Emĩsyo 31 - AMASAKO ABOYTRTRE WA NYAMUHANGA AWAKAHULAWA MO BIBLIA

Emĩsyo yʼOmwami Lemũelĩ

¹ Ebĩnywa byʼOmwami Lemũelĩ, Obukwenda nyĩnya wuwe amũkangĩrĩraya.

² Mugala wage, kuti kwehĩ? Kandi, mugala wʼenda yage, nĩkĩ kwehĩ? Kandi uwe mugala wʼerĩlahĩrya lyage nĩkĩ kwehĩ?

³ Suhe akagala kawe oko bakalĩ, Kutse esyonzira syawe oko bakaheraya abami.

⁴ Uwe Lemũelĩ, si mwatsi wʼabami, Si mwatsi wʼabami erĩpũlya obwabũ; Kutse abanya-mwami erĩbũga bati obũhĩre kutsibu buli hahi kwehĩ?

⁵ Bakasyapũlya, nʼeribirirwa amategeko, Nʼerĩhengemya erĩbanza libuya lyʼabandu bʼobũlĩge.

⁶ Uhe obũhĩre kutsibu oko yũkĩsĩya iniahera, Nʼebĩnyũ oko yukagalawa omo mutima.

⁷ Apũlaye, nʼeribirirwa Obwera buwe, Iniataswibuka obũlĩge buwe.

⁸ Utande obuno bwawe busana nʼemũmũ, Omo myatsi yʼabosĩ abakasĩganĩbawa ĩbobene.

⁹ Utande obuno bwawe, utswere eritunganene, Ũtwe erĩbanza libuya busana nʼabera nʼabʼobwaga.

¹⁰ Omũkalĩ mugenge nindi wanganabana kwehĩ? Kusangwa enzwere yiwe ĩlabĩre esyolulu syo kutsibu.

¹¹ Omutima wʼĩba wuwe akayiketera ye, Naye siendisyabula endũndĩ.

¹² Akamukolera ebibuya butsira ebibi Ebiro byosĩ byʼeribyaho liwe.

¹³ Akasondaya obweya bwʼesyombũlĩ nʼekĩtanĩ, Akakola omũbĩrĩ wuwe omo byala nʼomũhwa.

¹⁴ Ali ngʼamato wʼabatũndĩ; Akalũsaya ebyalya biwe byo hali.

¹⁵ Akabuka ibukine kiro, Nʼeriha abʼenyũmba yiwe akalyo. Nʼeriha abagombe buwe bʼobũkalĩ omũbĩrĩ wabo.

¹⁶ Akaganĩraya eririma nʼerigulalyo; Omo ndũndĩ yʼebyala biwe akahera eririma lyʼebĩnyũ.

¹⁷ Akaboha embindi yiwe nʼamaka, Akasĩkaya amaboko wuwe nʼamaka.

¹⁸ Akalebaya eritunda liwe liwite ndũndĩ; Etala yiwe sĩyĩrĩrĩma omo kiro.

¹⁹ Akahĩra ebyala biwe oko mũlũkĩryo, Nʼebiganza biwe bikahamba akatĩ kʼekĩrĩngo.

²⁰ Akasumba ebiganza biwe oko bera, Ega, akakakaya ebyala biwe oko bʼobwaga.

²¹ Sialiubaha enzururu busana nʼabʼekĩtũnga kiwe; Kusangwa abosĩ abʼekĩtũnga kiwe bambite esyʼomunyama.

²² Akayilukira emikeka eyĩkangĩre; Esyongimba siwe ni syʼekĩtanĩ kibuya nʼesyʼomunyama.

²³ Ĩba wuwe aminyikere omo syongyo, Omugulu akĩkala omo katĩkatĩ kʼabakulu bʼekihugo.

²⁴ Akaluka esyongimba syʼekĩtanĩ nʼerĩgũlyasyo, Nʼeriha abatũndĩ emikoba.

²⁵ Esyongimba siwe ni maka nʼolukengerwa; Akaseka omugulu owakasa.

²⁶ Akatanda obuno buwe omo menge; Nʼebihano byʼobubuya biri oko lulimi luwe.

²⁷ Akategaya ndeke esyonzira syʼekĩtũnga kiwe, Sialirya akalyo kʼerisingama.

²⁸ Abana buwe bakahangana nʼerimwahula mo wʼomũyĩsa; Ĩba wuwe akamupipa, ati,

²⁹ Abana-bato bangi babirikola ebibuya, Nĩkwa uwe ũlabĩrye abosĩ omo bubuya.

³⁰ Erĩsĩmwa likateba, nʼamalya-bindu ni busa; Nĩkwa omũkalĩ oyukubaha Omwami Mukulu yo wasyapipwa.

³¹ Umuhe endũndĩ yʼebyala biwe; Nʼemĩbĩrĩ yiwe yimupipe omo syongyo.