Enzũko 22 - AMASAKO ABOYTRTRE WA NYAMUHANGA AWAKAHULAWA MO BIBLIA

Abrahamũ amalengwako eriyahera Ĩsaka mo buhere

¹ Enyũma wʼaho, Nyamuhanga mwalenga uku Abrahamũ, mwamubwira ati, Abrahamũ! Naye mwabũga ati, Nandi hano.

² Neryo mwabũga ati, Lino wĩmaye mugala wawe, ekyusa kyawe, oyo wanzĩre, ye Ĩsaka, uyigendere omo kihugo kyʼeMorĩa, umuherereho oko buhere bwʼerĩhĩsĩrĩrya oko kitwa kiguma ekyo nasyakubwira.

³ Neryo Abrahamũ mwatsinduka omo ngyakya-ngyakya, mwasesa oko punda yiwe, mwatwala abalwana buwe babiri, na Ĩsaka mugala wuwe. Kandi mwatulanga esyongwĩ busana nʼobuhere bwʼerĩhĩsĩrĩrya, mwahongoka, mwagenda aho Nyamuhanga amwahũlĩraya.

⁴ Nʼoko kiro kyʼebisatu Abrahamũ mwasumba ameso wuwe, mwalangiraho mo hali.

⁵ Neryo Abrahamũ mwabwira abalwana buwe ati, Mũsĩgale hano nʼepunda, nage nʼomũiwana tukaya erya, erĩyaramya, nʼeriswasuba aho muli.

⁶ Neryo Abrahamũ mwĩmya esyongwĩ esyʼobuhere bwʼerĩhĩsĩrĩrya mwahekyasyo Ĩsaka mugala wuwe, neryo mwĩmya omuliro nʼomuhamba omo byala biwe. Ababiri mobagenda batya haguma.

⁷ Neryo Ĩsaka mwabũga na tata wuwe Abrahamũ, ati, Tata! Naye mwabũga ati, Ĩngye yono, mugala wage. Naye mwabũga ati, Lebaya, omuliro nʼesyongwĩ byebĩ, nĩkwa ekyana kyʼembũlĩ busana nʼobuhere bwʼerĩhĩsĩrĩrya kirihi kwehĩ?

⁸ Abrahamũ mwamũsũbĩrya ati, Nyamuhanga akandiyibanira ekyana kyʼembũlĩ mo buhere bwʼerĩhĩsĩrĩrĩbwa. Neryo ababiri ko bagenda batya haguma.

⁹ Neryo mobahĩka aho Nyamuhanga amwahũlĩraya, neryo Abrahamũ mwahĩmbaho ekiherero, mwatondekaho esyongwĩ, neryo mwaboha Ĩsaka mugala wuwe, neryo mwamutalika endata oko kiherero, oko ngwĩ.

¹⁰ Neryo Abrahamũ mwasumba okuboko kuwe, mwĩmya omuhamba erikera mugala wuwe.

¹¹ Neryo omũlaĩka wʼOmwami Mukulu mwamubirikira erĩlũa elubula ati, Abrahamũ, Abrahamũ! Naye mwabũga ati, Ĩngye yono hano.

¹² Neryo mwamubwira ati, Sũhĩre ebyala byawe oko mũlwana, kutse sumukole kindu, kusangwa lino nyasĩ ngoko ukubaha Nyamuhanga, kusangwa sulitanyikaga mugala wawe, ekyusa kyawe.

¹³ Neryo Abrahamũ mwasumba ameso wuwe, mwalebya, neryo habya, enyũma siwe embangale ĩnĩnagobenĩe amahembe wayo gʼomo kisaka. Neryo Abrahamũ mwayĩmya embangale, mwaherayo oko buhere bwʼerĩhĩsĩrĩrya moyabya hongo ya mugala wuwe.

¹⁴ Neryo Abrahamũ mwahula erĩna lyaho mo Mwami Mukulu asyabanayo, ngoko kĩkabũgawa erĩhĩka mũnabwĩre kiti, Omo kitwa kyʼOmwami Mukulu moyasyabanika.

Abrahamũ amahabwa omũyĩsa

¹⁵ Neryo omũlaĩka wʼOmwami Mu­kulu mwabirikira Abrahamũ engendo yʼakabiri erĩlũa elubula,

¹⁶ ati, Namayĩlahĩryako, Omwami Mukulu atya, kusangwa wabirikola ekĩ, sulitanyikaga erimba mugala wawe, ekyusa kyawe.

¹⁷ Omwʼitsumula ngandisyakutsumula, nʼomwʼikanya nasyakanyĩrĩrya abana bawe ngʼesyongũnũnũ esiri omo kyanya, kandi ngʼemisege yʼoko mũsĩke wʼengetsi. Kandi abana bawe basyasĩgalya olũkyo lwʼesyonzĩgũ syabo.

¹⁸ Kandi Nasyatsumula ebihanda byosĩ byʼekihugo kusangwa wabirikenga omulenge wage.

¹⁹ Neryo Abrahamũ mwasuba eyiri abalwana buwe, nabo mobahangana mobagenda haguma erĩhĩka eBerĩseba. Nĩkwa Abrahamũ mwĩkala eBerĩseba.

²⁰ Neryo enyũma wʼaho Abrahamũ mwabwirwa ambu, Talebaya, Mĩlka abiributira mugala wenyũ Nahorĩ yʼabana.

²¹ Ye Ũsĩ ni Kambere kuwe, na Bũzĩ ni mugala wabo, na Kemwelĩ ĩse wa Aramũ.

²² Kandi Kesedĩ, na Hazo, na Pĩldasĩ, na Ĩdĩlafũ, na Betwelĩ.

²³ Na Betwelĩ mwabuta Rebeka. Omunani oyo bo Mĩlka abutira Nahorĩ, mugala wabo Abrahamũ.

²⁴ Omũhwekĩ wuwe, erĩna liwe Reũma, iye nibya yo wabuta Teba na Gahama, na Tahasĩ, na Maka.