Enzũko 18 - AMASAKO ABOYTRTRE WA NYAMUHANGA AWAKAHULAWA MO BIBLIA

Abalaĩka basatu bakayabana Abrahamũ

¹ Neryo Omwami Mukulu mwamuhulukirako hakũhĩ nʼemiti yʼeMamũre, omugulu abya ĩkere omo lũkyo lwʼehema, omugulu eryuba lyasingirira.

² Neryo mwasumba ameso wuwe mwalangira, neryo, lebaya, abandu basatu ibanimene embere siwe. Omugulu alangirabo, mwatibita nʼerĩhĩndana nabo akalũa omo lũkyo lwʼehema, neryo mũnama erĩhĩka oko kitaka,

³ neryo mwabũga ati, Mukama wage, namabya nabĩrĩsĩmwa omo meso wawe ngakusaba sutwangane oko mugombe wawe.

⁴ Uleke lino haletawe otugetsi, mweraye ebisando byenyũ muluhukire omo ndĩna yʼomuti.

⁵ Nage ngandiyenda akahande kʼobundu akʼerĩsũbya emitima yenyũ yʼomo nda, enyũma wʼaho imwalaba, kusangwa muliasa oko mugombe wenyũ. Nabo mobabũga bati, Ukole utya ngoko wabĩrĩbũga.

⁶ Neryo Abrahamũ mwanguha erĩhĩka omo hema uku Sara, mwamubwira ati, Ũkokotaye lũba ehĩrengĩ hisatu hyʼeyĩsyano yowene, utsumbeyo mo mandu.

⁷ Neryo Abrahamũ mwatibita eyiri esyonde, mwaleta akanume kalere akoloberere, akowene. Mwahako omugombe, naye mwanguha erĩsĩnzako.

⁸ Neryo mwĩmya amagũta, nʼamasabũ, nʼekyana kyʼende ekyo akokotaya, mwahĩrabyo embere syabo. Neryo mwahangana hakũhĩ nabo omo ndĩna yʼomuti, neryo mobalya.

⁹ Neryo mobabũga naye bati, Sara, omũkalĩ wawe alihi kwehĩ? Naye mwabũ­ga ati, Ane halya, omo hema.

¹⁰ Neryo mwabũga ati, Kwenene nasyasuba ukʼuwe oko mugulu ono oko mwaka owakasa. Neryo lebaya, Sara omũkalĩ wawe asyabana omugala. Nĩkwa Sara abya akahulikirira oko lũkyo lwʼehema eyabya enyũma wuwe.

¹¹ Neryo Abrahamũ na Sara babya bakulu, ibabiribuga myaka mingi, kandi Sara ĩnĩamabĩũmbya oko mitsye yʼabakalĩ.

¹² Neryo Sara mwasekera omo mutima, ati, Ĩngye namabikula nasyabana obutseme nʼomukama wage naye ni mũsyakulu kwehĩ?

¹³ Nĩkwa Omwami Mukulu mwabũga na Abrahamũ ati, Busana nakĩ Sara amaseka, ati, Kwenene nage nasyabuta omwana inyine mukekulu kwehĩ?

¹⁴ Ko hane kindu ekyangatoka erĩsĩnga Omwami Mukulu kwehĩ? Oko mugulu ahulawa nasyasuba eyo guli, oko mugulu ono, oko mwaka owakasa, Sara asyabana mugala.

¹⁵ Neryo Sara mwayigana, ati, Mondetaseka; kusangwa abya akubaha. Naye mwabũga ati, Iyihi; ka mukaseka.

Abrahamũ akasaba busana nʼeSodomo

¹⁶ Neryo abandu abo mobahangana, mobalola ebwanga bwʼeSodomo. Neryo Abrahamũ mwagenda nabo eritsindikabo.

¹⁷ Nĩkwa Omwami Mukulu mwabũga ati, Nasyabĩsa uku Abrahamũ ekyo ngakola kwehĩ?

¹⁸ Kusangwa kwenene asyabya kihanda kinene kyʼamaka, nʼebihanda byosĩ byʼekihugo byasyatsumulwa omwisi siwe.

¹⁹ Kwenene nabiriyisogaye iniatoka erihana abana buwe nʼenyũmba yiwe enyũma siwe, ĩbateya enzira yʼOmwami Mukulu erikola ekitunganene nʼeritswera eritunganene. Neryo Omwami Mukulu atoke eriretera Abrahamũ yʼebyo amulaga.

²⁰ Neryo Omwami Mukulu mwabũga ati, Ekiriro kyʼeSodomo nʼeGomora ni kyingyi, kandi ebibi byabo ni bitsibu kũndũ.

²¹ Ngandiandagala lino, nʼerilangira nga babirikola batya ngʼekiriro kyayo, ekyabĩrĩnyĩhĩkako, kite kitya, ngandisyaminya.

²² Neryo abandu abo mobabinduka erĩlũaho mobalola eSodomo nĩkwa Abrahamũ iniakinahangene embere syʼOmwa­mi Mukulu.

²³ Neryo Abrahamũ mwasegera hakũhĩ, mwabũga ati, Wasyaherya abatunganene haguma nʼababi kwehĩ?

²⁴ Hamabya hali makũmĩ atanu atunganene omo mũyĩ; wasyaheryago ĩsĩwendĩsyabalyago busana nʼamakũmĩ atanu abatunganene abalimo kwehĩ?

²⁵ Ekyo kibye hali ukʼuwe erikola omuhanda oyũ, erĩĩta abatunganene haguma nʼababi, litya abatunganene ibabya ngʼababi, ekyo kibye hali ukʼuwe. Ko Mũtswerĩ wʼekihugo kyosĩ siendisyatswera omo litunganene kwehĩ?

²⁶ Neryo Omwami Mukulu mwabũga ati, Nameya omo mũyĩ wʼeSodomo mo makũmĩ atanu abatunganene, ĩnabalya ehosĩ busana nabo.

²⁷ Neryo Abrahamũ mwamũsũbĩrya mwabũga ati, Lebaya lino, ko namalenga eribuga nʼOmwami Mukulu, ĩngye indi olũtũtũ nʼerĩbũ lisa.

²⁸ Hamabula batanu omo bandu makũmĩ atanu abatunganene, wasyaherya omũyĩ gosĩ busana nʼeribula abatanu kwehĩ? Neryo mwabũga ati, Sĩndĩendĩheryago, nameyaho amakũmĩ ani nʼabatanu.

²⁹ Neryo kandi mwabũga naye ati, Kwa­mũhwa ihabanika makũmĩ ani. Neryo mwabũga ati, Sĩndĩendĩsyaheryago busana nʼamakũmĩ ani.

³⁰ Neryo mwabũga ati, Omwami Mukulu siahitane, nage ngandĩbũga; kwamũhwa hasyabanika amakũmĩ asatu? Neryo mwabũga ati, Sindiendikolakyo nameyaho amakũmĩ asatu.

³¹ Neryo mwabũga ati, Talebaya lino, nabirirenga erĩbũga nʼOmwami Mukulu, kwamũhwa, hasyabanika amakũmĩ abiri? Neryo mwabũga ati, Sĩndĩendĩheryago busana nʼamakũmĩ abiri.

³² Neryo mwabũga ati, Omwami Mukulu siahitane, ngandĩswabũga ngendo nguma nyisa; kwamũhwa ihabanika ĩkũmĩ? Neryo Nyamuhanga mwabũga ati, Sĩndĩendĩsyaheryago busana nʼerĩkũmĩ.

³³ Neryo Omwami Mukulu abere abibuga erĩkanĩa na Abrahamũ, mwalũaho na Abrahamũ mwasuba ewuwe.