Enzũko 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Enzoka ikateba Adamu na Eva

¹ Nĩkwa enzoka yabya nʼamenge kwilaba esyonyama syosĩ syʼomolĩ esyo Mwami Mukulu Nyamuhanga abya iniabirihangika. Neryo moyabũga nʼomũkalĩ, iti, Ega, ko Nyamuhanga abĩrĩbũga ati, Simusyerya oko miti yosĩ yʼeririma kwehĩ?

² Omũkalĩ mwasũbĩrya enzoka ati, Twanganalya oko bĩgũma byʼemiti yʼomwʼirima,

³ nĩkwa oko bĩgũma byʼomuti owali omo katĩkatĩ kʼeririma, Nyamuhanga abĩrĩbũga ati, Simusyerya kubyo, kutse sĩmũsyetũla kugo, mukasyasyahola.

⁴ Enzoka moyabũga nʼomũkalĩ iti, Simwendisyahola nʼahake.

⁵ Kusangwa Nyamuhanga anasĩ ekiro mwasyalya kubyo, ameso wenyũ asyalĩbũlwa, kandi ko mwasyabya nga Nyamuhanga, imwabya nʼeriminya ekibuya nʼekibi.

⁶ Neryo omugulu omũkalĩ alangira omuti kʼowene busana nʼakalyo, nʼakandi kwʼakatsemesaya meso, kandi omuti kwʼanganzwa busana nʼeriyira omundu mo wʼamenge, mwĩmya oko bĩgũma byago, mwalyakyo. Mwahakyo ĩba wuwe, naye mwalyakyo.

⁷ Neryo ameso wʼababiri bosĩ mwalĩbũlwa, mobaminya ko babya ndũmbũ. Neryo mobalandira haguma ebikoma byʼomũtĩnĩ, mobayirabyo mo ngimba.

⁸ Neryo mobowa omulenge wʼOmwami Mukulu Nyamuhanga akalendera omwʼirima omo malengera. Omundu oyo nʼomũkalĩ wuwe mobayĩbĩsa oko bũsũ bwʼOmwami Mukulu Nyamuhanga omo katĩkatĩ kʼemiti yʼeririma.

Eritswerwa lya Adamu na Eva

⁹ Neryo Omwami Mukulu Nyamuha­nga mwabirikira omundu oyo, mwabũga naye ati, Kʼuli hahi?

¹⁰ Naye mwabũga ati, Mongowa omulenge wawe omwʼirima, mongubaha, kusangwa nyiri ndũmbũ, mongayĩbĩsa.

¹¹ Neryo mwamubwira ati, Nindi wakubwira ati uli ndũmbũ? Wabirirya oko muti ogo nakuhana nyiti Susyeryako kwehĩ?

¹² Omundu oyo mwabũga ati, Yo mũkalĩ wamba eribya haguma nage, yo wamba oko bĩgũma byʼomuti oyo, nage monalya.

¹³ Neryo Omwami Mukulu Nyamuhanga mwabũga nʼomũkalĩ ati, Ekyo wakolĩre nĩkĩ kwehĩ? Omũkalĩ mwabũga ati, Enzoka yo yanyiteba, nage monalyakyo.

¹⁴ Neryo Omwami Mukulu Nyamuhanga mwabũga nʼenzoka ati, Kusangwa wabirikola ekĩ, uli mutakirwa kwilaba esyonyama syosĩ syʼeka, na kwilaba esyonyama syosĩ syʼomolĩ; wasyayikura oko nda yawe, wasyalya olũtũtũ ebiro byosĩ byʼeribyaho lyawe.

¹⁵ Kandi nasyahĩra obũyĩgũ omo katĩkatĩ kawe nʼomũkalĩ, nʼomo katĩkatĩ kʼekihanda kyawe nʼekihanda kiwe. Iye asyabanda omutwe wawe, nawe wasyabanda akasĩnzĩro kuwe.

¹⁶ Neryo Nyamuhanga mwabũga nʼomũkalĩ ati, Nasyakanyĩa obwagalĩ bwʼeributa lyawe bo kutsibu. Omo bwagalĩ wasyabuta abana, neryo erisonda lyawe lyasyabya ũkwʼĩbawe, naye asyakutabalako.

¹⁷ Nĩkwa Nyamuhanga mwabũga na Adamu ati, Kusangwa wabirihulikirira omulenge wʼomũkalĩ wawe, kandi wabi­rirya oko bĩgũma byʼomuti, ogo nakuha­na nyiti susyeryako. Ekitaka kyamataki­rwa busana nawe, Omo bũlĩge wasyalya ebyalya byakyo ebiro byosĩ byʼeribyaho lyawe.

¹⁸ Kyasyakũlasĩrya emisakisaki nʼamahwa, nawe wasyalya emyaka yʼomolĩ.

¹⁹ Omo lũnza lʼobũsũ bwawe wasyalya akalyo, erĩhĩka oko kiro wasyasuba oko kitaka, kusangwa walũsĩbawa omo lũtũtũ nʼakandi uli lũtũtũ, nʼakandi wasyasuba omo lũtũtũ.

²⁰ Neryo omundu oyo mwahula erĩna lyʼomũkalĩ wuwe mo Eva, kusangwa abya nyĩnya wʼabosĩ abaliho.

²¹ Omwami Mukulu Nyamuhanga mwakokoterya Adamu nʼomũkalĩ wuwe esyongimba syʼesyongobĩ, mwambalya syobo.

Nyamuhanga akahiga Adamu na Eva bʼomwʼirima

²² Neryo Omwami Mukulu Nyamuhanga mwabũga, ati, Lebaya, omundu oyũ abiribya nga muguma gʼũkwʼĩtwe, eriminya ebibuya nʼebibi. Lino syaswehĩra ebyala biwe erioha ebĩgũma byʼomuti wʼengebe, nʼerirya kubyo, akabyaho akakota.

²³ Kyatuma Omwami Mukulu Nyamuhanga ĩnĩalolyabo eyĩhya wʼeririma lyʼeEdenĩ, alime ekitaka ekyo alũsĩbawamo.

²⁴ Litya mwahigira omundu oyo yʼeyĩhya, neryo mwahĩra Amakerũbĩ oko luhande lwʼendata lwʼeririma lyʼeEdenĩ; nʼomũyalĩ wʼekirimi kyʼomuliro owakatĩmba ehosĩ, busana nʼerĩteya enzira eyʼomuti wʼengebe.