Emĩsyo 25 - AMASAKO ABOYTRTRE WA NYAMUHANGA AWAKAHULAWA MO BIBLIA

Ũtegaye ekisando kyawe

¹ Eyĩ nĩ mĩsyo ya Solomono eyo bandu ba Hezekĩa, omwami wʼeYũda, basaka.

² Ni lukengerwa lwa Nyamuhanga erĩbĩsa omwatsi; Nĩkwa ni lukengerwa lwʼabami erisonda-sondya omwatsi.

³ Ngoko lubula luli endata kutsibu, nʼekihugo kĩlolĩre eyĩkwa yo hali, Omutima wʼabami nago sialisondeka.

⁴ Ũlũsaye amahungu omo kĩtsĩpa, Neryo enyungu ikahuluka busana nʼomũhesĩ.

⁵ Lũsaya ababi embere syʼOmwami, Nʼekĩtũmbĩ kiwe kyʼobwami kyasyahanganĩbwa omo litunganene.

⁶ Suyipipe embere syʼOmwami, Kandi suhangane aho wʼabakulu.

⁷ Kusangwa lyowene eribwirwa ambu, Wase hano embere, Kwilaba erĩhĩrwa enyũma syʼomunyamwami, Oyo ameso wawe abirilangira.

⁸ Si Wanguhe eriyalwa, Ukasyabula ekyʼerikola oko ndũlĩ yago, Omugulu mũlĩkyenyũ amabikuhemula.

⁹ Ũkanaye omwatsi wawe haguma na mũlĩkyenyũ ĩyowene, Nĩkwa sũbĩsũle ekĩbĩsĩre kyʼogundi.

¹⁰ Oyũkowago akasyakutsuma, Nʼesĩsonĩ syawe ĩsĩtalũaho.

¹¹ Ekĩnywa kĩkabũgawa oko mugulu atolere Kiri ngʼebĩgũma byʼesyamagetsi omo bĩlũkĩre byʼekĩtsĩpa.

¹² Ngʼembũka yʼesyamagetsi yʼomo kũtũ, Nʼeriyisitika omo syamagetsi esĩtũkwĩre. Kwʼali atya oyukakunga oko kũtũ kwʼerĩowa.

¹³ Ngʼeritsuku lyʼenzururu oko mugulu wʼamagese, Omukwenda oyuteregula kwʼali atya oko bakamutuma; Kusangwa akasũbaya emitima yʼabakama buwe.

¹⁴ Ngʼebĩtũ nʼerihunga ebite mo mbũla, Kwʼali atya oyukayipipa omo lũsũnzo lwʼamabehĩ.

¹⁵ Busana nʼeririnda liri, omũtabalĩ akabindulawa, Nʼolulimi luhehere lũkatwa erĩkũha.

¹⁶ Wabiribana obuki kwehĩ? Ulye obukutolere, Ũkasyũgũtabo nʼerisalabo.

¹⁷ Suleke ekisando kyawe kikabya omo nyũmba ya mũlĩkyenyũ engendo nene, Akasyaluha busana nawe, nʼerikũkwa ekĩnĩga.

¹⁸ Omundu oyũkatũla owʼamabehĩ uku mũlĩkyabo Ni nyondo nʼomũyalĩ, nʼomusoha atwĩre.

¹⁹ Eriyiketera omundu oyukalegula oko mugulu wʼobũlĩge, Liri ngʼerĩno iĩtwĩkĩre, nʼokugulu kũbũnĩkĩre.

²⁰ Ngʼoyukambula olukimba omo mugulu wʼeritsuku, kandi ngʼesĩkĩ oko magadĩ, Kwʼali atya oyukimba esyonyimbo oko mundu wʼomutima alĩtohĩre.

²¹ Enzĩgũ yawe yamawira, iwamuha akalyo inialyako; Kandi amakwa enyota, iwamuha amagetsi wʼerĩpũlya.

²² Kusangwa Ũkahĩra amakala wʼomuliro oko mutwe wuwe, NʼOmwami Mukulu asyakuhemba.

²³ Erihunga lyʼelutambi lwʼendata likaleta embũla; Nʼolulimi olũkahandĩkĩrĩraya lukaleta obũsũ bwʼerihitana bo lutya.

²⁴ Lyowene erĩĩkala omo lutwe, Kwilaba erĩĩkala omo nyũmba ĩgalĩhĩre haguma nʼomũkalĩ wʼerinegena.

²⁵ Ngʼamagetsi agũhũhĩrĩre ukwʼoyũkwĩre enyota, Engulu yowene ĩkalũa oko kihugo kyʼehali kwʼiri itya.

²⁶ Omundu utunganene oyũkakũnawa nʼabandu babi, Ali ngʼengũnũnũko eyĩkatabũkala nʼekitehero kĩtsandĩre.

²⁷ Sĩryowene erirya obuki bungi; Litya nĩ bũlĩge busana nʼabandu erĩyĩsonderya olukengerwa lwabo ĩbobene.

²⁸ Oyũteganaya ekĩrĩmũ kiwe Ali ngʼomũyĩ owasambukere owate kwʼesyombĩmbo.