Enzũko 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Yakobo akĩba omũyĩsa

¹ Neryo Ĩsaka abere abibya mũsyakulu, nʼameso wuwe isiakilangira ndeke, mwabirikira mugala wuwe wʼerĩmbere, Esaũ, mwamubwira ati, Mugala wage. Naye mwamũsũbĩrya ati, Nandi hano.

² Naye mwabũga ati, Lebaya lino, indi mũsyakulu, Sĩnyasĩ ekiro kyʼoluholo lwage.

³ Lino, nyiti. Wĩmaye ebindu byawe, olubo lwawe nʼobuta bwawe, ugende omolĩ, unyihigire akanyama.

⁴ Ũnyĩkokoteraye akalyo kasĩhĩre, ngoko nyazĩre, unyiretereko, nyiryeko, omutima wage akutsumule nde nahola.

⁵ Neryo Rebeka mowa omugulu Ĩsaka abya akabũga na Esaũ mugala wuwe. Neryo Esaũ mwagenda omolĩ akayahiga esyonyama nʼeriretasyo.

⁶ Na Rebeka mwabũga na Yakobo mugala wuwe ati, Lebaya, namowa tata wawe akabũga na Esaũ, mugala wenyũ ati,

⁷ Unyiretere eyĩswĩ, ũnyĩkokoteraye akalyo kasĩhĩre, inalya, nʼerikutsumula embere syʼOmwami Mukulu emuliro wʼoluholo lwage.

⁸ Neryo lino, mugala wage, wowe omulenge wage oko kyo ngakuhana.

⁹ Ugende lino omo kihangulo, unyiretere ebyana bibiri byʼembene, ebyowene. Nage ngandĩkokoterya tata wawe yʼakalyo kasĩhĩre, ako anzĩre.

¹⁰ Nawe ukanditwalirako tata wawe, alye, neryo akutsumule embere wʼoluholo luwe.

¹¹ Nĩkwa Yakobo mwabwira Rebeka koyo wuwe ati, Lebaya, Esaũ, mugala wetu, ni mundu wʼobweya, nage indi mundu utendere.

¹² Kwamũhwa tata wage asyanyĩtũlako, inabya ngʼomũtebya. Inayiretera eritakira butsira omũyĩsa.

¹³ Na nyĩnya wuwe mwabũga naye ati, Eritakirwa lyawe libye kwĩngye, mugala wage. Ekiguma kisa, wowe omulenge wage, wendebyo.

¹⁴ Neryo mwendabyo, mwaleterabyo nyĩnya wuwe, na koyo wuwe mwakokotya akalyo kasĩhĩre, ngoko tata wuwe abya anzĩre.

¹⁵ Na Rebeka mwĩmya esyongimba syowene sya Esaũ mugala wuwe, mukulu, esyabya omo nyũmba, mwambalyasyo Yakobo mugala wuwe mulere.

¹⁶ Kandi mwaswika esyongobĩ syʼebyana byʼembene oko byala biwe nʼoko bĩkya biwe ahatendere.

¹⁷ Neryo mwahĩra akalyo kasĩhĩre ako nʼobundu obo atsumba, omo byala bya Yakobo mugala wuwe.

¹⁸ Neryo Yakobo mwasa uku tata wuwe, mwabũga ati, Tata wage. Naye mwabũga ati, Nandi hano. Ulindi kwehĩ mugala wage?

¹⁹ Na Yakobo mwabũga nʼĩse wuwe ati, Ĩngye indi Esaũ akambere kawe. Nabirikola ngoko gulyanyihana. Ngakũbũlaya nyiti, uhangane, Wĩkale ulye oko byʼobuhiyi bwage, omutima wawe atoke erinzumula.

²⁰ Na Ĩsaka mwabũga na mugala wuwe ati, Wamabanasyo uti lũba, mugala wage? Naye mwabũga ati, Kusangwa Omwami Mukulu wawe abĩrĩngwatĩkya eribanasyo lũba.

²¹ Neryo Ĩsaka mwabwira Yakobo ati, Ngakusaba nyiti, Wase hakũhĩ, nyikukoleko, mugala wage, nga nina we, mugala wage Esaũ kwenene, kutse iyihi.

²² Neryo Yakobo mwasegera ahali tata wuwe Ĩsaka, naye mwamũtũlako mwabũga ati, Omulenge ni wa Yakobo, nĩkwa okuboko ni kuboko kwa Esaũ.

²³ Nĩkwa mwatamuminya, kusangwa okuboko kuwe kwabya kʼobweya, ngʼokuboko kwa mugala wabo Esaũ, neryo mwamutsumula.

²⁴ Kandi mwabũga ati, Kwenene nina we mugala wage Esaũ kwehĩ? Naye mwabũga ati, Nĩna ngye.

²⁵ Neryo mwabũga ati, Uletesyo hakũhĩ nage, ngandirya obuhiyi bwʼomugala wage, omutima wage atoke erikutsumula. Naye mwaletasyo hakũhĩ naye, neryo mwalya, kandi mwamuletera ebĩnyũ, mwapũlya.

²⁶ Na Ĩsaka, ĩse wuwe mwabũga naye ati, Lino Wase hakũhĩ, unyilyatsirire, mugala wage.

²⁷ Neryo mwasa hakũhĩ mwamulyatsirira. Naye mwakumbirwa olukimba luwe, mwamutsumula ati, Lebaya, erikumba lya mugala wage Riri ngʼekikumbo kyʼeririma eryo Mwami Mukulu abiritsumula:

Ĩsaka akatsumula Yakobo

²⁸ Nyamuhanga akuhe ekimi kyʼelubula, Nʼomuboga wʼekitaka, Nʼengano nyingi, nʼebĩnyũ bihya-bihya

²⁹ Kandi abandu bakukolere Ebihanda byũname embere syawe; Ubye mukama uku bagala benyũ, Nʼabagala ba koyo wawe bakũnamire; Atakirawe oyukakutakira, Nʼobuli mundu oyukakutsumula atsumulawe.

³⁰ Enyũma wʼaho, Ĩsaka abere abibuga eritsumula Yakobo, na Yakobo abere abĩlũa embere sya Ĩsaka ĩse wuwe, neryo Esaũ mugala wabo mwasa akalũa omo buhiyi buwe.

³¹ Naye mwakokotya akalyo kasĩhĩre, mwaleterako tata wuwe. Mwabũga na tata wuwe ati, Tata wage, ahangane alye esĩswĩ syʼobuhiyi bwa mugala wuwe, omutima wawe atoke erinyitsumula.

³² Na Ĩsaka tata wuwe mwabũga naye ati, Uwendi kwehĩ? Naye mwabũga ati, Ĩngye indi mugala wawe, akambere kawe, Esaũ.

³³ Neryo Ĩsaka mwatitimana kutsibu, mwabũga ati, Ko nindi yulyanyiretera esĩswĩ syʼobuhiyi kwehĩ? Nage nabirirya oko byosĩ ute wasa nʼerimutsumula, ega, naye asyatsumulwa.

³⁴ Omugulu Esaũ owa ebĩnywa bya tata wuwe, mwalira nʼekiriro kinene ekĩkalĩre, neryo mwabũga na tata wuwe ati, Nage unyitsumule, uwe tata wage.

³⁵ Neryo mwabũga ati, Mugala wenyũ mwakasa nʼamenge, abiriheka omũyĩsa wawe.

³⁶ Neryo mwabũga ati, Erĩna liwe molitahulwa mo Yakobo kwenene kwehĩ? Kusangwa abĩrĩmya omwanya wage esyongendo ĩbĩrĩ esĩ. Mwaheka obukulu bwage, kandi lebaya lino abiriheka nʼomũyĩsa wage. Neryo Esaũ mwabũga ati, Sulitanyibikira omũyĩsa kwehĩ?

³⁷ Ĩsaka mwasũbĩrya mwabũga na Esaũ ati, Lebaya, nabirimuyira mo mukama wawe, nabirimuha bagala benyũ bosĩ eribya bagombe buwe. Nabĩrĩmũsĩkya omo ngano nʼebĩnyũ bihya-bihya. Nawe, mugala wage, ngandisyakukolerakĩ kwehĩ?

³⁸ Neryo Esaũ mwabũga nʼĩse wuwe ati, Tata wage, uwite omũyĩsa muguma musa kwehĩ? Unyitsumule nage; uwe tata wage. Neryo Esaũ mwasumba omulenge wuwe, mwalira.

³⁹ Neryo Ĩsaka ĩse wuwe mwamũsũbĩrya mwabũga naye ati, Lebaya obwĩkalo bwawe, bwasyabya hali oko muboga wʼekitaka! Nʼekimi kyʼelubula ekĩkalũa endata, kyasyabya hali!

⁴⁰ Kandi wasyabyaho busana nʼomũyalĩ wawe, Nawe wasyakolera mugala wenyũ; Neryo kikandisyabya omugulu wasyaluha, Wasyalũsya engomo yiwe yʼoko bĩkya byawe.

Obusu bwa Esaũ uku Yakobo

⁴¹ Neryo Esaũ mwakwa Yakobo yʼobusu busana nʼomũyĩsa ogo tata wuwe amutsumulamo. Neryo Esaũ mwabũga omo mutima wuwe ati, Ebiro byʼeririra tata wage biri hakũhĩ; neryo enyũma wʼaho nasyĩta Yakobo mugala wetu.

⁴² Neryo omugulu babwira Rebeka yʼebĩnywa bya Esaũ mugala wuwe mukulu, Rebeka mwatumira uku Yakobo mugala wuwe mulere, mwabũga naye ati, Lebaya! Mugala wenyũ Esaũ akayĩsebelaya omo mutima wuwe busana nʼerĩkwĩta.

⁴³ Na lino, mugala wage, wowe omulenge wage. Uhangane, utibite eyiri Labanĩ mugala wetu eHaranĩ.

⁴⁴ Kandi ubyeyo haguma naye biro bike erĩhĩka aho ekĩnĩga kya mugala wenyũ kyasyahwera.

⁴⁵ Erĩhĩka aho ekĩnĩga kya mugala wenyũ kyasyakũlũĩrako, inibirirwa ekyo wabirimukolera, neryo nasyakutumirako. Busana nakĩ nangakwĩrwa Ĩnywe babiri bosĩ kiro kiguma kwehĩ?

⁴⁶ Neryo Rebeka mwabũga na Ĩsaka ati, Omutima wage amaluha busana bali ba Hetĩ. Yakobo amĩmya omũkalĩ oko bali ba Hetĩ ngʼaba, abali bʼekihugo, engebe yage iyasyangasirakĩ kwehĩ?