirire busana nʼesyonde siwe. Kyaleka erĩna lyaho iryahulwa mo Sũkotĩ.

¹⁸ Nĩkwa Yakobo mwahĩka buholo oko mũyĩ wʼeSekemũ owali omo kihugo kyʼeKanana omugulu asa akalũa ePadanĩ-aramũ. Mwalalirira omo kyaswa kyʼomũyĩ.

¹⁹ Neryo mwagula ekihande kyʼekitaka aho ahanda ehema yiwe, omo byala byʼabana ba Hamorĩ, ĩse wa Sekemũ, oko bihande byʼekĩtsĩpa erĩgana.

²⁰ Neryo mwahĩmbaho ekiherero, mwalukaho mo Elĩ-elohe-ĩsraeli. Kiti, Nyamuhanga, Nyamuhanga wa Ĩsraelĩ.