Emĩsyo 26 - AMASAKO ABOYTRTRE WA NYAMUHANGA AWAKAHULAWA MO BIBLIA

Abakĩrũ nʼabagata sĩbesĩkĩbawa

¹ Ngʼesyonzururu oko mugulu wʼomwisi, Kandi ngʼembũla oko mugulu wʼerihulula, Ko liri ritya, erĩsĩkya siritolere oko mũkĩrũ.

² Ngʼakasinimbira omwʼitambayira lyako, Ngʼendambira omwʼiguluka lyayo, Litya eritakira eritawite ekikaleka siryehĩka.

³ Enyambya busana nʼesabayĩrĩ, olukoba busana nʼepunda, Nʼomwĩgo busana nʼomugongo wʼomũkĩrũ.

⁴ Sũsũbĩraye omũkĩrũ ngʼobũkĩrũ buwe Ukasyamusosa.

⁵ Ũsũbĩraye omũkĩrũ ngʼobũkĩrũ buwe, Akasyabya wʼamenge omo meso wuwe ĩyowene.

⁶ Oyukalebeka engulu omo byala byʼomũkĩrũ Akayĩtwa kwʼebisando biwe, nʼerĩpũlya erĩkwa.

⁷ Emihimbi yʼowʼamakonongo ikalegalega; Nʼomũsyo omo buno bwʼabakĩrũ kwʼali atya.

⁸ Ngʼoyukasenga erĩbwe omo mũsĩpĩlĩ, Ovũkasĩkaya omũkĩrũ kwʼali atya.

⁹ Ngʼomusakisaki akingira omo byala byʼomũkũndĩrya, Omũsyo omo buno bwʼabakĩrũ kwʼali atya.

¹⁰ Ngʼomũlasĩ akahũtalaya bosĩ, Kwʼali atya oyukaha omũbĩrĩ oko mũkĩrũ, nʼoko bakalaba.

¹¹ Ngoko embwa ikasuba oko bisalo byayo, Omũkĩrũ oyukaswakola obũkĩrũ buwe kwʼali atya.

¹² Wamalangira omundu wʼamenge omo meso wuwe ĩyowene kwehĩ? Omũkĩrũ ali kwʼamaha kwilaba oyũ.

¹³ Omugata akabũga ati, Hali endale omo nzira; Endale iri omo syombalu.

¹⁴ Ngʼolũyĩ lukabinduka-binduka oko mikoba yalo, Omugata kwʼakakola atya oko ngyingo yiwe.

¹⁵ Omugata akahĩra ebyala biwe omo kibindi; Lĩkamũlũhaya erĩswahetũkĩryabyo oko buno buwe.

¹⁶ Omugata ni wʼamenge omo meso wuwe Kwilaba abandu balinda abakatoka erĩsũbĩrya nʼamenge.

¹⁷ Oyukalaba nʼerĩyĩlũhya omo malwa awate wuwe, Ali ngʼoyukahamba embwa omo matwĩ.

¹⁸ Ngʼomundu mũsĩre oyukagusa ebĩsĩnganĩkya, Nʼemisoha nʼoluholo,

¹⁹ Omundu oyukateba mũlĩkyabo kwʼali atya, Nʼerĩbũga ati, Sinditenya kwehĩ?

²⁰ Omuliro akalĩma busana nʼeribula esyongwĩ; Nʼahate embandanganĩa, erinegena lĩkũmbayaho.

²¹ Ngʼamakala oko wakagulumira, nʼesyongwĩ oko muliro, Omundu wʼerinegena kwʼali atya akakanyaya amalwa.

²² Ebĩnywa byʼembandanganĩa biri ngʼehitole bĩsĩhĩre, Nabyo bikandagalira omo nda mo hali.

²³ Emĩnywa yʼomũhwa nʼomutima mubi, Yĩsosĩre ngʼenyungu yʼeribumba eyĩbombĩre omwʼĩhũlo lyʼebĩtsĩpa.

²⁴ Oyũkakwa ekĩnĩga akateba omo mĩnywa yiwe; Nĩkwa akabika eriteba omwisi wuwe.

²⁵ Omugulu akabũga ebibuya, sũmũlĩge; Kusangwa ali nʼesyonye sirinda omo mutima wuwe.

²⁶ Nomo bũsũ buwe bwangayiswika amatebo, Ebibi biwe byasyamĩnyĩkalĩbwa embere syʼendeko.

²⁷ Oyukatakula obuhya asyatogera mubo; Nʼoyũkakũmbagalaya erĩbwe, lyasyamusubako.

²⁸ Olulimi lwʼamabehĩ lũkakwa obusu abo lwahĩnola; Kandi obuno obwʼerĩsehya bukakola erihera.