Emĩsyo 29 - AMASAKO ABOYTRTRE WA NYAMUHANGA AWAKAHULAWA MO BIBLIA

Obũkĩrũ bũkaheraya

¹ Oyukakungawa ngendo nyingi ĩnĩakakalaya ebĩkya biwe Asyaherĩbwa lũba isihali bũbalya.

² Omugulu abatunganene bakakanya, abandu bakatsema; Nĩkwa omugulu omundu mubi akatabala, abandu bakahiririkana.

³ Oyukanza amenge akatsemesaya tata wuwe; Nĩkwa oyukatamba nʼabasĩngĩrĩ akaheraya obuteke buwe.

⁴ Omwami akahanganaya ekihugo omwʼĩbanza libuya; Nĩkwa oyukangirira esigulo akaherayakyo.

⁵ Omundu oyũkaseheraya mũlĩkyabo Akatega obutaha-taha busana nʼebisando biwe.

⁶ Omwʼĩlolo lyʼomukola-nabi hali ekitego; Nĩkwa omutunganene akimba nʼeritsema.

⁷ Omutunganene akayĩtegereraya omwatsi wʼabera; Ababi sibawite obowĩka bwʼeriminyago.

⁸ Abasekererya bakahĩsaya omũyĩ; Nĩkwa abandu bʼamenge bakabindula erihitana.

⁹ Omundu wʼamenge amakuba obuhaka nʼomũkĩrũ, Amahitana kutse akaseka, sihendisyabya eriluhuka.

¹⁰ Abakũta omusasi bakagalirawa oko yũhĩkene; Kandi bakasonda-sonda engebe yʼoyutunganene.

¹¹ Omũkĩrũ akahũlũkaya obutsibu bosĩ bʼomutima wuwe; Nĩkwa omundu wʼamenge akakakĩrayabo nʼerĩtũleryabo.

¹² Omũtabalĩ amahulikirira amabehĩ, Abagombe buwe bosĩ ni babi.

¹³ Omwera nʼomũnũbya bakahĩndana haguma; Omwami Mukulu akakoleraya ameso wabo abosĩ babiri.

¹⁴ Omwami oyukatswera abera omo kwenene, Ekĩtũmbĩ kiwe kyʼobwami kyasyahanganĩbwa kera na kera.

¹⁵ Omwĩgo nʼerikunga bikaha amenge; Nĩkwa omwana oyũkalekeranĩbawa akahemula nyĩnya wuwe.

¹⁶ Omugulu ababi bakatabala, amalolo akakanya; Nĩkwa abatunganene basyasamalira eriwa lyabo.

¹⁷ Ukunge mugala wawe naye asyakũlũhũkya; Ega, asyatsemesya ekĩrĩmũ kyawe.

¹⁸ Ahate erĩkũmbũla, abandu sĩbeyĩkakĩraya; Nĩkwa oyũkategaya ebihano ni wʼobutseme.

¹⁹ Omugombe sialikungawa omo bĩnywa bisa; Kusangwa nomo angaminya sialikenga.

²⁰ Wamalangira omundu oyukanguha omo bĩnywa biwe kwehĩ? Omũkĩrũ ali kwʼamaha kwilaba ye.

²¹ Oyũkakũlaya omugombe wuwe yo ndeke erĩtsũka omo bwana buwe Enyũma wʼaho asyabya ngʼomugala wuwe.

²² Omundu uhitene akabũkaya amalwa, Nʼomundu wʼerihitana akakanyaya amalolo.

²³ Eriyipipa lyʼomundu lyasyamũkehya; Nĩkwa owʼekĩrĩmũ kĩyĩbombekĩre asyabana erĩsĩkya.

²⁴ Oyukasangira nʼomũrahĩ akakwa ekĩrĩmũ kiwe kyʼobusu; Akowa eritsuma ĩnĩatabũgakĩ.

²⁵ Eriubaha bandu likaleta ekitego; Nĩkwa oyukayiketera Omwami Mukulu asyabya nʼobuholo.

²⁶ Abangi bakasonda-sondaya erĩsĩmwa nʼomũtabalĩ; Nĩkwa eritswera lyʼomundu lĩkalũa oko Mwami Mukulu.

²⁷ Omundu oyutatunganene ni nye oko batunganene; Nʼoyutunganene omo nzira ni nye oko babi.