Enzũko 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Endagano ya Nyamuhanga uku Abramu

¹ Enyũma wʼemyatsi eyo ekĩnywa kyʼOmwami Mukulu mokyahĩka uku Abramu omo nzolĩ kiti, Sigubahe, Abramu; Ĩngye indi ngabo busana nawe; oluhembo lwawe lwasyabya lunene.

² Neryo Abramu mwabũga ati, Mwami Mukulu Nyamuhanga, wasyambakĩ, nage singwite omwana? Kandi Elĩezerĩ oyũ wʼeDamasĩkĩ asyabya mwenye mwandu wage.

³ Neryo Abramu mwabũga ati, Lebaya, sulitamba omwana; neryo lebaya, oyo wabutawa omo nyũmba yage nĩ mũlĩ wʼomwandu wage.

⁴ Kandi, lebaya, ekĩnywa kyʼOmwami Mukulu mokyamũhĩkako kiti, Omundu oyũ yutendisyabya mũlĩ wʼomwandu wawe, nĩkwa mugala wawe asyabya mũsĩgalya wawe.

⁵ Neryo Nyamuhanga mwamũhũlũkĩrya eyĩhya mwabũga ati, Ũlebaye omo kyanya, uganze esyongũnũnũ, wamabya wanganatoka eriganzasyo. Neryo mwabũga naye ati, Abana bawe ko basyabya batya.

⁶ Naye mwĩkĩrĩrya Omwami Mukulu, neryo iye mwamuganziralyo mo mutunganene.

⁷ Neryo Nyamuhanga mwabũga naye ati, Ĩngye indi Mwami Mukulu oyo wakuleta erĩlũa eŨrĩ yʼeKaldea erikuha ekihugo ekĩ mo ndagane.

⁸ Neryo Abramu mwabũga ati, Uwe Mwami Mukulu Nyamuhanga, nasyaminya nyiti ngoko nasyasĩgalyakyo kwehĩ?

⁹ Neryo mwabũga naye ati, Ĩmaya enyana yʼemyaka ĩsatu, nʼesũhene yʼemyaka ĩsatu, nʼembangale yʼemyaka ĩsatu, nʼakatungula, nʼekyana kyʼakalĩkũkũ.

¹⁰ Neryo mwĩmya ebyosĩ ebĩ, neryo mwagabasyo mo luhande-luhande, mwahĩra obuli luhande oko lundi luhande nĩkwa esyonyonyũ mwatagabasyo.

¹¹ Ebihũngu mobyandagalira endata oko bĩnda, neryo Abramu mwahigabyo.

¹² Neryo omugulu eryuba lyalenga, Abramu mwaya otũgotserĩ tunene, neryo lebaya eriubaha lyʼomwĩrĩmya munene molyamuhamba.

¹³ Neryo Nyamuhanga mwabũga na Abramu ati, Uminye ndeke kwʼabana bawe basyabya babunga omo kihugo kite kyabo, neryo basyakolera abandu bayo, basyagalyabo emyaka magana ani.

¹⁴ Nĩkwa ekihanda ekyo basyakolera nasyatswerakyo, nʼenyũma wʼaho basyalũayo nʼebindu binene.

¹⁵ Nĩkwa uwe wasyeya abotata-kulu wawe nʼobuholo, wasyatabwa wabikululira ndeke.

¹⁶ Nʼoko lulengo lwʼakani basyasuba eno kandi, kusangwa obubi bwʼOmunya Amorĩ sĩbwebwahĩkana.

¹⁷ Neryo omugulu eryuba lyalenga, iniamabibya mwĩrĩmya, lebaya, ekĩrĩko ekĩkatũmba, ekisosomole kyʼekirimi kyʼomuliro, mobyalaba omo katĩkatĩ kʼebihande ebĩ.

¹⁸ Oko kiro ekyo Omwami Mukulu mwayira endagane na Abramu ati, Nasyaha ekihugo ekĩ oko bana bawe erĩtsũka oko lũsĩ lwʼeMĩsĩrĩ erĩhĩka oko lũsĩ lunene lwʼeEfũratĩ.

¹⁹ Ekihugo kyʼOmũkenĩ, Omũkenĩsĩ, Omũkadĩmonĩ,

²⁰ Omũhĩtĩ, Omũperĩzĩ, Omũrefaĩmũ,

²¹ Omũamorĩ, Omukanana, nʼOmũyebũsĩ.