Enzũko 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Eributwa lya Isĩmaelĩ

¹ Nĩkwa Saraĩ, muka Abramu, mwatamubutira bana. Neryo abya awite omukobe wʼobũkalĩ, Omunya Mĩsĩrĩ, erĩna liwe lyabya Hagarĩ.

² Neryo Saraĩ mwabũga na Abramu ati, Lebaya lino, Omwami Mukulu abĩrĩnyĩgũmbahya, ngakusaba, nyiti, Wĩmaye omukobe wage wʼobũkalĩ, mbino nasyabana abana busana naye. Neryo Abramu mwahulikirira omulenge wa Saraĩ.

³ Neryo Abramu abere abĩkala omo kihugo kyʼeKanana emyaka ĩkũmĩ, Saraĩ muka Abramu, mwĩmya Hagarĩ Munya Mĩsĩrĩ, omukobe wuwe wʼobũkalĩ, mwamuha Abramu ĩba wuwe, eribya mũkalĩ wuwe.

⁴ Neryo Abramu mwĩmya Hagarĩ, naye mwaheka obukule. Neryo omugulu alangira kwʼamabiheka obukule, Hagarĩ mwapona omugole wa Abramu.

⁵ Neryo Saraĩ mwabũga na Abramu ati, Obubi bwage bubye ukʼuwe. Ĩngye nakuha omukobe wage wʼobũkalĩ oko kĩkũba kyawe. Abere abilangira kwʼamaheka obukule, monaponwa omo meso wuwe, Omwami Mukulu atswere omo katĩkatĩ kawe nage.

⁶ Nĩkwa Abramu mwabũga na Saraĩ ati, Lebaya, omukobe wawe ali omo byala byawe umukole ekyo wanzĩre. Neryo Saraĩ mwakala uku Hagarĩ. Nĩkwa Hagarĩ mwatibita.

⁷ Nĩkwa omũlaĩka wʼOmwami Mukulu mweya Hagarĩ okwʼĩsoko yʼamagetsi omo mbwarara, hakũhĩ nʼeyĩsoko omo nzira yʼeSũrĩ.

⁸ Neryo omũlaĩka mwabũga ati, Uwe Hagarĩ, omukobe wʼobũkalĩ wa Saraĩ ũkalũahi, kutse ukayahi kwehĩ? Naye mwabũga ati, Ngasaga nʼerĩlũa omo meso wʼomugole Saraĩ.

⁹ Neryo omũlaĩka wʼOmwami Mukulu mwabũga naye ati, Usube oko mugole, uyibombeke omo byala biwe.

¹⁰ Kandi omũlaĩka wʼOmwami Mukulu mwabũga naye ati, Nasyakanyĩrĩrya abana bawe bo kutsibu, nabo sibendisyaganzwa oko bungi bwabo.

¹¹ Kandi omũlaĩka wʼOmwami Mukulu mwamubwira ati, Lebaya, uli nʼobukule, wasyabuta mugala. Wasyahula erĩna liwe mo Ĩsĩmaelĩ, kusangwa Omwami Mukulu abĩrĩowa obũlĩge bwawe.

¹² Naye asyabya ngʼepunda yʼomolĩ omo katĩkatĩ kʼabandu, ebyala biwe byasyalwa nʼobuli mundu, nʼebyala byʼobuli mundu byasyalwa naye. Naye asyabya enzĩgũ oko bagala babo bosĩ.

¹³ Neryo Hagarĩ mwabirikira erĩna lyʼOmwami Mukulu oyo wabũga naye ati, Uli Nyamuhanga oyukalangira kusangwa abuga ati, Namalangira oyukanyilolako kwehĩ?

¹⁴ Neryo kyaleka ekitsinga ikyahulwa mo Berĩlahaĩ-roĩ; lebaya kiri omo katĩkatĩ kʼeKadese nʼeBeredĩ.

¹⁵ Neryo Hagarĩ mwabutira Abramu yʼomugala, na Abramu mwahula erĩna lyʼomugala wuwe oyo Hagarĩ amubutira, mo Ĩsĩmaelĩ.

¹⁶ Neryo Abramu abya wʼemyaka makũmĩ munani na ndatu, omugulu Hagarĩ amubutira Ĩsĩmaelĩ.