Enzũko 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩtahĩbwa lya Rebeka

¹ Neryo Abrahamũ mwabya mũsyakulu, nʼowʼebiro bingi. Neryo Omwami Mukulu mwatsumula Abrahamũ yʼomo myatsi yosĩ.

² Na Abrahamũ mwabũga nʼomugombe wuwe, omukulu wʼenyũmba yiwe, oyo wategaya ebindu biwe byosĩ, ebyo abya nabyo ati, Ũhĩre ebyala byawe oko kihinga kyage,

³ neryo ngandikusema oko Mwami Mukulu Nyamuhanga wʼelubula, na Nyamuhanga wʼekihugo, uti siwendisyĩmĩrya mugala wage omũkalĩ oko bali bʼeKanana, abo nyĩkere nabo,

⁴ nĩkwa wasyaya omo kihugo kyage nʼoko kihanda kyage, eriendayo omũkalĩ busana nʼomugala wage Ĩsaka.

⁵ Neryo omugombe oyo mwabũga naye ati, Kwamũhwa omũkalĩ sĩendĩsyalĩga eringwama omo kihugo kino, kyasyaleka inatwala mugala wawe yʼomo kihugo ekyo walũamo kwehĩ?

⁶ Neryo Abrahamũ mwabũga naye ati, Ũtegaye sũsyesũbaya mugala wage eyo kandi.

⁷ Omwami Mukulu Nyamuhanga wʼel­ubula oyo wandũsaya omo nyũmba ya tata wage nʼomo kihugo ekyo nabutawamo, nʼoyo wakanaya nage, nʼoyo wanyĩlahĩrayako, ati, Nasyaha ekihugo ekĩ oko bana bawe asyatuma omũlaĩka wuwe embere syawe, wasyabanira mugala wage yʼomũkalĩ erĩlũa eyo.

⁸ Nibya omũkalĩ amatĩndalĩga erikukwama isuli ko musango wʼerĩlahĩrya lyage. Nĩkwa ekiguma sũsyesũbaya mugala wage yʼeyo kandi.

⁹ Neryo omugombe mwahĩra ebyala biwe oko kihinga, oko ndungu ya Abrahamũ omukama wuwe; mwalahĩrya oko mwatsi oyo.

¹⁰ Neryo omugombe oyo mwĩmya esyongamia ĩkũmĩ esyʼomukama wuwe, mwahongoka, iniane nʼebindu bibuya byosĩ byʼomukama wuwe omo byala biwe. Neryo mwahangana, mwaya eMesopotamia, erĩhĩka oko mũyĩ wa Nahorĩ.

¹¹ Neryo mwakũkamya esyongamia esyo syʼekyaswa kyʼomũyĩ oko mũsĩke wʼekitehero kyʼamagetsi omwʼĩgolo-golo, omugulu abakalĩ bakayateha amagetsi.

¹² Neryo mwabũga ati, Uwe Mwami Mukulu, Nyamuhanga wʼomukama wage Abrahamũ, ngakũbũlaya nyiti, Umbe omũyĩsa mũnabwĩre, neryo ũkangaye obubuya oko mukama wage Abrahamũ.

¹³ Lebaya, nyinimene oko mũsĩke wʼekitehero kyʼamagetsi, kandi abana-bato bʼomũyĩ bakasyateha amagetsi.

¹⁴ Neryo habye, oko mwana-muto oyo nasyabwira nyiti, Ngakusaba nyiti, wĩkaye erĩrega lyawe, nyĩpũlaye; naye asyabũga ati, Pũlaya, ngandĩsomya nʼesyongamia syawe nibya; neryo abye oyo wabiriyisoga busana nʼomugombe wawe Ĩsaka. Ekyo kyasyaleka inaminya ngoko wabĩrĩkangya obubuya bʼoko mukama wage.

¹⁵ Neryo omugulu abya isialiabuga erĩkanĩa, lebaya, Rebeka mwahuluka, ye mwali wa Betwelĩ, mugala wa Mĩlka muka Nahorĩ, mugala wabo Abrahamũ, ĩnĩanahekĩre erĩrega oko kitigo kiwe.

¹⁶ Omwana-muto oyo abya mubuya kũndũ erilolwako, omumbesa, kandi oyũtasĩbwe nʼomulume. Neryo mwandagalira oko kitehero, mwũsũlya erĩrega liwe, neryo mwahetuka.

¹⁷ Neryo omugombe oyo mwanguha erĩhĩndana naye, mwabũga ati, Ngakusaba, nyiti umbe otugetsi tuke twʼerĩpũlya omwʼĩrega lyawe.

¹⁸ Naye mwabũga ati, Mukama wage, pũlaya; neryo mwanguha erĩkya erĩrega omo byala biwe, mwamũnywĩsya.

¹⁹ Neryo abere abĩmũnywĩsya, mwabũga ati, Nganditehera nʼesyongamia syawe nibya erĩhĩka okwʼibuga enyota.

²⁰ Neryo mwanguha, mwũtũlĩra erĩrega liwe omo kĩrĩnga, neryo mwatibita kandi oko kitehero nʼeriteha, neryo mwatehera esyongamia siwe syosĩ.

²¹ Neryo omundu oyo mwamusamalira kutsibu, mwahula, eriminya Omwami Mukulu ngʼabiritsumula olugendo luwe kutse iyihi.

²² Enyũma wʼaho, esyongamia syabere syabĩpũlya, omundu oyo mwĩmya embũka yʼesyamagetsi, obũlĩto bwayo ni luhande lwʼesekelĩ, nʼesyongaga ĩbĩrĩ busana nʼebyala biwe, obũlĩto bwasyo nĩ sekelĩ ĩkũmĩ.

²³ Neryo mwabũga ati, Uli mwali wandi kwehĩ? Ngakũbũlaya, unyibwire. Ko hane omwanya omo nyũmba ya tata wawe ahʼerigotsera mũnabwĩre kwehĩ?

²⁴ Neryo mwabũga naye ati, Ĩngye indi mwali wa Betwelĩ, mugala wa Mĩlka, oyo abutira Nahorĩ.

²⁵ Nibya mwamubwira ati, Tuwite ebiseso nʼebiti ebitolere, nʼahʼerigotsera.

²⁶ Neryo omundu oyo mũnamya omutwe, mwaramya Omwami Mukulu.

²⁷ Neryo omugombe oyo mwabũga ati, Omwami Mukulu apipawe, Nyamuhanga wʼomukama wage Abrahamũ, oyũtesĩganaya obubuya buwe nʼekwenene yiwe oko mukama wage. Nĩkwa ĩngye, Omwami Mukulu abirinyisondola omo nzira erĩhĩka omo nyũmba yʼabagala babo mukama wage.

²⁸ Neryo omwana-muto oyo mwatibita nʼerĩyatũla ebĩnywa byosĩ ebĩ omo nyũmba ya koyo wuwe.

²⁹ Nĩkwa Rebeka iniawite mugala wabo erĩna liwe iyo Labanĩ. Neryo Labanĩ mwatibita eyiri omundu oyo erĩhĩka oko kitehero.

³⁰ Enyũma wʼaho omugulu alangira embũka, nʼesyongaga oko maboko wa mwali wabo, kandi omugulu owa ebĩnywa bya Rebeka mwali wabo, akabũga ati, Omundu oyo aliambwira atya. Neryo mwaluka ahali omundu oyo, neryo lebaya, inianimene hakũhĩ nʼesyongamia oko kitehero.

³¹ Neryo Labanĩ mwabũga ati, Ingira, uwe, oyo Mwami Mukulu abiritsumula. Busana nakĩ ukahangana ekyaswa kwehĩ? Kusangwa nabĩrĩkokotya enyũmba, nʼomwanya wʼesyongamia.

³² Omundu oyo mwingira omo nyũmba, mwabohola esyongamia. Mwaha esyongamia syʼebiseso nʼebiti, nʼamagetsi wʼerinaba oko bisando biwe nʼebisando byʼabalume ababya naye.

³³ Nʼakalyo mokahĩrwa emuliro siwe alye, nĩkwa mwabũga ati, Sindiendirya nde nabũga obukwenda bwage. Neryo mwabũga ati, Bũgano.

³⁴ Neryo omugombe oyo ati, Ĩngye indi mugombe wa Abrahamũ.

³⁵ Nĩkwa Omwami Mukulu abiritsumula omukama wage yo kutsibu. Abiribya muteke. Abirimuha esyombũlĩ, esyonde, ebĩtsĩpa, nʼesyamagetsi, nʼabagombe bʼobulume, nʼabʼobũkalĩ, nʼesyongamia, nʼesyopu­nda.

³⁶ Na Sara omũkalĩ wʼomukama wage mwabutira omukama wage yʼomugala abibya mukekulu. Neryo mwamuha ebyosĩ abya awite.

³⁷ Nĩkwa omukama wage mwanyisema ati, Sũsyehĩkĩraya mugala wage yʼomũkalĩ oko bali bʼeKanana, abʼomo kihugo nyĩkeremo.

³⁸ Nĩkwa wasyaya omo nyũmba ya tata nʼoko kihanda kyage, wasyahĩkĩrya mugala wage yʼomũkalĩ.

³⁹ Neryo monabũga nʼomukama wage nyiti, Kwamũhwa omũkalĩ siendisyangwama.

⁴⁰ Neryo mwambwira ati, Omwami Mukulu, oyo ngalendera embere siwe, asyatuma omũlaĩka wuwe haguma nawe, asyakuha omũyĩsa gʼomo nzira yawe. Nawe wasyĩmĩrya mugala wage yʼomũkalĩ omo kihanda kyage nʼowʼenyũmba ya tata wage,

⁴¹ neryo Wasyabya butsira musango okwʼĩlahirya lyage, omugulu ũkahĩka oko kihanda kyage. Bamatindakuhaye, Wasyabya butsira musango okwʼĩlahĩrya lyage.

⁴² Neryo mongasa mũnabwĩre oko kitehero, mongabũga nyiti, Uwe Mwami Mukulu, Nyamuhanga wʼomukama wage Abrahamũ, wamanyitsumulira enzira ngayamo.

⁴³ Lebaya, nyimene oko na kitehero kyʼamagetsi. Neryo kibye, omugulu omwana-muto akasa nʼeriteha, oyo ngandibwira nyiti, Ngakusaba nyiti umbe tugetsi tuke omwʼĩrega lyawe erĩpũlya,

⁴⁴ naye amambwira ati, Ũpũlaye, nganditehera nʼesyongamia syawe nibya, oyo abye mũkalĩ oyo Mwami Mukulu abirihamula busana nʼomugala wʼomukama wage.

⁴⁵ Omugulu nde nabuga erĩbũga omwisi wʼomutima wage, lebaya, Rebeka mwakahuluka nʼerĩrega oko kitigo kiwe. Mwakandagalira oko kitehero, neryo mwakateha. Nage mongabũga naye nyiti, Ngakusaba, umbe awʼerĩpũlya.

⁴⁶ Neryo mwakanguha, mwakĩkaya erĩrega erĩlũa oko kitigo kiwe, mwakabũga ati, Upũlaye, ngandĩnywĩsya nʼesyongamia syawe nibya. Neryo monganywa, naye mwakanywĩsaya nʼesyongamia syage nibya.

⁴⁷ Nage mongamũbũlaya nyiti, Uli mwali wandi kwehĩ? Naye mwakabũga ati, Indi mwali wa Betwelĩ, mugala wa Nahorĩ, oyo Mĩlka amubutira. Neryo mongahĩra embũka yʼomo nĩndo yiwe, nʼesyongaga oko maboko wuwe.

⁴⁸ Neryo mongũnamaya omutwe wage, nʼerĩramya nʼeripipa Omwami Mukulu Nyamuhanga wʼomukama wage Abrahamũ, oyo wanyisondola omo nzira itunganene eribana mwali wa mugala wabo mukama wage busana na mugala wuwe.

⁴⁹ Na lino mwamasonda erikola ndeke nʼekwenene oko mukama wage, mumbwire. Byamabya iko bite bitya, mumbwire inatoka erilola oko mali kutse oko malembe.

⁵⁰ Neryo Labanĩ na Betwelĩ mobasũbya bati, Ekĩnywa ekĩ kĩkalũa oko Mwami Mukulu. Sitwangatoka erikubwira kĩnywa kibi kutse kibuya.

⁵¹ Lebaya, Rebeka ali embere syawe, umutwale, ugende naye abye mũkalĩ wa mugala wʼomukama wawe, ngoko Mwami Mukulu abĩrĩbũga.

⁵² Enyũma wʼaho omugulu omugombe wa Abrahamũ owa ebĩnywa byabo, mũnamira Omwami Mukulu ahisi oko kitaka.

⁵³ Neryo omugombe oyo mwahũlũkya ebindu ebĩkangĩre byʼekĩtsĩpa nʼebyʼesyamagetsi, nʼesyongimba, mwahabyo Rebeka. Mwaha na mugala wabo na koyo wuwe ebindu byʼobũgũlĩ bunene.

⁵⁴ Neryo omugombe oyo mwalya nʼerĩpũlya, iye nʼabalume ababya haguma naye, mobĩkalaho omo kiro ekyo kyosĩ. Neryo, mobahangana omo ngyakya-ngyakya, neryo mwabũga ati, Munyihamule nyigende eyiri ornukama wage.

⁵⁵ Neryo mugala wabo na koyo wuwe mobabũga bati, Uleke omwana-muto ĩkale haguma netu biro bike nga biro ĩkũmĩ. Neryo asyagenda.

⁵⁶ Neryo mwabũga nabo ati, Sĩmũnyĩkakĩraye, kusangwa Omwami Mukulu abĩrĩhĩra omũyĩsa oko nzira yage. Munyihamule nyigende eyiri omukama wage.

⁵⁷ Nabo mobabũga bati, Tukandibirikira omwana-muto erĩmũbũlya ĩyowene, ngʼakandĩbũgakĩ.

⁵⁸ Neryo mobabirikira Rebeka, mobamũbũlya bati, Ukandigenda haguma nʼomundu oyũ kwehĩ? Naye mwabũga ati, Ngandigenda.

⁵⁹ Neryo mobahamula mwali wabo, nʼomũlemberĩ wuwe, nʼomugombe wa Abrahamũ, nʼabalume buwe.

⁶⁰ Neryo mobatsumula Rebeka, mobabũga naye bati, Uwe, mwali wetu, ubye nyĩnya wʼamaelfu mangi, kandi abana bawe basyasĩgalya esyongyo syʼabakabakwa obusu.

⁶¹ Neryo Rebeka mwahangana, nʼabana-bato buwe, mobasambira oko syongamia, mobakwama omundu oyo. Omugombe oyo mwatwala Rebeka mwayigendera.

⁶² Nĩkwa Ĩsaka mwasira omo nzira eyĩkalũa eBerĩ-lahaĩ-roĩ. Kusangwa abya ĩkere omo kihugo kyʼelutambi lwʼeyĩkwa.

⁶³ Neryo Ĩsaka mwaya omwʼirima eriyalengekanĩa omwʼĩgolo-golo. Neryo mwasumba ameso wuwe, mwalangira, neryo lebaya, esyongamia sikasa.

⁶⁴ Na Rebeka mwasumba ameso wuwe, neryo omugulu alangira Ĩsaka, mwakĩma oko ngamia.

⁶⁵ Nĩkwa mwabũga nʼomugombe oyo ati, Omundu oyũ nindi oyukalendera omwʼirima nʼerĩhĩndana netu kwehĩ? Omugombe oyo mwabũga naye ati, Ni mukama wage. Neryo Rebeka mwĩmya ekitambara mwayiswikakyo.

⁶⁶ Omugombe mwabwira Ĩsaka yʼemyatsi yosĩ akola.

⁶⁷ Neryo Ĩsaka mwaleta Rebeka omo hema ya nyĩnya wuwe ye Sara, neryo mwĩmya Rebeka, naye mwabya mũkalĩ wuwe. Neryo mwamwanza, na Ĩsaka mwakĩranĩbwa enyũma wʼoluholo lwa nyĩnya wuwe.