Enzũko 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Amalwa wʼabami mwenda

¹ Neryo oko biro bya Amũrafelĩ Omwami wʼeSĩnarĩ, na Arĩokĩ Omwami wʼeElasarĩ, na Kedorĩ-laomerĩ Omwami wʼeElamũ, na Tĩdalĩ Omwami wʼeGoĩmĩ,

² mobalwa na Bera Omwami wʼeSodomo, na Bĩresa Omwami wʼeGomora, na Sĩnabũ Omwami wʼeAdĩma, na Semeberĩ Omwami wʼeZeboĩmũ, nʼomwami wʼeBela. Oyũ nĩ Zoarĩ.

³ Abosĩ aba mobahĩndana haguma omo musya wʼeSĩdĩmũ. Eyo ye ngetsi yʼomũnyũ.

⁴ Oko myaka erĩkũmĩ nʼeyĩbĩrĩ babya bakakolera Kedorĩ-laomerĩ, nʼoko mwaka wʼerĩkũmĩ nʼeyĩsatu mobakarama mobahona.

⁵ Nʼoko mwaka wʼerĩkũmĩ nʼeyĩnĩ Kedorĩ-laomerĩ, nʼabami babya haguma naye mobasa mobĩta Abarefaĩmũ oko Astarotĩ-karanaĩmũ, nʼAbazũzĩ eHamũ, nʼAbaemĩ eSawe-kĩrĩataĩmũ,

⁶ nʼAbahorĩ oko kitwa kyabo kyʼeSeĩrĩ, erĩhĩka Elĩparanĩ, ekiri hakũhĩ nʼembwarara.

⁷ Neryo mobasubula, mobasa oko Enĩ-mĩsĩpatĩ. Eyo ye Kadese. Neryo mobĩta ekihugo kyosĩ kyʼAbamelekĩ, nʼekyʼAbaamorĩ, ababya bĩkere eHazezonĩ-tamarĩ.

⁸ Neryo Omwami wʼeSodomo mwahuluka, nʼomwami wʼeGomora, nʼomwami wʼeAdĩma, nʼomwami wʼeZeboĩmũ, nʼomwami wʼeBela. Eyo ye Zoarĩ. Mobategeka oluhi lwabo omo musya wʼeSĩdĩmũ,

⁹ erilwa na Kedorĩ-laomerĩ Omwami wʼeElamũ, na Tĩdalĩ Omwami wʼeGoĩmĩ, na Amũrafelĩ Omwami wʼeSĩnarĩ, na Arĩokĩ Omwami wʼeElasarĩ, abami bani erilwa nʼabatanu.

¹⁰ Nĩkwa omusya wʼeSĩdĩmũ abya oswĩre mwʼebyũna byʼeribumba. Abami bʼeSodomo nʼeGomora mobatibita, mobatogongera mubyo, nʼabasaka mobatibita oko bitwa.

¹¹ Neryo abakĩndabo mobahũnga ebindu byosĩ byʼeSodomo nʼeGomora, nʼakalyo kabo kosĩ, neryo mobayigendera.

¹² Kandi mobatwala na Lotĩ, omwana wa mugala wabo Abramu, oyo wabya ĩkere eSodomo, nʼebindu biwe, neryo mobalũayo.

¹³ Neryo omuguma oyo wabala mwasa, mwabwira Abramu Omuebrania. Nĩkwa abya ĩkere hakũhĩ nʼemiti yʼeMamũre, Omunya Amore, mugala wabo Eskorĩ, kandi ni mugala wabo Anerĩ. Aba babya basakene na Abramu.

¹⁴ Neryo omugulu Abramu owa ko mugala wabo abirinyegwa, mwasondola abalume buwe abo ĩgĩsaya amalwa, ababutawa omo nyũmba yiwe, amagana asatu nʼerĩkũmĩ nʼomunani, neryo mwakwamirirabo erĩhĩka eDanĩ.

¹⁵ Neryo Abramu mwagabanĩa abagombe buwe omo kiro, neryo mwĩta esyonzĩgũ esyo, kandi mwakwamirirabo erĩhĩka eHoba, eyiri oko luhande lwʼamalembe lwʼeDamasĩkĩ.

¹⁶ Neryo mwasũbũlya ebindu byosĩ, mwaleta mugala wabo ye Lotĩ, nʼebindu biwe, nʼabakalĩ, nʼabandu.

¹⁷ Neryo Omwami wʼeSodomo mwayahĩndana naye akasubula okwʼĩta Kedorĩ-laomerĩ nʼabami ababya haguma naye, omo musya wʼeSawe. Oyo go musya wʼOmwami.

¹⁸ Neryo Melkĩsedekĩ Omwami wʼeSalemĩ mwaleta obundu nʼebĩnyũ. Naye abya mũhererĩ wa Nyamuhanga Wʼendata Kutsibu.

¹⁹ Neryo Melkĩsedekĩ mwatsumula Abramu, ati, Omũyĩsa abye uku Abramu wa Nyamuhanga Wʼendata Kutsibu, Omũhangĩkĩ wʼolubula nʼekihugo;

²⁰ Nyamuhanga Wʼendata Kutsibu apipawe, oyo wahĩra esyonzĩgũ syawe omo byala byawe. Neryo Abramu mwamuha ekiguma kyʼerĩkũmĩ oko byosĩ.

²¹ Nĩkwa Omwami wʼeSodomo mwabwira Abramu ati, Umba bandu, nawe wĩmaye ebindu.

²² Nĩkwa Abramu mwabuga nʼomwami wʼeSodomo ati, Nabirisumba ebyala byage oko Mwami Mukulu, Nyamuhanga Wʼendata Kutsibu, Omũhangĩkĩ wʼolubula nʼekihugo.

²³ Nyiti sĩndĩendĩmya engohe kutse omũlĩkĩ wʼesyongendero kutse kandu kahi kawe uwite, ũkasyabũga uti, Namatekesya Abramu;

²⁴ bye nʼebyo abalwana balya, nʼekihande kyʼabalume abagenda haguma nage, Anerĩ, Esĩkolĩ, na Mamũre, ulekebo bĩmaye amagabo wabo.