Enzũko 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihangikwa lyʼekihugo

¹ Okwʼĩtsũka Nyamuhanga mwahangika olubula nʼekihugo.

² Nʼekihugo mokyabya mulala butsira kindu; nʼomwĩrĩmya abya endata oko mitobero; nʼOmũlĩmũ wa Nyamuhanga abya akalereta endata oko magetsi.

³ Neryo Nyamuhanga mwabũga ati, Habye ekyakakala; neryo ekyakakala mokyabyaho.

⁴ Neryo Nyamuhanga mwalangira ekyakakala ko kyowene; neryo mwagaba ekyakakala nʼomwĩrĩmya.

⁵ Neryo Nyamuhanga mwahula ekyakakala mo musibo, nʼomwĩrĩmya mwahulago mo kiro. Neryo mobwabya ĩgolo-golo, kandi mobwabya engyakya, kye kiro kiguma.

⁶ Neryo Nyamuhanga mwabũga ati, Habye ekyanya omo katĩkatĩ kʼamagetsi, neryo kigabe amagetsi nʼamagetsi.

⁷ Neryo Nyamuhanga mwahangika ekyanya, neryo mwagaba amagetsi awali eyĩkwa oko kyanya nʼamagetsi awali endata wʼekyanya; neryo mokyabya kitya.

⁸ Nʼekyanya Nyamuhanga mwahulakyo mo Lubula. Neryo mobwabya ĩgolo-golo, kandi mobwabya engyakya, ekyo kye kiro kyʼakabiri.

⁹ Neryo Nyamuhanga mwabũga ati, Amagetsi awali eyĩkwa wʼelubula ahĩndane haguma, nʼekitaka kyũmĩre kihuluke. Neryo mokyabya kitya.

¹⁰ Neryo Nyamuhanga mwahula ekitaka kyũmĩre mo kihugo. Nʼerĩhĩndana lyʼamagetsi mwahulalyo mo ngetsi: neryo Nyamuhanga mwalangira ko byowene.

¹¹ Neryo Nyamuhanga mwabũga ati, Ekitaka kĩlasaye ebiti, nʼesyonyenyĩ esikabuta embuto, nʼemiti yʼebĩgũma moyaheta kwʼebĩgũma ngʼomũsĩndo wayo, eyiwite embuto yayo, oko kihugo: neryo mobyabya bitya.

¹² Nʼekitaka mokyalasya ebiti, nʼesyonyenyĩ mosyabuta embuto ngʼomũsĩndo wasyo, nʼemiti moyaheta kwʼebĩgũma obuli mbuto byayo, ngʼomũsĩndo wayo: neryo Nyamuhanga mwalangira ko kyowene.

¹³ Neryo mobwabya ĩgolo-golo, kandi mobwabya engyakya; ekyo kye kiro kyʼebisatu.

¹⁴ Neryo Nyamuhanga mwabũga ati, Habye esyotala omo kyanya kyʼelubula erigaba omusibo nʼekiro; neryo bibye biminyikalo, kandi busana nʼebirimo, na busana nʼebiro nʼemyaka.

¹⁵ Nabyo bibye busana nʼesyotala omo mwanya wʼelubula erĩkolerya ekihugo; neryo mobyabya bitya.

¹⁶ Neryo Nyamuhanga mwahangika esyotala ĩbĩrĩ esyonenenene; etala nene eritabala omo musibo, nʼetala nge eritabala omo kiro; mwahangika nʼesyongũnũnũ nibya.

¹⁷ Neryo Nyamuhanga mwahĩrasyo omo kyanya kyʼelubula sibye sĩkakolerya oko kihugo,

¹⁸ nʼeritabala omo musibo, nʼomo kiro, nʼerigaba ekyakakala nʼomwĩrĩmya. Neryo Nyamuhanga mwalangira ko byowene.

¹⁹ Neryo mobwabya; ĩgolo-golo, kandi mobwabya engyakya; ekyo kye kiro kyʼebini.

²⁰ Neryo Nyamuhanga mwabũga ati, Amagetsi osũle nʼerikanya nʼebĩhangĩkĩre ebiriho nʼesyonyonyũ sigulukire endata oko kihugo omo kyanya kyʼolubula.

²¹ Neryo Nyamuhanga mwahangika esyonyama nene-nene syʼomo ngetsi nʼobuli nyama yahangikawa eyiriho, eyikagenda, eyikalendera omo ngetsi, ngʼomũsĩndo wasyo; obuli nyonyũ syosĩ syʼebĩpũpa ngʼomũsĩndo wasyo; neryo Nyamuhanga mwalangira ko byowene.

²² Neryo Nyamuhanga mwatsumulasyo ati, Mubute, mukanyirire, mũsũlaye amagetsi wʼesyongetsi, nʼesyonyonyũ sikanye omo kihugo.

²³ Neryo mobwabya ĩgolo-golo, kandi mobwabya ngyakya; ekyo kye kiro kyʼebitanu.

²⁴ Neryo Nyamuhanga mwabũga ati, Ekihugo kikanye mwʼesyonyama esyahangikawa esiriho, ngʼomũsĩndo wasyo. Neryo mokyabya kitya.

²⁵ Neryo Nyamuhanga mwahangika esyonyama syʼomolĩ ngʼomũsĩndo wasyo, nʼesyonyama syʼeka ngʼomũsĩndo wasyo, nʼobuli kindu ekikakululuka oko kitaka ngʼomũsĩndo wakyo. Neryo Nyamuhanga mwalangira ko byowene.

²⁶ Neryo Nyamuhanga mwabũga ati, Tuhangike omundu omo mũsĩndo, nʼomo kĩsosekanĩo kyetu, atabale oko mahere wʼomo ngetsi nʼoko syonyonyũ syʼomo kyanya, nʼoko syonyama, nʼoko kihugo kyosĩ, nʼoko buli kindu ekikaku­luluka oko kitaka.

²⁷ Neryo Nyamuhanga mwahangika omundu omo kĩsosekanĩo kiwe, mwamuhangika erisosa Nyamuhanga; mwahangikabo omulume nʼomũkalĩ.

²⁸ Neryo Nyamuhanga mwatsumulabo, neryo Nyamuhanga mwabwirabo ati, Mubute mukanyirire, mũsũlaye ekihugo, mũgondayekyo; mutabale oko mahere wʼomo ngetsi nʼoko nyonyũ syʼomo kyanya, mutabalire obuli kindu ekiriho, ekikalendera oko kihugo.

²⁹ Neryo Nyamuhanga mwabũga ati, Lebaya, nabiribaha obuli nyenyĩ esikayira esyombuto, esiri endata oko kihugo kyosĩ, nʼobuli muti owali nʼebĩgũma bikayira embuto; byasyabya kalyo busana nenyũ.

³⁰ Oko buli nyama oko kitaka, oko buli nyonyũ syʼomo kyanya, nʼoko buli kindu kikakululuka ahisi oko kitaka, ebyosĩ ebiriho, nabirihabyo obuli kiti kibisi mo kalyo; neryo mobyabya bitya.

³¹ Neryo Nyamuhanga mwalangira obuli kindu ahangika, talebaya ko kyowene kutsibu. Neryo mobwabya ĩgolo-golo, kandi mobwabya ngyakya; ekyo kye kiro kyʼendatu.