Emĩsyo 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Enzira yʼamenge nʼenzira yʼobũkĩrũ

¹ Erĩsũbĩrya lyolo likahiga erihitana; Nĩkwa ekĩnywa kĩkalĩre kĩkasũbaya erihitana.

² Olulimi lwʼabʼamenge lũkabũga eriminya lyowene; Nĩkwa obuno bwʼabakĩrũ bũkabũga obũkĩrũ.

³ Ameso wʼOmwami Mukulu akalebaya ehosĩ, Erilangira ababi nʼababuya.

⁴ Olulimi lwʼerĩlamya ni muti wʼengebe; Nĩkwa olũhengemĩre mulo lũkabũna omutima.

⁵ Omũkĩrũ akapona erihabula lya tata wuwe; Nĩkwa oyukakenga erihabula akabana obũgerekanĩa.

⁶ Omo nyũmba yʼomutunganene muli obuteke bungi; Nĩkwa omo syondũndĩ syʼababi muli bũlĩge.

⁷ Emĩnywa yʼabʼamenge ĩkatũlaganaya eriminya; Nĩkwa omutima wʼabakĩrũ sialikola atya.

⁸ Obuhere bwʼababi ni nye oko Mwami Mukulu; Nĩkwa erisaba lyʼabatunganene ni butseme buwe.

⁹ Enzira yʼababi ni nye oko Mwami Mukulu; Nĩkwa anzĩre oyukakwama ekitunganene.

¹⁰ Hali erihabula lĩkalĩre busana nʼoyũkasĩga enzira; Nʼoyukapona erikungwa asyahola.

¹¹ EKũlĩmũ nʼeBirunga biri embere syʼOmwami Mukulu; Na kwilaba aho emitima yʼabana bʼabandu.

¹² Omũsekĩ sĩanzĩre erikungwa: Sĩanzĩre eriya oko bʼamenge.

¹³ Omutima owakatsanga akayira obũsũ obũtsemĩre; Nĩkwa busana nʼobũlĩge bwʼomutima ekĩrĩmũ kĩkabũnĩka.

¹⁴ Omutima wʼoyuwite amenge akasonda-sondaya eriminya; Nĩkwa obuno bwʼabakĩrũ bukalya obũkĩrũ.

¹⁵ Ebiro byosĩ byʼoyukagalawa ni bibi; Nĩkwa owʼomutima wʼebitsange ali nʼakalyo kʼendambĩ yosĩ.

¹⁶ Eribya nʼebike haguma nʼeriubaha lyʼOmwami Mukulu, Lyowene kwilaba eribya nʼobuteke bunene haguma nʼobũlĩge.

¹⁷ Erirya esyonyenyĩ nʼoyo wanzene naye, Lyowene kwilaba erirya ende ĩnenehĩre haguma nʼekĩnĩga.

¹⁸ Omundu wʼerihitana akatsũmbũkaya erinegena; Nĩkwa oyutegalirawa lũba akakũbaya amalwa.

¹⁹ Enzira yʼomugata ni lukunda lwʼamahwa; Nĩkwa enzira yʼabatunganene ikayirawa mo mbalu nene.

²⁰ Omugala oyuwite amenge akatsemesaya ĩse; Nĩkwa omundu mũkĩrũ akapona koyo wuwe.

²¹ Obũkĩrũ ni butseme busana nʼoyutawite menge; Nĩkwa omundu wʼeriminya akatũngananaya olugendo luwe.

²² Ahate amahano, erĩyĩsũnza lĩkakwa bũlĩge; Nĩkwa omo bungi bwʼabahanĩ akahanganĩbawa.

²³ Omundu akatsema omwʼĩsũbĩrya lyʼobuno buwe; Nʼekĩnywa omo mugulu owene ni kibuya kingahi!

²⁴ Oko bʼamenge enzira yʼengebe ikahetuka, Iniaminya erĩlũa omo Kũlĩmũ eyĩkwa.

²⁵ Omwami Mukulu asyakula enyũmba yʼabakayanza; Nĩkwa asyahanda Omutano wʼomũkwakalĩ.

²⁶ Erĩhano libi ni nye oko Mwami Mukulu; Nĩkwa ebĩnywa bĩkatsemesaya ni bibuya.

²⁷ Oyukabana endũndĩ ite yiwe akagalaya enyũmba yiwe; Nĩkwa oyukagalirawa oko byũtũlĩro asyabyaho.

²⁸ Omutima wʼabatunganene akategekanaya embere wʼerĩsũbĩrya; Nĩkwa obuno bwʼababi bũkũtũla emyatsi mibi.

²⁹ Omwami Mukulu ali hali oko babi; Nĩkwa akowa erisaba lyʼabatunganene.

³⁰ Ekyakakala kyʼameso kĩkatsemesaya omutima; Nʼengulu yowene ĩkanenehaya amakũha.

³¹ Okũtũ okukahulikirira erikunga lyʼengebe; Kwasyĩkala omo katĩkatĩ kʼabʼamenge.

³² Oyukagana erikungwa akapona ekĩrĩmũ kiwe-kiwe; Nĩkwa oyukahulikirira erikungwa akabana menge.

³³ Eriubaha lyʼOmwami Mukulu nĩ ʼkangĩrĩrya lyʼamenge; Erĩyĩkehya lĩkatsũka embere wʼerĩsĩkĩbwa.