Emĩsyo 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Emyatsi mibi yʼabamalaya

¹ Mugala wage, Ubike ebĩnywa byage, Uyibikire ebihano byage omwisi syawe.

² Ũtegaye ebihano byage ubyeho; Nʼamahano wage ngʼakalangira kʼerĩso lyawe.

³ Usengerebyo oko minwe yawe; Usakebyo oko mutima wawe.

⁴ Ubwire amenge uti, Uli mwali wetu; Wahule eriminya mo kihanda kyawe kyʼobũkalĩ.

⁵ Ibyatoka erĩkũkakĩrya oko mũkalĩ wʼehandi, Nʼoko wʼehandi oyũkatendereraya omo bĩnywa biwe.

⁶ Kusangwa omwʼĩseryo lyʼenyũmba yage Monalengya ameso omwʼĩseryo lyage;

⁷ Monalangira omo katĩkatĩ kʼabakĩrũ, Monaminyerera omo katĩkatĩ kʼabalwana, Omũlwana muguma oyute nʼobowĩka,

⁸ Akalaba omo nzira hakũhĩ nʼengonde yiwe; Naye mwalolya omo nzira yʼenyũmba yiwe,

⁹ Omo oyũ-nindi, omwʼĩgolo-golo lyʼekiro, Omo katĩkatĩ kʼekiro, nʼomo mwĩrĩmya.

¹⁰ Neryo, lebaya, omũkalĩ mwahĩndana naye, Nʼolukimba lwʼomũtetĩ, nʼowʼomutima wʼerĩtebya.

¹¹ Ni wʼolukanda nʼomutsibu; Ebisando biwe sibyeyiteka omo nyũmba yiwe.

¹² Lino ali omo syombalu, lino ali omo kibuga, Akalĩmbĩraya oko buli ngonde.

¹³ Neryo mwamuhamba atya, mwamulyatsirira, Mwamũkoherya, mwamubwira ati,

¹⁴ Amahongo wʼamahere wʼobuholo ali haguma nage; Mũnabwĩre nabiririha erĩlahĩrya lyage.

¹⁵ Busana nʼekyo indiasa erĩhĩndana nawe, Erĩsondya obũsũ bwawe nʼomũhwa, nage nabirikubana.

¹⁶ Nabirisesa engyingo yage kwʼobũlangĩtĩ obũlũkĩre mwʼebibuya, Haguma nʼomusohe wʼemirera wʼengohe yʼeMĩsĩrĩ.

¹⁷ Nabiritsatsanga oko ngyingo yage, Kwʼamanũkato, nʼamane-mane, na mũdalasĩnĩ.

¹⁸ Wase, tũgũte omo lwanzo erĩhĩka oko ngyakya-ngyakya; Tũyĩtsemesaye omwʼanzana.

¹⁹ Kusangwa omulume siali eka; Agendĩre lugendo luli.

²⁰ Abiriheka engunza yʼebĩtsĩpa haguma naye; Asyasuba eka omugulu omũbangũkĩ akatangura.

²¹ Omwʼisiha lyʼebĩnywa biwe bingi mwaleka iniawa; Omwʼĩtendererya lyʼemĩnywa yiwe mwamuheka.

²² Akamukwama lũba, Ngʼenume yʼende eyikayakerawa, Kutse ngʼomũsĩre oyũbohĩre erisuyirwa;

²³ Erĩhĩka aho omusoha akatsimitira amalepe wuwe; Ngʼenyonyũ eyikanguha eriya omo muguli, Ĩsĩyasĩ ko liri erĩtalya busana nʼengebe yayo.

²⁴ Neryo lino, bagala bage, munyihuliki­rire, Mutege amatwĩ wʼebĩnywa byʼobuno bwage.

²⁵ Omutima wawe sĩalolaye oko syonzira siwe; Sutalire omo syombalu siwe.

²⁶ Kusangwa abirigusa ahisi abahutere bangi; Ega, abo ĩta ni mulondo munene.

²⁷ Enyũmba yiwe ni nzira ikaya eKũlĩmũ, Yandagalĩre oko syongonde syʼoluholo.