Emĩsyo 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Emĩsyo yʼebibuya nʼeyʼebibi

¹ Ebĩnyũ bĩkasekereraya, nʼobũhĩre kutsibu bukaleta eritamira; Nʼoyukatamirabyo si wʼamenge.

² Erĩũbahya lyʼOmwami liri ngʼeriruruma lyʼendale; Nʼoyũkamwagalĩranaya akahalaya ekĩrĩmũ kiwe ĩyowene.

³ Nĩ ʼsĩkya oko mundu oyukayisolola oko malwa; Nĩkwa obuli mũkĩrũ asyanegena.

⁴ Omugata syanzĩre eririma busana nʼomugulu wʼeritsuku; Busana nʼekyo, oko mugulu wʼerihulula asyasabĩrĩrya, iniatabya nʼekindu.

⁵ Erihana omo mutima wʼomundu liri ngʼomutobero wʼamagetsi; Nĩkwa omundu wʼamenge asyatehalyo.

⁶ Hakũhĩ nʼabandu bosĩ bakatũlaganaya obuli mundu obubuya buwe; Nĩkwa nindi wangabana omundu oyuteregula kwehĩ?

⁷ Omundu utunganene akalendera omo litunganene riwe, Nʼabana buwe ni batsumulwa enyũma wuwe.

⁸ Omwami oyo wĩkere oko kĩtũmbĩ kyʼeritswera Akapanza ebibi byosĩ omo meso wuwe.

⁹ Nindi wangabũga ati, Nabĩrĩerya omutima wage, Nyerĩre kwʼebibi byage kwehĩ?

¹⁰ Erirenga mĩsĩndo-mĩsĩndo, nʼehĩrengĩ mĩsĩndo-mĩsĩndo, Nĩkwa ebyosĩ ni nye oko Mwami Mukulu.

¹¹ Omwana akayĩmĩnyĩsaya busana nʼemĩbĩrĩ yiwe, Emĩbĩrĩ yiwe yamabya ini mibuya, kutse itunganene.

¹² Okũtũ okũkowa, nʼerĩso erikalangira, Omwami Mukulu abirihangika ebyosĩ bibiri.

¹³ Siwanze otũgotserĩ, Ukasyabya mwera; Ũlĩbũle ameso wawe, neryo wasyũgũtĩbwa nʼebyalya.

¹⁴ Omũgũlĩ ati, Sĩkyowene, sĩkyowene; Nĩkwa omugulu amabigenda, neryo akayihalamba.

¹⁵ Hali esyamagetsi nʼebĩkangĩre bingi, Nĩkwa emĩnywa yʼeriminya nĩ rĩbwe lyʼobũgũlĩ bunene.

¹⁶ Wĩmaye olukimba lwʼoyuli muwato busana nʼowʼehandi; Umuhambe omwʼĩsembo oyuli muwato busana nʼabʼehandi.

¹⁷ Ebyalya byʼamabehĩ bĩsĩhĩre oko mundu; Nĩkwa enyũma obuno bwasyũsũlĩbwa nʼomusege wʼamabwe.

¹⁸ Obuli ʼyĩsũnza lĩkahanganĩbawa busana nʼamahano; Kandi busana nʼerisondola lyʼamenge ukayalwa.

¹⁹ Oyukalendera nʼerihandikirira akabĩsũla ebĩbĩsĩre; Busana nʼekyo susangire nʼoyukatanda-tanda emĩnywa yiwe.

²⁰ Oyukatakira ĩse kutse nyĩnya, Etala yiwe yasyalĩmĩbwa omo mũhĩndanĩa munene.

²¹ Omwandu akabanika lũba okwʼĩtsũka; Nĩkwa endũlĩ yago siendisyatsumulwa.

²² Sũbũge uti, Nasyakĩsya ebibi; Ulinde Omwami Mukulu, naye asyakũlamya.

²³ Ehĩrengĩ mĩsĩndo-mĩsĩndo ni nye oko Mwami Mukulu; Kandi akalengĩ kʼamabehĩ nako sĩkowene.

²⁴ Erihongoka lyʼomundu ni ryʼOmwami Mukulu, Neryo omundu angaminya enzira yiwe yʼati kwehĩ?

²⁵ Ni kitego oko mundu erĩbũga lityalitya ati, Kĩbũyĩrĩre, Nʼenyũma wʼerĩlahĩrya erĩbũla-bũlya.

²⁶ Omwami wʼamenge akagũlũkaya ababi, Nʼerireta ekĩrĩngo kyʼerĩhũmba endata kubo.

²⁷ Ekĩrĩmũ kyʼomundu ni tala yʼOmwami Mukulu, Erĩsonda-sondya ebihande byosĩ byʼomwisi wuwe.

²⁸ Obubuya nʼekwenene bĩkategaya omwami; Nʼekĩtũmbĩ kiwe kyʼobwami kĩkahanganĩbawa omo bubuya.

²⁹ Olukengerwa lwʼabalwana ni maka wabo; Nʼobubuya bwʼabasyakulu ni mutwe owali kwʼesyombwĩ.

³⁰ Erĩswĩrya erĩkahũtalaya lĩkeraya ebibi; Nʼerĩswĩrya lĩkahĩka omo bihande byʼomwisi mo hali.