Emĩsyo 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Enzira yʼabʼamenge nʼenzira yʼabakĩrũ

¹ Omugala oyuwite amenge akahulikirira erihana lʼĩse wuwe; Nĩkwa omũsekĩ sĩalĩowa erikungwa.

² Omundu asyalya obubuya busana nʼebĩgũma byʼobuno buwe; Nĩkwa ekĩrĩmũ kyʼembandanganĩa kyasyalya omutsatsuho.

³ Oyũkategaya obuno buwe akategaya engebe yiwe; Nĩkwa oyũkakũmbũla kutsibu emĩnywa yiwe asyabana erihera.

⁴ Ekĩrĩmũ kyʼomugata kĩkayĩtsũtsa, ikitabana kindu; Nĩkwa ekĩrĩmũ kyʼowʼomũhwa kĩkandĩsyanenehĩbwa.

⁵ Omundu utunganene akagalirawa oko mabehĩ; Nĩkwa omundu mubi ni nye kandi akahemuka.

⁶ Eritunganene lĩkategaya oyũhĩkene omo nzira; Nĩkwa obubi bukagusa omukola-nabi yʼahisi.

⁷ Hali oyũkayĩkamahaya, nĩkwa isiawite kindu; Hali oyukayiyira mo mwera nĩkwa iniawite ebindu bingi.

⁸ Ehongo yʼengebe yʼomundu bye bindu biwe; Nĩkwa omwera sĩalĩowa erihayirwa.

⁹ Ekyakakala kyʼabatunganene kikatsema; Nĩkwa etala yʼababi yasyalĩmĩbwa.

¹⁰ Omũkĩrũ akaleta amalwa busana nʼeriyiheka liwe; Nĩkwa amenge ali nʼabakahanawa ndeke.

¹¹ Obũsokĩ obukabanika omo litya-litya bwasyakehĩbwa; Nĩkwa oyukakuma-kumabo nʼebyala asyabana erikanya.

¹² Amaha awakalindirirawa akaleka omutima ĩnĩasĩmba; Nĩkwa omugulu omundu akabana ekyo anzĩre, ni muti wʼengebe.

¹³ Oyukapona ekĩnywa akayiretera erihera; Nĩkwa oyukubaha amategeko asyahembwa.

¹⁴ Ebihano byʼabʼamenge nĩ ngũnũnũko yʼengebe; Omundu aminye erĩyĩbalya oko bitego byʼoluholo.

¹⁵ Eriminya ndeke rikaleta eriganyira; Nĩkwa enzira yʼomukola-nabi ĩkalĩre.

¹⁶ Omũgerekanĩa akakola nʼeriminya; Nĩkwa omũkĩrũ akakangaya obũkĩrũ buwe.

¹⁷ Omukwenda mubi akawa omo bibi; Nĩkwa omukwenda oyuteregula akaleta erĩũwana.

¹⁸ Obwera nʼesĩsonĩ byasyabya oko yukagana erihabulwa; Nĩkwa oyũkowa erikungwa asyasĩkĩbwa.

¹⁹ Erĩyĩtsũtsa erikabererera lĩsĩhĩre omo kĩrĩmũ; Nĩkwa ni nye oko bakĩrũ erĩlũa oko bibi.

²⁰ Ulendere haguma nʼabandu bʼamenge nawe wasyabya wʼamenge; Nĩkwa omwĩra wʼabakĩrũ asyakwa.

²¹ Ebibi bikakwamirira abakola-nabi; Nĩkwa abatunganene basyahembwa nʼobubuya.

²² Omundu mubuya akasĩgĩra abitsikulu buwe bʼomwandu; Nʼobũsokĩ bwʼomukola-nabi bukabikirawa abatunganene.

²³ Akalyo kanene kali omo bulime bwʼabera; Nĩkwa hali ebĩkaherĩbawa busana nʼahate erĩbanza.

²⁴ Oyũkakehaya olũfĩmbo akakwa omugala wuwe yʼobusu; Nĩkwa oyũmwanzĩre akamukunga ndeke.

²⁵ Omutunganene akalya nʼerĩũgũta; Nĩkwa enda yʼomubi yasyawira.