Emĩsyo 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Omundu siayipipe ĩyowene

¹ Suyipipe busana nʼomungya; Kusangwa Sĩwasĩ ebyo ekiro kyangahũlũkya.

² Ogundi mundu akupipe butsira obuno bwawe; Owʼehandi, butsira emĩnywa yawe.

³ Erĩbwe lĩrĩtohĩre, nʼemisege ĩrĩtohĩre; Nĩkwa omwaga wʼomũkĩrũ alĩtohĩre kwilaba ebyosĩ bibiri.

⁴ Erihitana ni ʼtsatsuha, nʼeriagalirwa ni ʼgunga; Nĩkwa nindi wangatoka erihangana embere syʼobũha kwehĩ?

⁵ Erikunga eriminyikere lyowene Kwilaba olwanzo olũbĩsamĩre.

⁶ Ebironda ebikaletawa, sibyeregula; Nĩkwa eriryatsirira lyʼenzĩgũ ni ringi.

⁷ Omutima ũgũtĩre akagalirawa oko kisese kyʼobuki; Nĩkwa oko mutima akwĩre enzala obuli kindu ekĩkalĩhĩre, kĩsĩhĩre.

⁸ Ngʼenyonyũ eyikaganga-ganga oko lutu lwayo, Omundu oyukaganga-ganga hali kwʼaho wuwe kwʼali atya.

⁹ Amagũta nʼebikakumba ndeke bĩkatsemesaya omutima; Erisiha lyʼomwĩra wʼomundu erĩkalũa omwʼihana lyʼomutima ko liri ritya.

¹⁰ Sũsĩganaye omwĩra wawe nʼomwĩra wa tata wawe; Kandi suye ewa mugala wenyũ oko kiro kyʼerĩkwa lyawe. Mũlĩkyenyũ oyuli hakũhĩ owene kwilaba mugala wenyũ oyuli ehali.

¹¹ Mugala wage ubye nʼamenge, nʼerĩtsemesya omutima wage, Inatoka erĩsũbĩrya oyukanyitsuma.

¹² Omundu wʼobũlengekanĩa amalangira ebibi, akayĩbĩsa; Nĩkwa abakĩrũ bakatwangana ibagalwa busana nʼekyo.

¹³ Wĩmaye olukimba luwe mo muwato busana nʼowʼehandi; Nʼerimuhamba ngʼomutsimbo-muwato busana nʼomũkalĩ wʼehandi.

¹⁴ Oyukatsumula omwĩra wuwe nʼomulenge munene, Iniakabuka omo ngyakya-ngyakya Kyasyamuganzirwako mwʼitakira.

¹⁵ Eritogonga eritehwa lyʼekiro kyʼembũla nyingi Nʼomũkalĩ wʼomwaga biringirirene.

¹⁶ Oyukasonda erĩmũkakĩrĩrya akakakĩraya erihunga; Nʼebyala biwe byʼamali bĩkahĩka eyiri amagũta.

¹⁷ Ekyuma kikagusungula ekindi kyuma; Nʼomundu kwʼakagusungula atya obũsũ bʼomwĩra wuwe.

¹⁸ Oyukalimira omuti wʼomũtĩnĩ asyalya ebĩgũma byago; Nʼoyũkasĩkaya Omwami Mukulu wuwe asyasĩkĩbwa.

¹⁹ Ngʼobũsũ ko bukatungererana nʼobũsũ omo magetsi, Omutima wʼomundu kwʼali atya oko mundu.

²⁰ Ekũlĩmũ nʼoluholo sĩbĩryũgũta na kera; Nʼameso wʼomundu sĩalĩũgũta na kera.

²¹ Enyungu yʼerĩnũnĩrya nĩ yʼekĩtsĩpa, Nʼolũhĩtsa busana nʼesyamagetsi; Nʼomundu akalengawako busana nʼeripipa liwe.

²² Nomo wangasekula omũkĩrũ omwʼĩsekũlo, Omo musekulo haguma nʼengano eyĩsekwĩre, Nĩkwa obũkĩrũ buwe sĩbwendĩsyamũlũako.

²³ Ubye nʼomũhwa eriminya ebĩhyo byawe nga biri biti, Nʼerĩrebya ndeke ebihangulo byʼesyonde syawe.

²⁴ Kusangwa ebindu sibyekota; Nʼakakĩra kakabyaho oko syondengo syosĩ kwehĩ?

²⁵ Obunyatsi bũmĩre bukahekawa, Nʼobunyatsi bulere bukahuluka, Nʼebiti byʼebitwa bĩkahĩndanĩbawamo.

²⁶ Ehyana hyʼembũlĩ ni busana nʼesyongimba syawe, Nʼesyombene-hene nĩ bũgũlĩ bwʼeririma.

²⁷ Kandi hasyabya amasabũ wʼesyombene awakũhĩkĩre busana nʼebyalya byawe, Na busana nʼebyalya byʼabʼenyũmba yawe, Nʼebyʼerirya busana nʼabagombe bawe bʼobũkalĩ.