Enzũko 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Abramu amahulwa mo Abrahamũ

¹ Neryo omugulu Abramu abya wʼemyaka makũmĩ mwenda nʼomwenda Omwami Mukulu mwamuhulukira, mwabũga naye ati, Ĩngye indi Nyamuhanga Omũtokĩ Wʼebyosĩ. Ulendere embere syage, ũhĩkane.

² Nage nasyayira endagano yage omo katĩkatĩ kage nawe, nasyakũkanyĩrĩrya kutsibu.

³ Neryo Abramu mwalambama, neryo Nyamuhanga mwakanĩa naye ati,

⁴ Nĩkwa ĩngye, lebaya, endagano yage iri haguma nawe, Wasyabya ĩse wʼebihanda bingi.

⁵ Kandi erĩna lyawe siryendisyaswahulwa mo Abramu, nĩkwa erĩna lyawe lyasyahulwa mo Abrahamũ kusangwa nabirikuyira mo tata wʼebihanda bingi.

⁶ Neryo nasyakũkanyĩrĩrya kutsibu, kandi nasyakuyira mo bihanda, nʼabami basyatsũka ukʼuwe.

⁷ Neryo nasyahanganĩa endagano yage omo katĩkatĩ kage nawe nʼoko bana bawe enyũma syawe oko syondengo syabo busana nʼendagano ya kera na kera, eribya Nyamuhanga ukʼuwe nʼoko bana bawe enyũma wawe.

⁸ Kandi nasyakuha, nʼoko bana bawe enyũma wawe, ekihugo ekyo wabirirenderamo mo mubunga, ekihugo kyosĩ kyʼeKanana, eribya bũsokĩ bwawe bwa kera na kera, nage nasyabya Nyamuhanga wabo.

Endagano yʼerĩbanĩa

⁹ Kandi Nyamuhanga mwabwira Abrahamũ ati, Nĩkwa uwe, wasyateya endagano yage, uwe, nʼabana bawe enyũma wawe oko syondengo syabo syosĩ.

¹⁰ Eyĩ ni ndagano yage, eyo mwasyateya, omo katĩkatĩ kage nawe nʼabana bawe enyũma syawe, obuli mulume omo katĩkatĩ kenyũ asyabanĩbwa.

¹¹ Nenyũ mwasyabanĩbwa omo mubiri wʼengoba, nʼekyo kyasyabya kiminyikalo kyʼendagano omo katĩkatĩ kage nenyũ.

¹² Nʼoyo wamabya wʼebiro munani omo katĩkatĩ kenyũ asyabanĩbwa, obuli mulume omo katĩkatĩ kʼesyondengo syenyũ, omubutwa omo nyũmba, kutse oyukagulawa oko franka oko bandu bʼehandi ate oko bana bawe.

¹³ Oyukabutawa omo nyũmba yawe, nʼoyukagulawa oko franka, atolere ĩnĩabanĩbwa. Neryo endagano yage yasyabya omo mubiri wenyũ mo ndagano ya kera na kera.

¹⁴ Omulume oyutabwene omo mubiri wʼengoba, omundu oyo iniahigwa erĩlũsĩbwa oko bandu buwe, abiriketa endagano yage.

Saraĩ amahulwa mo Sara

¹⁵ Neryo Nyamuhanga mwabũga na Abrahamũ ati, Nĩkwa busana na Saraĩ mũkalĩ wawe, siwendisyaswahula erĩna liwe mo Saraĩ, nĩkwa erĩna liwe lyasyabya Sara.

¹⁶ Nasyamutsumula, nʼakandi nasyakuha omugala ukwʼiye, ega, nasyamutsumula, naye asyabya nyĩnya wʼebihanda, nʼabami bʼebihanda basyatsũka ukwʼiye.

¹⁷ Neryo Abrahamũ mwalambama, mwaseka, mwabũga omo mutima wuwe ati, Omwana asyabutwa oko wʼemyaka erĩgana kwehĩ? Na Sara naye, oyũ wʼemyaka makũmĩ mwenda, asyabuta kwehĩ?

¹⁸ Neryo Abrahamũ mwabũga na Nyamuhanga ati, Kumbe Ĩsĩmaelĩ iwabyaho embere syawe!

¹⁹ Neryo Nyamuhanga mwabũga ati, Iyihi, nĩkwa Sara mũkalĩ wawe asyakubutira omugala, nawe wasyahula erĩna liwe mo Ĩsaka. Nage nasyahanganĩa endagano yage haguma naye oko ndagano ya kera na kera busana nʼabana buwe enyũma wuwe.

²⁰ Nĩkwa busana na Ĩsĩmaelĩ, nabĩrĩkowa, lebaya, nabirimutsumula, nasyamũkanyĩrĩrya nʼerimutomekera kutsibu. Asyabuta abakama erĩkũmĩ nʼababiri, kandi nasyamuyira mo kihanda kinene.

²¹ Nĩkwa endagano yage nasyahanganĩayo na Ĩsaka, oyo Sara asyakubutira oko mugulu ono, oko mwaka owakasa.

²² Neryo Nyamuhanga abere abibuga erĩkanĩa na Abrahamũ, Nyamuhanga mwahetuka akalũa uku Abrahamũ.

²³ Neryo Abrahamũ mwĩmya Ĩsĩmaelĩ mugala wuwe, nʼabosĩ ababutawa omo nyũmba yiwe nʼabosĩ abagulawa oko franka, obuli mulume omo katĩkatĩ kʼabalume bʼenyũmba ya Abrahamũ, mwabanĩa omubiri wʼengoba yabo oko kiro ekyo, ngoko Nyamuhanga amubwira.

²⁴ Neryo Abrahamũ abya wʼemyaka makũmĩ mwenda nʼomwenda, omugulu abanĩbawa omo mubiri wʼengoba yiwe.

²⁵ Na Ĩsĩmaelĩ omugala wuwe abya wʼemyaka ĩkũmĩ nʼĩsatu, omugulu abanĩbawa omo mubiri wʼengoba yiwe.

²⁶ Ekiro ekyo Abrahamũ mwabanĩbwa, na mugala wuwe Ĩsĩmaelĩ.

²⁷ Nʼabalume bosĩ bʼenyũmba yiwe, nʼababutawamo, nʼabagulawa oko franka oko bandu bʼehandi, mobabanĩbwa haguma naye.